1 Мусэ 30

1Рахэл Екъуб сабий къызэрыхуимылъхуфыр къыщилъагъум, езым и шыпхъум ефыгъуэри, жриӀащ Екъуб:

– Къызэт бынхэр; къызумытмэ, сылӀэнущ.

2Екъуб Рахэл хуэгубжьри, жиӀащ:

– Сэ сыхъуа уи кӀуэцӀым зыри ирезымыгъащӀэ Тхьэ?

3– Мис си унэӀут бзылъхугъэ Билхьэ, – жиӀаш Рахэл, – щӀыхьэ абы деж: щрелъхуэ си лъэгуажьэхэм деж ар, абы къилъхуауэ сэри бынхэр сиӀэн папщӀэ#30:3 апхуэдэ гъуэгукӀэ Рахэл сабий иӀэ мэхъу..

4Арати, иритащ абы Билхьэ, езым и унэӀут бзылъхугъэр, абы игъэфызыну; Екъуб щӀыхьащ абы деж. 5Билхьэ уэндэгъу хъури, Екъуб къыхуилъхуащ къуэ.

6Абы щыгъуэ жиӀащ Рахэл:

– Хьэкум къысхуищӀащ сэ Тхьэм, – жиӀащ Рахэл, – си лъэӀур зэхихри, къызитащ къуэ.

Абы къыхэкӀыу фӀищащ абы цӀэуэ Дан#30:6 Дан – а цӀэм къикӀыр: хьэкум ищӀащ..

7Аргуэру лъэщыджэ хъуащ Билхьэ, Рахэл и унэӀут бзылъхугъэр, икӀи Екъуб къыхуилъхуащ къуэ етӀуанэр.

8– Бэнэныгъэ лъэщкӀэ си шыпхъум себэнри сытекӀуащ, – жиӀащ Рахэл.

Абы къыхэкӀыу фӀищащ абы цӀэуэ Нафталий#30:8 Нафталий – а цӀэм къикӀыр: бэнэныр..

9Леа езыр зэрымылъхуэжыр къыщилъагъум, и унэӀут бзылъхугъэ Зилпэ къищтэри, ар иритащ Екъуб игъэфызыну. 10Леа и унэӀут бзылъхугъэ Зилпэ къыхуилъхуащ Екъуб къуэ итӀанэ. 11ЖиӀащ абы щыгъуэ Леа:

– Си насыпым къихьащ.

Абы къыхэкӀыу фӀищащ абы цӀэуэ Гад#30:11 Гад – а цӀэм къикӀыр: насып..

12Леа и унэӀут бзылъхугъэ Зилпэ етӀуанэрейуи къуэ Екъуб къыхуилъхуащ.

13ЖиӀащ Леа:

– Гъуэгу махуэ сытеуващ; сыт щхьэкӀэ жыпӀэмэ насыпыфӀэкӀэ къызэджэнущ сэ бзылъхугъэхэр.

ИкӀи фӀищащ абы цӀэуэ Ащэр#30:13 Ащэр – а цӀэм къикӀыр: насыпыфӀэ..

14Реувен кӀуащ губгъуэм, гуэдзыр щыӀуахыж зэманым, губгъуэм къыщигъуэтри, къыхуихьащ ахэр Леа, езым и анэм. Рахэл Леа жриӀащ абдежым:

– Къызэт уи къуэм и мандрагорхэр#30:14 мандрагорхэр – уэндэгъу хъуным папщӀэ, цӀыхубзхэм къагъэсэбэпу щыта удз гуэрщ..

15Ауэ абы къыжриӀэжащ:

– УфӀэмащӀэу ара уэ си лӀыр зызэрыӀэщӀэбгъэхьар, иджы си къуэм и мандрагорхэри зыӀэщӀэбгъэхьэну ухэт?

– Апхуэдэу щыхъуакӀэ, – жиӀащ Рахэл, – ар мы жэщым уэ къыбдрегъуэлъ, уи къуэм и мандрагорхэм папщӀэ.

16Екъуб пщыхьэщхьэм губгъуэм къыщикӀыжам, Леа абы пежьэри, жриӀащ:

– КъыщӀыхьэ си деж; си къуэм и мандрагорхэмкӀэ укъэсщэхуащи.

Арати, дэгъуэлъащ Екъуб Леа а жэщым.

17Тхьэм зэхихащ Леа и лъэӀур, ар уэндэгъу хъури, къыхуилъхуащ Екъуб къуэ етхуанэр. 18ЖиӀащ абы щыгъуэ Леа:

– Тхьэм сэ си лӀым си унэӀут бзылъхугъэр зэрестам пэкӀуэр къызитыжащ.

Абы къыхэкӀыу фӀищащ абы цӀэуэ Иссашкар#30:18 Иссашкар – а цӀэм къикӀыр: гуфӀапщӀэ..

19Леа аргуэру уэндэгъу хъури, къыхуилъхуащ Екъуб къуэ еханэр.

20ЖиӀащ абы щыгъуэ Леа:

– Тхьэм къызитащ тыгъэ гъуэзэджэ; иджы си лӀым щӀыхь къысхуищӀынущ, сыт щхьэкӀэ жыпӀэмэ къыхуэслъхуащ абы къуих.

Абы къыхэкӀыу фӀищащ абы цӀэуэ Зэбулун#30:20 Зэбулун – а цӀэм къикӀыр: тыгъэ, саугъэт..

21ИтӀанэ къилъхуащ пхъу икӀи фӀищащ абы цӀэуэ Динэ.

22Тхьэм игу къэкӀыжащ Рахэл, ар Тхьэм зэхихри лъхугъэ иӀэну Ӏэмал къритащ. 23Ар уэндэгъу хъури, къилъхуащ къуэ, икӀи жиӀащ:

– Сщхьэщихащ Тхьэм си емыкӀур.

24ИкӀи фӀищащ абы цӀэуэ Исуф#30:24 Исуф – а цӀэм къикӀыр: нэгъуэщӀ кърет..

– Зиусхьэным сэ къызрет иджыри къуэ, – жиӀэри.

Екъуб Лабан зэрэхуэлэжьамрэ бей зэрыхъуамрэ

25Рахэл Исуф къилъхуа нэужь, Екъуб Лабан жриӀащ:

– СутӀыпщыжи, сыкӀуэжынщ сэ си щӀыпӀэм, си щӀыналъэм. 26Къызэтыж сэ сыщӀыпхуэлэжьа си фызхэмрэ си бынхэмрэ, сэ сыкӀуэжынщ; уэ ущыгъуазэщ сэ фӀыуэ сызэрыпхуэлэжьам.

27Лабан къыжриӀащ абы:

– НэфӀкӀэ укъызэплъмэ, мыр жысӀэну хуит сыщӀ. Сэ джэш дзынымкӀэ зэзгъэщӀащ уи хьэтыркӀэ Зиусхьэным и нэфӀ къызэрысщыхуам.

28АдэкӀи жиӀащ:

– Уэстыну пщӀэр уэ зыхуэгъэувыжи, сэ уэстынщ.

29– Уэ уощӀэ сэ сызэрыпхуэлэжьа щӀыкӀэри сэ сапэрыту уи Ӏэщыр зэрыбэгъуари, – жриӀащ Екъуб абы. 30– Си япэкӀэ мащӀэ фӀэкӀа уимыӀамэ, иджы хъуащ куэд; сэ дэнэ сыкӀуами, Зиусхьэным и нэфӀ къыпщигъэхуащ; ауэ сыт щыгъуэ сэ сыщыхуэлэжьэнур си унагъуэм?

31– Сыт уэстын? – къеупщӀащ Лабан.

