1 Мусэ 47
47
1Арати, Исуф кӀуэри, хъыбар иригъэщӀащ фирхьэуным, мыр жиӀэурэ:
– Си адэри, си къуэшхэри, я Ӏэщ цӀыкӀуи я Ӏэщышхуи, нэгъуэщӀ сыт яӀэми, псори къыздащтэри къикӀащ Ханаан щӀыналъэм; иджы ахэр щыӀэщ Гощэн щӀыналъэм.
2Исуф и къуэшхэм ящыщу цӀыхуитху здишэри, ахэри иригъэлъэгъуащ фирхьэуным. 3ЕупщӀащ фирхьэуныр абы и къуэшхэм:
– Сыт фи ӀэщӀагъэ?
– Дымэлыхъуэщ уи унэӀутхэр, дэри ди адэхэри, – жраӀащ абыхэм фирхьэуным.
4Абыхэм фирхьэуным жраӀащ адэкӀи:
– Дэ дыкъэкӀуащ мы щӀыналъэм дыщыпсэуну, сыт щхьэкӀэ жыпӀэмэ щыӀэкъым хъупӀэхэр уи унэӀутхэм я Ӏэщхэм папщӀэ Ханаан щӀыналъэм, гъаблэ ткӀий зэрыщыӀэм къыхэкӀкӀэ. Аращи, хуит дыщӀ уи унэӀутхэр Гощэн щӀыналъэм дитӀысхьэну.
5Фирхьэуным Исуф къыжриӀащ абдеж:
– Уи адэри уи къуэшхэри уи деж къэкӀуащ. 6Мысыр щӀыналъэр уи пащхьэ илъщ; щӀыналъэм и щӀыпӀэ нэхъыфӀым деж щыгъэтӀыс уи адэри уи къуэшхэри; щрепсэу ахэр Гощэн щӀыналъэм. Абыхэм зэфӀэкӀ зиӀэ яхэтмэ, пэрыгъэувэ ахэр си Ӏэщым, кӀэлъыплъыну.
7ИтӀанэ Исуф и адэ Екъуб къишэри иригъэлъэгъуащ ари фирхьэуным; икӀи Тхьэм и нэфӀ щыхуэну Екъуб фирхьэуным хуелъэӀуащ. 8Фирхьэуным Екъуб жриӀащ:
– Сыт уи ныбжь?
9Екъуб фирхьэуным жриӀащ:
– Сэ дунейм сызэрытетрэ мэхъу илъэсищэрэ щэщӀрэ; мащӀэщ икӀи насыпыншэщ си гъащӀэ махуэхэр, нэсакъым ахэр си адэхэм къапсэуа гъащӀэм.
10Тхьэм и нэфӀ къыщыхуэну Екъуб фирхьэуным хуелъэӀури, къыщӀэкӀыжащ фирхьэуным деж.
11Арати, увыпӀэ яхуищӀащ Исуф и адэми и къуэшхэми, щаритащ абыхэм щӀапӀэ Мысыр щӀыналъэм и Ӏыхьэ нэхъыфӀ дыдэ РаӀымэсэс щӀыналъэм, фирхьэуным унафэ зэрищӀам тету. 12ИгъэнщӀырт Исуф гъавэкӀэ езым и адэри, и къуэшхэри, и адэм и унагъуэ псори, дэтхэнэ унагъуэм сабий исым я бжыгъэм елъытауэ.
Мысырым гъаблэ къызэрыщыхъуар
13ЩыӀэтэкъым гъавэ щӀылъэ псом; гъаблэр икъукӀэ ткӀий хъуат, икӀи тхьэмыщкӀагъуэр къалъысат гъаблэм къыхэкӀыу Мысыр щӀыналъэми Ханаан щӀыналъэми. 14ЦӀыхухэм гъавэ къыщащэхуурэ, Исуф зэхуихьэсащ Мысыр щӀыналъэми Ханаан щӀыналъэми илъ дыжьыну хъуар, щӀихьащ Исуф дыжьыныр фирхьэун унэм. 15Арати, дыжьыныр щаухащ Мысыр щӀыналъэми Ханаан щӀыналъэми. Дыжьыныр щаухым, мысыр цӀыху псори кӀуащ Исуф деж:
– Къыдэт гъавэ, – жаӀэри, – сыт дэ уи пащхьэ дыщылӀэн щӀыхъуейр, ди дыжьыныр зэрыдухам папщӀэ?
16– Фи Ӏэщыр къэфхуи, – жиӀащ Исуф, – фэстынщ фи Ӏэщым и уасэу гъавэ, дыжьыныр фыухамэ.
