1 Мусэ 43

Биниамин и къуэшхэм я гъусэу Мысырым зэрыщыӀар

1Гъаблэр нэхъ ткӀий щыхъуащ щӀылъэм. 2Мысырым къраша гъавэр яшхын щаухым, Екъуб яжриӀащ и къуэхэм:

– ФыкӀуэ иджыри, къытхуэфщэху гъавэ.

3Иудэ абы зыкъыхуигъэзащ, мыр жиӀэри:

– А цӀыхум быдэу къытхуигъэуващ дэ: «Фыкъимыхьэ си пащхьэ, фи къуэшыр фи мыгъусэмэ», жиӀэри. 4Ди къуэшыр ди гъусэмэ, дыкӀуэнщи, къыпхуэтщэхунщ гъавэ. 5Ауэ номыгъакӀуэмэ, дыкӀуэнукъым; сыт щхьэкӀэ жыпӀэмэ а цӀыхум къыджиӀащ дэ: «Фыкъимыхьэ си пащхьэ, фи къуэшыр фи мыгъусэмэ», жиӀэри.

6– Сыт фэ апхуэдэ Ӏеягъэ къыщӀызэфщӀар, – жиӀащ Израил, – фэ иджыри къуэш фиӀэу а цӀыхум жефӀэу?

7– КъытпкърыупщӀыхьащ а цӀыхур дэр папщӀи ди Ӏыхьлыхэм папщӀи, – жаӀащ абыхэм, – «Псэу иджыри фи адэр? ФиӀэ къуэш?» – жиӀэурэ. Дэри хуэтӀуэтащ ар абы а упщӀэхэм я жэуапу. ТщӀэрэт дэ абы: «Къысхуэфшэ фи къуэшыр» жиӀэну.

8Иудэ жриӀащ Израил, езым и адэм:

– НэутӀыпщ щӀалэр си гъусэу; дэри зытӀэтынщи, дыкӀуэнщ, икӀи псэууэ дыкъэнэнщ, дылӀэнкъым дэри, уэри, ди сабийхэри.

9Сэ жэуап сохь абы папщӀэ, си ӀэхэмкӀэ уэстыжынщ ар. Сэ ар къыпхуэсшэжу уи пащхьэм измыгъэувэжмэ, уи пащхьэм сыщыкъуаншэщ игъащӀэкӀэ. 10Дэ зидмылъэфыхьамэ, тӀэунейрэ дыкӀуакӀэт абы.

11Израил, абыхэм я адэм, яжриӀащ и къуэхэм:

– Апхуэдэу щыщыткӀэ, мыр фщӀэ: ныздэфщтэ мы щӀыналъэм къытекӀхэм ящыщ нэхъыфӀхэр, хуэфхь тыгъэу а цӀыхум Ӏэзэгъуэ удз зыбжанэрэ форэ, мэ ӀэфӀ зыпихрэ жыгхэмрэ удзхэмрэ, дэжьейхэмрэ миндал дэхэмрэ. 12Зыдэфщтэ хуэдитӀкӀэ дыжьыни; а фи къэпхэм къралъхьэжа дыжьынри зыдэфщтэжи, яхуэфхьыж; пщӀэнукъым, зэрымыщӀэкӀэ къэхъуа Ӏуэхуу къыщӀэкӀынкӀэ хъунущ ар. 13Фи къуэшыр здэфшэ, зыфӀэти, фыкӀуэ аргуэру а цӀыхум деж. 14Тхьэуэ псори зыхузэфӀэкӀым щывигъэгъуэтынщ а цӀыхум деж гущӀэгъу, адрей фи къуэшри Биниамини абы къыфхуиутӀыпщыжын папщӀэ. Сэри быныншэу сыкъэнэну иухамэ, быныншэу сыкъренэ.

15Арати, къащтащ а тыгъэхэр а цӀыхухэм, къащтащ я ӀэхэмкӀэ дыжьыну хуэдитӀи, Биниамини здашэри, кӀуащ Мысырым, иуващ Исуф и пащхьэм. 16Исуф, абыхэм Биниамин яхэту къыщилъагъум, жриӀащ езым и унэм и унафэщӀым:

– ЩӀэшэ мы цӀыхухэр унэм, Ӏэщым щыщ гуэри укӀи, къэгъэхьэзыр; си гъусэу шхэнущ а цӀыхухэр шэджагъуэм.

17ИщӀащ а цӀыхум Исуф зэрыжиӀам хуэдэу, щӀишащ а цӀыхум ахэр Исуф и унэм. 18А цӀыхухэр Исуф и унэм зэрыщӀашам щхьэкӀэ къэшынэри, жаӀащ:

– Ди къэпхэм иралъхьэжауэ щыта дыжьыным папщӀэщ унэм дыкъыщӀыщӀашар, ар фӀэгъэнапӀэ ящӀу къыттеуэу дэри ди шыдхэри гъэр дащӀын папщӀэщ.

19Ахэр Исуф и унэм и унафэщӀым бгъэдыхьэри, щӀадзащ абы бжэм деж щепсалъэу.

20ЖаӀащ мыпхуэдэу:

– КъэдаӀуэт, ди зиусхьэн, дэ нэхъапэми дыкъэкӀуэгъащ гъавэ тщэхуну. 21Абы щыгъуэ къэхъуауэ щытаращ: нэху дгъэщыну дыкъэувыӀауэ, ди къэпхэр щыттӀатэм – дыжьыныр щхьэж и къэп илъщ, иджы дэ фыдотыж ар ди ӀэкӀэ. 22Ауэ гъавэ къэтщэхун папщӀэ, дэ къэтхьащ нэгъуэщӀ дыжьыни. Дэ тщӀэркъым ди дыжьынхэр ди къэпхэм хэт кърилъхьэжами.

23– Фысабыр, фымышынэ, – жиӀащ абы, – фи Тхьэуэ фи адэм и Тхьэм фхурилъхьащ фи къэпхэм мылъкур; фи дыжьыныр къэсащ си деж. – Абдеж къахуишащ абыхэм Симеон.

24Исуф и унэм а цӀыхухэр щӀишэри, яхуихьащ псы, абыхэм ятхьэщӀащ я лъакъуэхэр; яритащ абыхэм я шыдхэми Ӏус. 25Къагъэхьэзыращ абыхэм тыгъэхэр Исуф къыщыкӀуэжыну шэджагъуэм ехъулӀэу. Сыт щхьэкӀэ жыпӀэмэ абыхэм зэхахат абдежым щэджагъуашхэ зэрыщышхэнур.

26Арати, къэкӀуэжащ Исуф унэм; хуахьащ абыхэм Исуф тыгъэу езыхэм яӀыгъхэр, щхьэщи хуащӀащ абы щӀым нэс загъэщхъыу. 27Абыхэм я узыншагъэм щӀэупщӀэри, жиӀащ Исуф:

– Узыншэ зи хъыбар къысхуэфӀуэта фи адэ лӀыжьыр? Псэу ар иджыри?

28Абыхэм жаӀащ:

– Узыншэщ уи унэӀутыр, ди адэр; иджыри псэущ.

Абдежми загъэщхъри, абыхэм щхьэщэ ящӀащ.

29Исуф къыщеплъым, къилъэгъуащ Биниамин, езым и къуэшыр, езым и анэм къилъхуар, икӀи жиӀащ:

– Мыра фи къуэш нэхъыщӀэу зи хъыбар къысхуэфӀуэтар? АдэкӀэ пищащ: «Тхьэм и нэфӀ къыпщыхуэ, си щӀалэ!»

30ПӀащӀэу ӀукӀыжащ Исуф, сыт щхьэкӀэ жыпӀэмэ абы и къуэшым хуиӀэ лъагъуныгъэр къызэщӀэнати, ар хьэзырт къэгъыну; ар унэм щӀыхьэри щыгъащ унэ кӀуэцӀым. 31И напэр итхьэщӀыжри къыщӀэкӀыжащ, зиубыдыжри жиӀащ:

– Къэфхь шхыныр.

32Къыхуахьащ абы щхьэхуэу, абыхэми щхьэхуэу, абыхэм къадэшхэ мысыр цӀыхухэми щхьэхуэу: мысыр цӀыхухэр ядэшхэ хъуркъым журтым; ар цӀапӀагъэщ мысыр цӀыхухэм дежкӀэ. 33ЩытӀысащ зэшхэр абы и пащхьэм, нэхъыжьыр езым и ныбжьым елъытауэ, нэхъыщӀэри езым и нэхъыщӀагъэм елъытауэ, а цӀыхухэр зыр адрейм фӀэгъэщӀэгъуэныжу зэхэст. 34Исуф езым и Ӏэнэм телъ шхыныгъуэхэм щыщ абыхэм къахуригъэхьырт; Биниамин и Ӏыхьэр тхукӀэ нэхъыбэт дэтхэнэми ейм нэхърэ. Арати, ефахэщ, икӀи дэгуфӀащ абы.

Currently Selected:

1 Мусэ 43: KbdNTGP2017

Highlight

Copy

Compare