Roman 6

Pə̀ənə̀ chyə̂ pɨ̀tɨ̀ŋnə̀ ntii nɨ̀pwuutə̀ ɨ̀wə̀ənə̀ pɨ Yěsû

1Pə̀ənə̀ tyiʼə̀ nshwəŋə̀ lə lo àkə? Lo pə̀ənə̀ làŋə̀ nɨ mbyə̀ ntə ngɨ̀rə̀ a tɨ̀pòŋə̀ mbə̀ʼə àpòŋə̀ ntɨŋmə̀ Nẅùə̀ â kẅìʼnə̀ ndèrə̀ nɨ mbyə̀. 2Mbə̀ʼə a pə e a lenə apə̀! Pə̀ənə̀ kwɨghə̀ ngwaʼà a tɨ̀pòŋə̀, mbə̀ʼə pə̀ənə̀ chi ndàŋə̀ nɨ mbyə̀ nchi nchyə̂ amwuə tɨ̀pòŋə̀ lə ɨla? 3Kə̀ ka nɨ̀ zhyə̂ a wɨghə lo pə̀ənə̀ pa pɨ̀tsùmə̀ nɨ pɨ lə̀ ŋânə a wə̀ənə̀ nɨ àkẅiirə̀ nchyə aŋunə nɨ̀linə̀ nɨ Yěsû mbwuutə̀ a wə̀ənə̀ pɨ pobə, pa amwuə nɨ̀wɨghə̀ e? 4Lenəla nkwùə̀ nɨ pə̀ənə̀ lə̀ kẅiirə̀nə nchyə, pɨ lə̀ tẅəŋə̀ a wə̀ənə̀ pɨ pobə amwuə nɨ̀wɨghə̀ e. Tyìʼə̀ tsaʼnə pɨ lə̀ pə̀ʼkə̀nə a Kristù aŋunə nɨ̀wɨghə̀ ndàŋə̀ a ndzùmə̀ mɨ̀tɨ̀ŋnə̀ mɨ Tǎ mɨ̀ẅùunə la, mbə̀ʼə pə̀ənə̀ kɨ nchyə̂ a nɨ̀chyə̂mbyə̂ ghù shwuə̀. 5Ntiinə pə̀ənə̀ tə kwɨghə̀ tyìʼə̀ tsaʼnə à lə̀ kwɨghə̀nə àze, yi a tyìʼə̀ ndəŋə ndəŋə lo pə̀ənə̀ ghǎ kɨ zhwuumə̀ a nɨ̀wɨghə̀ tyìʼə̀ tsaʼnə à lə̀ zhwuumə̀nə àze. 6Pə̀ənə̀ zhyə̂ lo pɨ lə̀ kẅùumə̀ mbɨ̀ŋmə̀ ɨ̀zəənə̀ yɨ̀ ndwùnə̀ aŋunə àtɨ̀ghə pànkə̀nə pə̀ənə̀ pɨ Kristù, ntsə̀ŋə̀ mbɨ̀ŋmə̀ tɨ̀pòŋə̀ za lo mbə̀ʼə pə̀ənə̀ kaŋə chi pə ɨ̀pùʼù ɨ̀nwùə̀ tɨ̀pòŋə̀. 7Ntiinə nkwùə̀ nɨ ŋwùə̀ à kwɨghə̀nə la, Nẅùə̀ a kyàatə̀ mɨnkirə mɨ ɨ̀nwùə̀ tɨ̀pòŋə̀ aŋunə ze. 8A tə pə lo pə̀ənə̀ kwɨghə̀ pə̀ənə̀ pɨ Kristù, yi pə̀ənə̀ pyiimə̀ lo pə̀ənə̀ ghǎ kɨ chyə̂ pə̀ənə̀ pɨ pobə, 9ntiinə pə̀ənə̀ zhyə̂nə lo tsaʼnə Kristù a lə̀ zhwuumə̀ a nɨ̀wɨghə̀ la, mbə̀ʼə a gha nchi nkwɨghə̀ e apə̀; nɨ̀wɨghə̀ a kɨ nchi mbə e nɨ mɨ̀tɨ̀ŋnə̀ mɨ̀tse a mbɨ̀ŋmə̀ ɨ̀ze apə̀. 10Nɨ̀wɨghə̀ nɨ à lə̀ kwɨghə̀nə la, a lə̀ pə a nɨ tsə̀ŋə̀ a tɨ̀pòŋə̀ nɨ nkuŋə̀. Nɨ̀chyə̂mbyə̂ nɨ a pənə nɨ ẅèrə a pə a nɨ chyə̂ pobə pɨ Nẅùə̀. 11Nɨ ndwuumə̀ wə̀, nɨ̀ shaŋə̀ ɨ̀pɨ̀ŋmə̀ ɨ̀wɨghə lo nɨ kwɨghə̀ mə amwuə tɨ̀pòŋə̀, ntyiʼə̀ nkɨ mbə pɨ̀tɨ̀ŋnə̀ pɨghə pɨ Nẅùə̀ ndàŋə̀ a ndzùmə̀ Kristù Yěsû.

