Kuen 24
24
1Kä min ci Bil-am ɛ ŋa̱c ɛn ɣöö nhɔk Kuoth Nhial puɔ̱th I-thɛ-rɛl, /kenɛ wä, ce̱t, kɛ min wen, duundɛ ɣöö cuɛ riet ni rɔ rɛy dɔaar. 2Kä cu Bil-am waŋdɛ kap nhial, cuɛ ji̱ I-thɛ-rɛl nɛn cikɛ pua̱t kɛ thuk duëli. Kä cu yiëë Kuɔth ben kä jɛ, 3kä cuɛ ruacdɛ lat wee i̱,
“Ruac Bil-am gat Bɛ-or,
ruac raam mi nën
waŋdɛ agɔaa,
4ruac raam mi liŋ ruac Kuɔth,
min nɛɛn nyuuth kä Kuoth in
leny buɔ̱mdɛ ti diaal,
pɛnkɛ piny, kä te.
5Kä ku ti̱ecku gɔɔydiɛn lɛ pa̱a̱r
kɛ ŋu lö Je-kɔb,
gua̱th tɔ̱ɔ̱cädu lö I-thɛ-rɛl!
6Ce̱tdɛ nikɛ waŋ mi wä raar,
ce̱tdɛ kɛ kak mi te
thok yiëër,
ce̱tdɛ nikɛ tɔaar mi ca pith
ɛ Kuoth Nhial,
ce̱tdɛ nikɛ luääl mi
te gekä yiëër.
7Kä bi lölikɛ tekɛ pi̱w,
kä bi bɛlkɛ tekɛ pi̱ ti ŋuan,
kä bi di̱t ni kuääriɛn kä Ä-gag,
kä ba kuääriɛn liak.
8Ci Kuoth Nhial kɛ ka̱m raar
kä I-jëp.
Kä tekɛ kɛ buɔ̱m mi
ce̱tkɛ buɔ̱m mök,
kä bikɛ ji̱ tɛ̈riɛn cam nhial,
kä bikɛ cɔ̱wkiɛn thor,
kä bi bääriɛn kɛ näk.
9La makɛ ce̱tkɛ lony,
kä bikɛ tɔ̱ɔ̱c,
ce̱tkɛ ŋuɔ̱ɔ̱t luɔny, mi thil
ram mi dëë jɛ jiɛc?
Ɛ puɔ̱th tekɛ ram ɔ ci ji̱ poth ɔ,
kä lam akɛ ramɔ ci ji̱ lam ɔ.”
10Kä cu Ba-lak kɛ̈c kɛ Bil-am, kä cuɛ tetkɛ pat kä cuɛ Bil-am jiök i̱, “Ɣän cɔalä ji̱ kɛ ɣöö bi ji̱ tɛ̈rä lam, kä nɛmɛ täämɛ ni kä diɔ̱ɔ̱k ci poth nikɛ. 11Kɛ kui̱c ɛmɔ täämɛ, ku wä ni wi̱i̱du. Ɣän cä wee i̱, ‘Dëë ji̱ cuɔ̱l mi gɔaa’ duundɛ ɣöö ci Kuoth Nhial ji̱ pen cut.” 12Kä cu Bil-am Ba-lak loc i̱, “/Ka̱nɛ la̱r ja̱a̱ŋku te ci jäk kä ɣä i̱, 13‘Cäŋ bi Ba-lak ɣä ka̱m dhɔrɛ a thi̱eŋ kɛ da̱a̱p kɛnɛ ciɛk in bo̱r, ɣän /cä ruac Kuɔth Nhial bi luäŋ kɛ ba̱l, cä mi gɔaa kiɛ mi jiäk bi la̱t kɛ wi̱cdä. Ɣän bä lat ni min ci Kuoth Nhial ɛ lar?’ ”
Ruac go̱o̱kä Bil-am in jɔak
14Kä ɣä, wa̱a̱ kä nɛɛkä ɛn täämɛ. Bër ɛ ji̱ la̱rä min bi nɛy ti ti jɛ lät kä nɛɛku ni̱ni tɔ̱ bëë tɔ̱. 15Kä cuɛ ruacdɛ lat wee i̱,
“Ruac Bil-am gat Bɛ-or
ruac raam mi nën
waŋdɛ agɔaa,
16ruac raam mi liŋ ruac Kuɔth,
min tekɛ ŋäc kä min
di̱t ni jɛn,
min nɛɛn nyuth kɛ min leny
buɔ̱mdɛ ti diaal,
min tɛth, kä te gui̱c.
17Cä nɛn, duundɛ ɣöö /ciɛ täämɛ.
Ɣän guɛcä jɛ, duundɛ ɣöö
/cɛ thia̱k.
Kä bi cier ben raar kä Je-kɔb,
lip pay ciëŋ bