Roman 7

Pàolò a mɨ̀nkə̀ ànwùə̀ moonə̀ Kristù pobə mbòomə nɨ̀zoʼò

1Pɨlyimə ɨ̀pâ, ǹkwàŋə̀ lo nɨ̀ zhyə̂ ànwùə̀ nɨ ǹtàʼnə a nɨ shwəŋə̀ ambo pɨghə, ntiinə pɨghə pɨ̀tsùmə̀ zhyə̂nə a mbòomə. Mbòomə à chyə̂ nɨ mɨ̀tɨ̀ŋnə̀ àtwuə̀ ŋònə̀ la nkwùə̀ nɨ à pirə̀nə ghù ntɨ̀ŋnə̀. 2Mə̀ngyə̌ nɨ à zoʼò mə, mbòomə à korə̀ e pobə ndwuumə̀ e nkwùə̀ nɨ ndwuumə̀ e à pirə̀nə ghù ntɨ̀ŋnə̀; la ndwuumə̀ e wa a kwɨghə̀ e mbòomə wa a chi ngẅìimə̀ e a ye apə̀. 3Lenəla, à tə ndzoʼò a ndwuumə̀ ghu nyàanə nkwùə̀ nɨ ndwuumə̀ e à pirə̀nə ghù ntɨ̀ŋnə̀, pɨ fuŋə̀ e nɨ ngàŋə̀ àfànə̀. La ndwuumə̀ e wa a kwɨghə̀, mbòomə a chi ngẅìimə̀ e a ye apə̀, a kɨ nchi mbə e ngàŋə̀ àfànə̀ apə̀, mbaa pə tsaʼnə à zoʼnə a ghùtse ndwuumə̀ la.

4Tsaʼnə a pənə a lenə la nɨ pɨlyimə ɨ̀pâ, nɨ̀ kwɨghə̀ mə ngwaʼà mɨ̀tɨ̀ŋnə̀ mɨ mbòomə ntiinə nɨ̀ tyiʼə̀ mbə taʼà ŋwùə̀ pɨghə pɨ mbɨ̀ŋmə̀ Kristù. Nɨ̀ chyə̂ mbə la ambo ze wa nɨ à lə̀ zhwuumə̀nə a nɨ̀wɨghə̀, njiilo pə̀ənə̀ pìʼnə̀ a nɨ fàʼà àfàʼà Nẅùə̀ ɨ̀shìʼnə̀. 5Mbə̀ʼnə nkwùə̀ za nɨ pə̀ənə̀ lə̀ mənə nchyə̂ tsaʼa pànə̀ pɨ mɨsoŋə la, ntoŋə a nɨ ghɨ̀rə̀ ànwùə̀ tɨ̀pòŋə̀ ɨ̀ lə̀ pə amwuə pə̀ənə̀, ntiinə ɨ̀nwùə̀ tɨ̀pòŋə̀ pa nɨ mbòomə à pə̀ʼkə̀nə mbòbə̀ mbɨ̀ŋmə̀ ɨ̀ kɨ mmə ntàʼà la lə̀ pə nfàʼà amwuə pə̀ənə̀, pə̀ənə̀ kɨ ntyiʼə̀ ngɨ̀rə̀ mɨ̀nwùə̀ nɨ mɨ lòonə a nɨ̀wɨghə̀ ndòo ntô nɨ ẅèrə. 6La tɨ̀tsòŋə̀, pə̀ənə̀ furə̀ mə amwuə mbòomə wa ntiinə pə̀ənə̀ kwɨghə̀ mə ngwaʼà mɨ̀nwùə̀ ma nɨ pə̀ənə̀ lə̀ pənə ɨ̀pùʼù aŋunə la, ka chi mə ghɨ̀rə̀ a wə̀ənə̀ mɨ̀nwùə̀ zùŋə̀ a mbòomə ghù ndwùnə̀ wa nɨ pɨ ŋwàʼnə̀nə la. Pə̀ənə̀ tyiʼə̀ ngɨ̀rə̀ mɨ̀nwùə̀ ndzùŋə̀ pə nɨ̀chyə̂mbyə̂ yɨ̀ shwuə̀ wa amwuə àzhwùə̀.

Mbòomə pobə ɨ̀nwùə̀ tɨ̀pòŋə̀

7Pə̀ənə̀ tyiʼə̀ nshwəŋə̀ lə lo àkə? Lo mbòomə la ànwùə̀ tɨ̀pòŋə̀? Ka a pə e a lenə! La mbòomə à lə̀ pə la ka pə e ghu, yi ka ndə̀ zhyə̂ mə̀ ànwùə̀ tɨ̀pòŋə̀. A nkǔŋə nkuŋə lo ndə̀ pə zhyə̂ mə̀ lo àghə̀ʼnə̀ a ànwùə̀ tɨ̀pòŋə̀ apə̀ mbə̀ʼə mbòomə à lə̀ pəla ngwaʼà e tɨ shwəŋə̀ lo “Kò wə̀ ghə̀ʼnə̀.” 8La tɨ̀pòŋə̀ a lòo ɨ̀sàanə̀ ghu nɨ mbòomə à ŋânə ngɨ̀rə̀ lo mbə nɨ ntoŋə a nɨ tàʼà mbuurə̀ àzwuumə̀ àtsùmə̀. Mbòomə à tə ka pə e ghu, yi tɨ̀pòŋə̀ a kwɨghə̀ mə. 9A lə̀ pə nkwùə̀ ɨ̀tse mbə ghù ntɨ̀ŋnə̀ tɨ mbòomə, la nkwùə̀ nɨ ntə̌ ɨ lə̀ tônə, tɨ̀pòŋə̀ à lə̀ pə̀ʼkə̀, ǹkwɨghə̀. 10Ntə̌ wa nɨ ɨ lə̀ pənə a nɨ lòo a nɨ̀chyə̂mbyə̂ ntô ambo mɨ̀ŋə̀, ɨ tyiʼə̀ ntô nɨ nɨ̀wɨghə̀. 11Mbə̀ʼnə tɨ̀pòŋə̀ à lə̀ zəənə̀ ɨ̀sàanə̀ ndàŋə̀ a ndzùmə̀ ntə̌ nfɨ̀kə̀ mə̀ nzhwuutə̀.

12Lenəla, mbòomə à laanə̀ mmyàanə̀, ntə̌ ɨ kɨ ndaanə̀, ntəəmə̀ nkɨ mbòŋə̀. 13A chyə̂ lə lo zhyə̀ za nɨ a pòŋə̀nə a lə̀ tyiʼə̀ ndòo a nɨ̀wɨghə̀ ntô aŋunə mɨ̀ŋə̀? Ka à pə e a lenə. A gha à lə̀ zhwuutə̀ tɨ̀pòŋə̀. Tɨ̀pòŋə̀ à lə̀ làŋə̀ a ndzùmə̀ àzwuumə̀ yè ɨ̀shìʼnə̀ ndòo nɨ̀wɨghə̀ ntô aŋunə mɨ̀ŋə̀. A lə̀ pə a lenə la mbə̀ʼə ntə̌ ɨ nèrə̀ lo tɨ̀pòŋə̀ a tyìʼə̀ ngotə àzwuumə̀ tɨ̀pòŋə̀.

Mɨ̀làʼà mɨ tɨ̀pòŋə̀ pobə ɨ̀pòŋə̀ amwuə ŋwùə̀

14Pə̀ənə̀ zhyə̂ lo Àzhwùə̀ Nẅùə̀ a ŋâ mbòomə, la m̀bə àfǐfǐ ŋwùə̀ nɨ pɨ shwùunə̀nə lo â pə àpùʼù ambo tɨ̀pòŋə̀. 15Ka ǹdanə nzhyə̂ mə̀ ànwùə̀ nɨ ngwə̀ ngɨ̀rə̀ ntiinə ka ngɨ̀rə̀ mə̀ ànwùə̀ nɨ ǹkòŋə̀nə lo ghɨ̀rə̀, la ǹgɨ̀rə̀ pə ànwùə̀ nɨ m̀bàanə̀nə. 16A tə mbə zhyə̀ nɨ ngɨ̀rə̀ ànwùə̀ nɨ ka nkòŋə̀ mə̀ lo ghɨ̀rə̀, yi mbyiimə̀ lo mbòomə a pòŋə̀. 17Njiilo ka ànwùə̀ ghu la a ghɨ̀rə̀ e mɨ̀ŋə̀. A ghɨ̀rə̀ tɨ̀pòŋə̀ nɨ a pənə amwuə mɨ̀ŋə̀ ngɨ̀rə̀ a zèrə. 18Nzhyə̂ lo ka ànwùə̀ yè ɨ̀shìʼnə̀ àtse a pə e amwuə mɨ̀ŋə̀ farə amwuə mbòbə̀ mbɨ̀ŋmə̀ mə. Mbaa pə tsaʼnə ǹkòŋə̀nə a nɨ ghɨ̀rə̀ ànwùə̀ nɨ a kùʼnə̀nə la, ka mbə mə̀ nɨ ɨ̀tɨ̀ŋnə̀ a nɨ ghɨ̀rə̀ a zèrə. 19Ka ǹgɨ̀rə̀ mə̀ ànwùə̀ ɨ̀shìʼnə̀ nɨ ǹtənə ntàʼà a nɨ ghɨ̀rə̀; La ǹgɨ̀rə̀ pə tɨ̀pòŋə̀ nɨ ka ǹkòŋə̀ mə̀ a nɨ ghɨ̀rə̀. 20Tɨ̀tsòŋə̀ wə̀, ǹtə ngɨ̀rə̀ ànwùə̀ zhyə̀ nɨ ka ǹkòŋə̀ mə̀ lo ghɨ̀rə̀, yi ka à ghɨ̀rə̀ e mɨ̀ŋə̀. La à ghɨ̀rə̀ e tɨ̀pòŋə̀ wa nɨ à pənə amwuə mɨ̀ŋə̀ ngɨ̀rə̀ a zèrə:

21Lenəla, ǹtyiʼə̀ ndzəənə̀ lo la àfàʼà mbòomə lo ǹgə̀ a nɨ ghɨ̀rə̀ ànwùə̀ ɨ̀shìʼnə̀, a tô e pə tɨ̀pòŋə̀ ambo mɨ̀ŋə̀ lo ngɨ̀rə̀. 22Amwuə ntɨŋmə̀ mə̀, ngwə̀ ngaʼà a nɨ ghɨ̀rə̀ ànwùə̀ nɨ mbòomə Nẅùə̀ a shwəŋə̀nə. 23La ngwə̀ ndzəənə̀ tsaʼnə mbòomə ghùtse à wə̀ nfàʼà amwuə mbɨ̀ŋmə̀ mə̀, ndzòŋnə̀ a mbòomə nɨ à pənə a ntɨŋmə̀ mɨ̀ŋə̀, ntyiʼə̀ ngɨ̀rə̀ mbə ngàŋə̀ ɨ̀tsaŋə̀ ambo mbòomə tɨ̀pòŋə̀ wa nɨ à pənə nfàʼà amwuə mɨ̀ŋə̀ la. 24Wə̂ ngəʼə̀ mə̀! A gha ǎ fuukə̀ ɨ̀wə̌ amwuə mbɨ̀ŋmə̀ zə̀ nɨ ɨ̀ ghǎ ghɨ̀rə̀ n̂kwɨghə̀ lə? 25Ngwə̀ ŋŋâ a mɨyàa ambo Nẅùə̀ ndàŋə̀ a ndzùmə̀ Yěsû Ndòʼnə̀mbyə̂ ɨ̀wə̀ənə̀.

Lenəla, tɨ̀tsòŋə̀ wə̀, amwuə ntɨŋmə̀ mə̀, nchyə̂ mbə la àpùʼù ambo mbòomə Nẅùə̀. La amwuə mbòbə̀ mbɨ̀ŋmə̀ mə̀, mbə àpùʼù ambo mbòomə tɨ̀pòŋə̀.

Currently Selected:

Roman 7: pny

Highlight

Copy

Compare