1 Мусэ 29
29
Екъуб Рахэл зэрыхуэзар
1Екъуб тэджщ и гъуэгу техьэжри, къуэкӀыпӀэм и цӀыхухэм я щӀыналъэм кӀуащ. 2Къилъэгъуащ абы губгъуэм псыкъуий иту, Ӏэщ цӀыкӀуу хъушищи абы и гъунэгъуу щытщ; а псыкъуийм кърахыурэ псы ирагъафэрт хъушэхэр. Псыкъуийм щхьэщылът мывэшхуэ. 3Абдежым хъушэ псори щызэхуэса нэужь, псыкъуийм мывэр къытрагъэукӀуриикӀырти, мэлхэр псы ирагъафэрт Ӏэщыхъуэхэм; итӀанэ аргуэру мывэр тралъхьэжырт псыкъуийм.
4– Си къуэшхэ! Дэнэ фыщыщ? – еупщӀащ Екъуб абыхэм.
– Дэ Харан дыщыщщ, – жаӀащ абыхэм.
5– ФцӀыхуу пӀэрэ фэ Нахъор и къуэ Лабан? – еупщӀащ абыхэм.
– ДоцӀыху, – жаӀащ абыхэм.
6– Узыншэу пӀэрэ ар? – аргуэру еупщӀащ абыхэм.
– Уыншэщ, – жаӀащ абыхэм, – Рахэл, абы и пхъур, къокӀуэ мэлхэм я гъусэу.
7– Махуэр иджыри кӀыхьщ, – яжриӀащ Екъуб Ӏэщыхъуэхэм, – хъуакъым Ӏэщ къехулӀэжыгъуэ; мэлхэр псы евгъафи, фыкӀуэ, вгъэхъу.
8– Ар тхузэфӀэкӀынукъым, хъушэ псори къызэхуэмысу, мывэри псыкъуийм къытрамыгъэукӀуриикӀыу, – жаӀащ мыдрейхэм. – ИтӀанэ мэлхэр псы едгъэфэнщ.
9Иджыри ар епсалъэрт абыхэм, Рахэл и адэм и мэлхэм яхэту къыщыӀухьам, абы ахэр игъэхъурт. 10Екъуб, и анэм и дэлъху Лабан ипхъу Рахэлрэ и анэм и дэлъху Лабан и мэлхэмрэ къыщилъагъум, кӀуэщ, мывэр псыкъуийм къытригъэукӀуриикӀри псы иригъэфащ и анэм и дэлъху Лабан и мэлхэр.
11ИтӀанэ Екъуб ба хуищӀащ Рахэл, зригъэӀэтащ абы и макъым, икӀи къэгъащ. 12Екъуб Рахэл жриӀащ ар абы и адэм зэриӀыхьлыр, Ребеккэ зэрикъуэр. Модрейр жэри, жриӀэжащ ар и адэм.
13Лабан, и шыпхъум и къуэ Екъуб и хъыбар щызэхихым, жэрыгъэкӀэ абы къыпежьащ, ӀэплӀэ, ба къыхуищӀри щӀишащ и унэм; мыдрейми и хъыбар псори Лабан хуиӀуэтэжащ. 14Лабан къыжриӀащ абы:
– ИпэжыпӀэкӀэ, уэ си къупщхьэми силми ущыщщ.
Арати, щыпсэуащ абы деж Екъуб мазэ псэукӀэ.
Екъуб Леарэ Рахэлрэ къызэришар
15Лабан Екъуб жриӀащ итӀанэ:
– Дауэ хъун уэ пщӀэншэу укъысхуэлажьэу, узэрызиӀыхьлым щхьэкӀэ? КъызжеӀэ, сыт лэжьапщӀэу уэстын?
16Лабан иӀэт пхъуитӀ; нэхъыжьым и цӀэт Леа; нэхъыщӀэм и цӀэр Рахэлт. 17Леа набгъэт, ауэ Рахэл ипкъкӀи зэкӀужт, и нэкӀукӀи дахэт. 18Екъуб Рахэл егуэкӀуати, жиӀащ:
– Сэ сыпхуэлэжьэнщ илъэсиблкӀэ, уипхъу нэхъыщӀэ Рахэл папщӀэ.
19– Ар уэ уэстмэ, нэхъыфӀщ нэгъуэщӀ гуэрым ест нэхърэ – жиӀащ Лабан, – щыпсэу си деж.