12Lenəla, kò nɨ̀ pyiimə̀ a wɨghə lo tɨ̀pòŋə̀ â puʼtə̀ mbòbə̀ mbɨ̀ŋmə̀ za nɨ ɨ̀ ghǎ kwɨghə̀ la mbə̀ʼə nɨ̀ kaŋə tə zùŋə̀ ɨ̀pwuumə̀ tɨ̀pòŋə̀ pa nɨ mbòbə̀ mbɨ̀ŋmə̀ ɨ̀ tàʼnə la. 13Kò nɨ̀ myàʼtə̀ a wɨghə alaamə mbɨ̀ŋmə̀ àzɨghə yètse ambo ɨ̀nwùə̀ tɨ̀pòŋə̀ a tyiʼə̀ mbə tsaʼa àzwuumə̀ àfàʼà ntɨŋmə̀ ghù shyə. Nɨ̀ ŋâ mbɨ̀ŋmə̀ ɨ̀zɨghə ambo Nẅùə̀ tsaʼa pànə̀ nɨ pɨ fuukə̀ mə a ghobə amwuə nɨ̀wɨghə̀ pobə kwuunə̀ amwuə nɨ̀chyə̂mbyə̂. Nɨ̀ ŋâ ɨlaamə mbɨ̀ŋmə̀ ɨ̀pɨghə ambo Nẅùə̀ mbə̀ʼə a lòo aŋunə ɨ̀pwuumə̀ àfàʼà mɨ̀nwùə̀ mɨ təəmə̀nə. 14Mbə̀ʼnə tɨ̀pòŋə̀ a laʼa mbə e nɨ mɨ̀tɨ̀ŋnə̀ a nɨ puʼtə̀ a wɨghə apə̀, ntiinə ka nɨ̀ pə wɨghə a ɨ̀sùmə mbòomə; nɨ̀ chyə̂ pə a ɨ̀sùmə àpòŋə̀ ntɨŋmə̀ Nẅùə̀.