– Зыри къызумыт, – жиӀащ Екъуб. – Сэ жыхуэсӀэр къысхуэпщӀэмэ, аргуэру пхуэзгъэхъунщ икӀи пхуэсхъумэнщ уи мэлхэри уи бжэнхэри. 32Сэ сыпхрыкӀынщ нобэ уи мэл, бжэн хъушэм; къыхэгъэкӀ абы мэлу бжьыгъэ зыхэлъри къуэлэнри, мэлхэм ящыщу мэл фӀыцӀэри, апхуэдэуи бжэнхэм ящыщу бжьыгъэ зыхэлъри къуэлэнри. Апхуэдэ Ӏэщыр схурехъу сэ лэжьапщӀэ. 33ИтӀанэ си лэжьапщӀэм уеплъыну укъыщыкӀуэ нэгъуэщӀ зэманым деж си захуагъэр нэрылъагъу щыхъунщ уи пащхьэм деж. Бжьыгъэ зыхэмылъ е мыкъуэлэн бжэнхэм, мэлхэм ящыщу мыфӀыцӀэу сиӀэр къэдыгъуащ.

34– Хъарзынэщ, ирехъу уэ зэрыжыпӀауэ, – жиӀащ Лабан.

35АрщхьэкӀэ къыхигъэкӀащ Лабан а махуэм ажэ къуэлэнхэмрэ бжьыгъэ зиӀэхэмри, бжэну бжьыгъэ зыхэлъхэри къуэлэнхэри, хужь тӀэкӀу фӀэкӀа зыхэмыт псори, мэл фӀыцӀэ псори, икӀи яӀэщӀилъхьащ езым и къуэхэм. 36Езымрэ Екъубрэ я зэхуакум махуищ гъуэгу я зэпэжыжьагъыу игъэуващ. Екъуб игъэхъурт Лабан и адрей Ӏэщ цӀыкӀухэр.

37Екъуб щиху, миндал, тхушэ чы цӀынэ цӀыкӀухэр къищтэри, къуэлэн кусэхэр яхуищӀащ, чы цӀыкӀухэм ятелъ фэр трихри; 38А чы дэбзыкӀахэр Ӏэщхэр псы ефэну къыздекӀуалӀэ хьэкхъуафэхэм ирилъхьащ. Абдеж псафэ къыщыкӀуэкӀэ, Ӏэщхэр щызэкӀуалӀэу я хабзэт. 39Чыхэм я пащхьэм щызэкӀуалӀэрти, къалъхурт Ӏэщ къуэлэни, ӀэпапӀэ зыхэти, бжьыгъэ зиӀи. 40Екъуб щынэхэр къыхигъэкӀырти, и былымхэр Лабан и Ӏэщ къуэлэнымрэ и Ӏэщ фӀыцӀэмрэ я пэ зэкӀуэлӀэнухэм папщӀэ къригъэувэрт;

Екъуб иӀыгът езым и хъушэхэр щхьэхуэу, яхигъэхьэртэкъым ахэр Лабан и Ӏэщым. 41Ӏэщ гуащӀафӀэр щыхуажэкӀэ, Екъуб сыт щыгъуи ирилъхьэрт чыхэр хьэкхъуафэм, Ӏэщхэм ялъагъуу, чыхэм я пащхьэм ахэр щызэкӀуэлӀэн папщӀэ. 42Ауэ Ӏэщ къарууншэхэр щыхуажэм деж чы игъэтӀылъыртэкъым. Апхуэдэуи лъысырт Ӏэщ къарууншэхэр Лабан, Ӏэщ гуащӀафӀэхэр Екъуб. 43Арати, хъуащ Екъуб икъукӀэ, икъукӀэ бей, иӀэт абы Ӏэщ цӀыкӀу куэди, унэӀут бзылъхугъэ, хъулъхугъэ куэди, махъшэ куэди, шыд куэди.

Currently Selected:

1 Мусэ 30: KbdNTGP2017

Highlight

Copy

Compare