20Арати, Екъуб лэжьащ Рахэл папщӀэ илъэсиблкӀэ; ауэ ахэр абы къыщыхъуащ махуэ зыбжанэу, сыт щхьэкӀэ жыпӀэмэ абы ар фӀыуэ илъэгъуат.
21ИтӀанэ жриӀащ Екъуб Лабан:
Къызэт си фызыр; къэсащ абы деж сыщыщӀыхьэн хуей пӀалъэр.
22Лабан а щӀыпӀэм щыпсэу цӀыху псори зэхуишэсри, ищӀащ хьэгъуэлӀыгъуэ. 23Пщыхьэщхьэм Рахэл и пӀэкӀэ ипхъу Леа хущӀишащ абы, игъапцӀэри; щӀыхьащ абы деж Екъуб. 24Лабан езым и унэӀут бзылъхугъэ Зилпэ иритащ езым ипхъу Леа, абы хуэӀуэхутхьэбзэщӀэну.
25Пщэдджыжьым ар Леау къыщӀэкӀащ.
Арати, Екъуб жриӀащ Лабан:
– Сыт уэ къызэпщӀар? Рахэл папщӀэкъэ сэ сыщӀыпхуэлэжьар? Сыт уэ сыкъыщӀэбгъэпцӀар?
26– Дэ ди щӀыпӀэм щыхабзэкъым нэхъыжьым и пэ нэхъыщӀэр ирагъашэу, – жиӀащ Лабан. – 27ИрекӀ мы тхьэмахуэр; итӀанэ уэттынщ нэхъыщӀэри, иджыри илъэсиблкӀэ укъызэрысхуэлэжьэнум и пщӀэу.
28Екъуб апхуэдэуи ищӀащ; ирихьэкӀащ а тхьэмахуэр. ИтӀанэ Лабан къритащ абы ипхъу Рахэл фызу. 29Лабан иритащ ипхъу Рахэл и унэӀутыну езым и унэӀут бзылъхугъэ Билхьэ. 30Екъуб щӀыхьащ Рахэл деж. Леа нэхърэ нэхъыфӀу илъагъурт абы Рахэл; икӀи хуэлэжьащ Лабан аргуэру илъэсиблкӀэ.
Екъуб и къуэхэр
31Зиусхьэным Екъуб Леа фӀыуэ къызэримылъагъум гу лъитэри, зэӀуихащ абы и кӀуэцӀыр, мыдрей Рахэл лъхуэртэкъым. 32Леа уэндэгъу хъури къилъхуащ къуэ, фӀищащ абы цӀэуэ Рубэн#29:32 Рубэн – пасэрей журтыбзэкӀэ абы къикӀыр: еплъ щӀалэ.; сыт щхьэкӀэ жыпӀэмэ жиӀащ абы:
– Зиусхьэныр къеплъащ си тхьэмыщкӀагъэм; иджы фӀыуэ силъагъунущ си лӀым.
33Аргуэру лъэщыджэ хъури, къилъхуащ къуэ, икӀи жиӀащ:
– Сэ фӀыуэ си лӀым сыкъызэримылъагъур Зиусхьэным зэхихати, къызитащ мыри.
ФӀищащ абы цӀэуэ Симеон#29:33 Симеон – пасэрей журтыбзэкӀэ абы къикӀыр: зэхэпхын..
34Аргуэру лъэщыджэ хъури, къилъхуащ къуэ.
– АтӀэ иджы сэ къыскӀэрыпщӀэнущ си лӀым и гур; сэ абы къыхуэслъхуащ къуищ, – жиӀащ абы
Абы къыхэкӀыу абы фӀащащ цӀэуэ Лэуий#29:34 Лэуий – пасэрей журтыбзэкӀэ абы къикӀыр: игукӀэ кӀэрыпщӀэн..
35Аргуэру лъэщыджэ хъури, къилъхуащ къуэ.
– АтӀэ иджы щытхъу хуэсӀэтынщ Зиусхьэным, – жиӀащ абы.
Абы къыхэкӀыу фӀищащ абы цӀэуэ Иудэ#29:35 Иудэ – пасэрей журтыбзэкӀэ абы къикӀыр: щытхъу..
Абдеж щигъэтыжащ лъхуэн.
Currently Selected:
1 Мусэ 29: KbdNTGP2017
Highlight
Copy
Compare
Share
Want to have your highlights saved across all your devices? Sign up or sign in
© Библиер зэдзэкӀыным елжь Институт, 1993, 2007, 2011, 2017