Ɨ̀pùʼù mɨ̀nwùə̀ mɨ təəmə̀nə

15Pə̀ənə̌ tyiʼə̀ shwəŋə̀ lə̀ lo àkə? Pə̀ənə̌ tə ghɨ̀rə̀ a tɨ̀pòŋə̀ ntiinə ka pə̀ənə̀ pə a wə̀ənə̀ a ɨ̀sùmə mbòomə la mbə pə a ɨ̀sùmə àpòŋə̀ ntɨŋmə̀ Nẅùə̀? A pə e a lenə apə̀! 16Ka nɨ̀ zhyə̂ a wɨghə lo nɨ̀ tə ŋâ mbɨ̀ŋmə̀ ɨ̀zɨghə ambo ŋwùə̀ ndzuʼnə̀ e, nɨ̀ tyiʼə̀ la ɨ̀pùʼù ambo ze? Nɨ̀ ŋâ ɨ̀pɨ̀ŋmə̀ ɨ̀wɨghə ambo tɨ̀pòŋə̀ a tô nɨ nɨ̀wɨghə̀, kə̀ ambo nɨ̀zuʼnə̀ a ghɨ̀rə̀ mɨ̀nwùə̀ ɨ̀mɨghə təəmə̀ a mbyə̀ Nẅùə̀. 17La mɨyàa ambo Nẅùə̀ ntiinə pɨghə pa nɨ nɨ̀ lə̀ pə mə nkwùə̀ ɨ̀tse mbə ɨ̀pùʼù ɨ̀nwùə̀ tɨ̀pòŋə̀ la; nɨ̀ tyiʼə̀ ndzuʼnə̀ ɨ̀nwùə̀ pa nɨ pɨ lə̀ nèrə̀nə a wɨghə la nɨ ntɨŋmə̀ ɨ̀wɨghə ɨ̀tsùmə̀. 18Lenəla, pɨ kyàatə̀ mə mɨnkɨrə mɨ mɨ̀nwùə̀ mɨ tɨ̀pòŋə̀ aŋunə pɨghə nɨ̀ tyiʼə̀ ɨ̀pùʼù ambo mɨ̀nwùə̀ mɨ təəmə̀nə. 19Ngwə̀ nshwəŋə̀ lə nɨ ɨ̀shwəŋnə̀ nɨ pànə̀ pa nshwəŋə̀ ntiinə mbòbə̀ mbɨ̀ŋmə̀ ɨ̀zɨghə porə̀nə. A lə̀ pə nkwùə̀ ɨ̀tse nɨ̀ ŋâ mbɨ̀ŋmə̀ ɨ̀zɨghə ambo ntsɨ̀ŋnə, ngɨ̀rə̀ a tɨ̀pòŋə̀ ndèrə̀ pə nɨ mbyə̀. Tɨ̀tsòŋə̀, nɨ̀ ŋâ mbɨ̀ŋmə̀ ɨ̀zɨghə tsaʼa ɨ̀pùʼù ambo mɨ̀nwùə̀ mɨ təəmə̀nə mbə̀ʼə tsùŋə̀ pànə̀ pɨ Nẅùə̀ pyə̀ nɨ pobə pa ngɨ̀rə̀ mɨ̀nwùə̀ mɨ təəmə̀nə. 20Nkwùə̀ nɨ nɨ̀ lə̀ pənə ɨ̀pùʼù ɨ̀nwùə̀ tɨ̀pòŋə̀ la, ka nɨ̀ lə̀ pə wɨghə nɨ ànwùə̀ àtse pɨghə pɨ ɨ̀nwùə̀ pɨ təəmə̀nə. 21Àpìi nɨ nɨ̀ lə̀ pənə nɨ zèrə aŋunə ɨ̀nwùə̀ tɨ̀pòŋə̀ nɨ nɨ̀ lə̀ ghɨ̀rə̀nə a lə̀ pə àkə tsaʼnə nɨ̀ wə̀ ntyiʼə̀ mbə nɨ ɨ̀sɨŋnə̀ aŋunə lə? Ɨ̀nwùə̀ pèrə pə pa ndòo la nɨ̀wɨghə̀ ntô nɨ ẅèrə. 22La tɨ̀tsòŋə̀ nɨ pɨ kyàatə̀ mə mɨnkɨrə mɨ ɨ̀nwùə̀ tɨ̀pòŋə̀ aŋunə pɨghə nɨ̀ tyiʼə̀ ɨ̀pùʼù Nẅùə̀ la, àpìi àzɨghə a pə lo nɨ̀ ghɨ̀rə̀ mɨ̀nwùə̀ mɨ təəmə̀nə, ntyiʼə̀ mbə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. 23Mbə̀ʼnə àpìi ànwùə̀ tɨ̀pòŋə̀ a nɨ̀wɨghə̀, la àzwuumə̀ nɨ Nẅùə̀ à wa ŋŋâ àfǐfǐ a pə nɨ̀chyə̂mbyə̂ wa nɨ à ghoŋə̀nə nɨ nkuŋə̀ ndàŋə̀ a ndzùmə̀ Kristù Yěsû Ndòʼnə̀mbyə̂ ɨ̀wə̀ənə̀.

Currently Selected:

Roman 6: pny

Highlight

Copy

Compare