17Арати, къахурт абыхэм я Ӏэщыр Исуф деж; яритырт Исуфи гъавэр шыхэми, Ӏэщ цӀыкӀу хъушэхэми, Ӏэщышхуэ хъушэхэми, шыдхэми я уасэу; а гъэм апхуэдэурэ игъэнщӀащ ахэр гъавэкӀэ, я Ӏэщыр къаӀрихыурэ.
18ДэкӀащ а гъэр; адрей илъэсми къакӀуэри, къыжраӀащ абы:
– ЩыдбзыщӀынкъым ди зиусхьэным ди дыжьыныр зэрыдухар, ди Ӏэщ хъушэхэри уэ, ди зиусхьэным, къыпӀэщӀыхьащ; зыри къыщытхуэнэжакъым ди зиусхьэным и пащхьэм, ди щхьэмрэ ди щӀыгухэмрэ мыхъумэ. 19Сыт уи пащхьэм дыщыкӀуэдын щӀыхуейр дэ, дэри ди щӀыгухэри? Дыщэху дэри ди щӀыгухэри гъавэкӀэ; икӀи дэри ди щӀыгухэри фирхьэуным унэӀут дыхуэхъунщ, ауэ уэ къыдэт жылэ, дэ дымылӀэу дыпсэун, щӀылъэри нэщӀ мыхъун папщӀэ.
20Къищэхуащ Исуф Мысыр щӀыналъэ псори фирхьэуным папщӀэ. Ящэжащ мысыр цӀыхухэм щхьэж и губгъуэр, гъаблэ къазэрытехъуам къыхэкӀыу. Апхуэдэ щӀыкӀэкӀэ лъысащ щӀыгур фирхьэуным. 21ИщӀащ абы лъэпкъыр унэӀут, Мысырым и зы гъунэм къыщыщӀэдзауэ адрей гъунэм нэсу.
22Тхьэгъэпсхэм я закъуэщ зи щӀыгу къимыщэхуар, сыт щхьэкӀэ жыпӀэмэ фирхьэуным абыхэм яритауэ яӀэт гъавэ Ӏыхьэ, икӀи ахэр ирипсэурт фирхьэуным ярита гъавэ Ӏыхьэм; абы къыхэкӀыуи ящакъым я щӀыгур.
23ЯжриӀащ Исуф цӀыхухэм итӀанэ:
– Фирхьэуным папщӀэ иджы сэ фыкъэсщэхуащ фэри фи щӀыгури; жылэхэр фызотри, тефсэ щӀыгум. 24Гъавэ хыжыгъуэр къэсмэ, къыхуэфшэ фирхьэуным Ӏыхьэ тхуанэр; ӀыхьиплӀыр къыфхуэнэнущ фэ губгъуэхэм щыхэфсэну, фэри, фи унэхэм исхэми, фи сабийхэми фшхыну.
25– Уэ къебгъэлащ ди гъащӀэр, – жаӀащ абыхэм, – нэфӀкӀэ укъыдэплъащ, ди зиусхьэн, дыхурехъу фирхьэунми унэӀут.
26Абдеж щигъэуващ Исуф Мысыр щӀыналъэм хабзэу, уеблэмэ иджырей махуэм къэсу: Ӏыхьэ тхуанэр фирхьэуным етын, тхьэгъэпсхэм я щӀыгуу фирхьэуным ейуэ щымытыр хэмыту.
Екъуб и иужьрей илъэсхэр
27Щыпсэурт Израил Мысыр щӀыналъэм, Гощэн щӀыгум, телэжьыхьырт а щӀыгум; багъуэурэ, ар лъэпкъышхуэ хъуащ. 28Щыпсэуащ Екъуб Мысыр щӀыналъэм илъэс пщыкӀублкӀэ; хъурт Екъуб и махуэхэр, абы и гъащӀэ махуэхэр, илъэсищэрэ плӀыщӀрэ блырэ.
29Къэсащ Екъуб щылӀэну пӀалъэр, абы езым и къуэ Исуф къриджэри, жриӀащ:
– НэфӀкӀэ укъызэплъмэ, уи Ӏэр си куэ щӀагъым щӀэлъхьи, тхьэлъанэ щӀы фӀыкӀэ, пэжыгъэкӀэ укъызэрысхущытынумкӀэ: Мысырым сыщыщӀумылъхьэж. 30Си адэжьхэм сабгъурыгъуэлъхьэжын щхьэкӀэ, Мысырым сипхыжынщи, сыщыщӀэплъхьэжынщ абыхэм я кхъэлэгъунэм.
– СщӀэнщ уи псалъэм тету, – жиӀащ Исуф.
31– Тхьэлъанэ къысхуэщӀ, – жиӀащ Екъуб.
Тхьэлъанэ хуищӀащ Исуф. И щхьэнтэм зригъэщӀурэ, Тхьэм щӀыхь хуищӀащ Израил.
Currently Selected:
1 Мусэ 47: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
