1 Мусэ 42

Исуф и къуэш нэхьыжьхэр Мысырым зэрыкӀуар

1Арати, Екъуб къищӀащ Мысырым гъавэ зэрыщыӀэр, яжриӀащ Екъуб и къуэхэм:

– Сыт фызыпэплъэр?

2АдэкӀэ пищащ:

– Сэ зэхэсхащ Мысырым гъавэ щыӀэу; абы фыкӀуи, къыщытхуэфщэху гъавэ, шхын щхьэкӀэ дымылӀэн папщӀэ.

3Исуф и къуэшипщӀыр кӀуащ Мысырым, гъавэ къыщащэхуну. 4Ауэ Биниамин, Исуф и къуэшыр, игъэкӀуакъым Екъуб, зэкъуэшхэм я гъусэу; къыщымыщӀащэрэт зыгуэр, жери.

5КъэкӀуащ Израил и къуэхэр гъавэ ящэхуну, адрей къэкӀуахэм ящӀыгъуу; сыт щхьэкӀэ жыпӀэмэ Ханаан щӀыналъэм щыгъаблэт.

6АтӀэ Исуф щыӀэтащхьэтэкъэ а щӀыналъэм; ярищэрт абы щӀыналъэм и цӀыху псоми гъавэ. Исуф и къуэшхэр къакӀуэри, щхьэщэ къыхуащӀащ абы, щӀым нэсу. 7Исуф и къуэшхэр къилъагъури, къицӀыхужащ ахэр; ауэ ахэр къимыцӀыхужауэ фэ зытригъауэри, епсэлъащ абыхэм ткӀийуэ, мыр яжриӀащ:

– Дэнэ фыкъикӀа фэ?

– Ханаан щӀыналъэм, гъавэ къэтщэхуну, – жаӀащ абыхэм.

8Исуф къицӀыхужащ и къуэшхэр, ауэ езыхэм къацӀыхужакъым ар.

9Абдеж Исуф игу къэкӀыжащ езым абыхэм ятеухуауэ илъэгъуа пщӀыхьэпӀэхэр; яжриӀащ абыхэм:

– Фэ фытӀасхъэщӀэхщ; фэ фыкъэкӀуащ, мы щӀыналъэм и тӀасхъэхэр зэвгъэлъагъун папщӀэ.

10– Хьэуэ, ди зиусхьэн, – къыжраӀащ абыхэм Исуф, – уи унэӀутхэр къэкӀуащ гъавэ къащэхуну. 11Дэ псори зы цӀыхум дрикъуэщ; дэ пэжыгъэ зиӀэ дыцӀыхущ; уи унэӀутхэр щытакъым тӀасхъэщӀэхыу.

12– Хьэуэ, – яжриӀащ Исуф абыхэм, – фэ фыкъэкӀуащ, мы щӀыналъэм и тӀасхъэхэр зэвгъэлъагъун папщӀэ.

13– Дэ, уи унэӀутхэр, зэкъуэш пщыкӀутӀ дохъу, – жаӀащ абыхэм – дэ Ханаан щӀыналъэм щыщ зы лӀым дрикъуэщ, нэхъыщӀэр ди адэм и гъусэщ, ауэ зыр щыӀэжкъым.

14– Ар дыдэрщ сэри вжесӀар, – яжриӀащ абыхэм Исуф, – фэ фытӀасхъэщӀэхщ. 15Мис фэ фызэрызгъэунэхунур: фирхьэуным и цӀэмкӀэ тхьэлъанэ сощӀ мыбы фимыкӀыжыну, фи къуэш нэхъыщӀэр мыбы къэмыкӀуауэ. 16Фэ фщыщ зы вгъакӀуи, кърешэ абы фи къуэшыр; ауэ фэ хьэпсым фыщӀэсынущ. ИтӀанэ къыщӀэщынщ фэ жыфӀэр пэжрэ мыпэжрэ. Мыпэжмэ, фирхьэуным и цӀэмкӀэ тхьэлъанэ сощӀ фэ фытӀасхъэщӀэхыу.

17ИкӀи яритащ ахэр хъумакӀуэхэм махуищ пӀалъэкӀэ.

18ЯжриӀащ Исуф абыхэм ещанэ махуэм:

– Мыращ фщӀэнур, псэууэ фыкъэнэну фыхуеймэ; сыт щхьэкӀэ жыпӀэмэ сэ сыщошынэ Тхьэм. 19Фэ пэжыгъэ зиӀэ фыцӀыхумэ, фэ фщыщу фи зы къуэшыр щрыраӀыгъ фэ фыздыщӀаубыда хьэпсым, ар къренэ; мыдрейхэр фыкӀуэж, фшэ гъавэ, фи унагъуэхэр зэрымэжэщӀалӀэм папщӀэ. 20ИтӀанэ фи къуэш нэхъыщӀэр къысхуэфшэ, фи псалъэхэр пэж хъун, фэри фымылӀэн папщӀэ.

Апхуэдэуи ящӀащ абыхэм.

21ЖаӀэрт абыхэм мыпхуэдэу:

– ИпэжыпӀэкӀэ, дэ допшыныж ди къуэшым етщӀэгъа гуэныхьыр. Дэ тлъагъурт абы и псэм телъ хьэзабыр, ар дэ къыщыдэлъэӀум, ауэ дедэӀуакъым. Абы папщӀэ къытлъысащ мы тхьэмыщкӀагъэр.

22Рубэн абыхэм яжриӀащ:

– ВжесӀатэкъэ сэ «НыбжьыщӀэм и гуэныхь къэвмыхь» жысӀэри? Ауэ фэ фыдэӀуакъым; иджы абы и лъыр дагъэпшыныж.

23Ауэ ящӀэртэкъым абыхэм жаӀэр Исуф къызэрыгурыӀуэр; сыт щхьэкӀэ жыпӀэмэ абыхэм я кум тэрмэш дэтт. 24Абдеж абыхэм ябгъэдэкӀуэтри, гъащ Исуф. ИтӀанэ къабгъэдыхьэжри, епсэлъащ абыхэм, итӀанэ абыхэм Симеон къахишри, псоми ялъагъуу япхыну унафэ ищӀащ.

25АдэкӀэ унафэ ищӀащ Исуф абыхэм я къэпхэм гъавэр из хуащӀыну, щхьэж и дыжьынри къэпхэм хуралъхьэжыну, гъуэмылэ куэди иратыну. Апхуэдэуи хуащӀащ абыхэм.

26Я гъавэр я шыдхэм тралъхьэри ежьэжащ ахэр. 27Абыхэм ящыщ зым и къэпыщхьэр щитӀатэм, жэщым зыщагъэпсэхум шыдым Ӏус иритын папщӀэ, къилъэгъуащ езым и дыжьыныр и къэпым зэрилъыр, гъавэм и щӀыӀукӀэ. 28ЯжриӀащ абы и къуэшхэм:

– Си дыжьыныр къызатыжащ; ар къэпым илъщ, гъавэм и щӀыӀукӀэ.

Къэгузэващ ахэр, мыпхуэдэу жаӀэрт абыхэм, шынауэ:

– Сыт Тхьэм мы къыдищӀар?

29КъэкӀуэжащ ахэр я адэ Екъуб деж, Ханаан щӀыналъэм, абы хуаӀуэтэжащ къащыщӀа псори, мыр жаӀэурэ:

30– А щӀыналъэм щыӀэтащхьэр ткӀийуэ къыдэпсэлъащ, а щӀыналъэм и тӀасхъэ щӀэтхыну дыкӀуауэ жиӀэри. 31Дэри абы жетӀащ: «Дэ пэжыгъэ зиӀэ дыцӀыхущ; дытӀасхъэщӀэхкъым. 32Дэ зэкъуэш пщыкӀутӀ дохъу, ди адэм и къуэхэр; зыр щыӀэжкъым, нэхъыщӀэр ди адэм и гъусэу Ханаан щӀыналъэм щыӀэщ». 33КъыджиӀащ а щӀыналъэм и Ӏэтащхьэм итӀанэ: «Мис мыпхуэдэущ сэ къызэрысщӀэнур фэ фыцӀыху пэжрэ мыпэжрэ: къысхуэвгъанэ фи къуэшхэм ящыщ зыр; фэ езыхэм къафщтэ гъавэ фи унагъуэхэр зэрымэжэщӀалӀэм папщӀи, фыкӀуэж; 34ИкӀи къысхуэфшэ фи къуэш нэхъыщӀэр; сэ абыкӀэ къэсщӀэнщ фэ фызэрымытӀасхъэщӀэхыр, атӀэ пэжыгъэ зиӀэ цӀыхуу фызырыщытыр; фи къуэшыр фэстыжынщи, хъунущ фэ фыщылажьэ мы щӀыналъэм».

35Абдеж абыхэм я къэпхэр къыщаунэщӀым, щхьэж и къэпым илъщ я дыжьын зэкӀуэцӀыпхахэр. Я дыжьын зэкӀуэцӀыпхахэр зэшхэми абыхэм я адэми щалъагъум, къэшынащ.

36Екъуб, абыхэм я адэм, яжриӀащ и къуэхэм:

– Фэ сӀэщӀэфхащ си сабийхэр: Исуф щыӀэжкъым; Симеони щыӀэжкъым; Биниамини сӀэщӀэфхыну фыхуейщ – а псор сшэчын хуей сэ!

37Рубэн и адэм мыпхуэдэу жриӀащ:

– УкӀ си къуитӀыр, сэ ар къыщыпхуэзмышэжкӀэ; къилъхьэ ар си ӀэмыщӀэ; сэ къыпхуэсшэжынщ ар.

38– НэкӀуэнукъым си къуэр фи гъусэу, – жиӀащ абы, – сыт щхьэкӀэ жыпӀэмэ абы и къуэшыр лӀэри, а зырщ къэнэжар. Иджы фэ фызытехьэну гъуэгум абы насыпыншагъэ къыщыщыщӀмэ, фэ фи лажьэкӀэ сэ, зи щхьэц тхъуа лӀыжьыр, гуауэм хьэдрыхэ сихьынущ.

Currently Selected:

1 Мусэ 42: KbdNTGP2017

Highlight

Copy

Compare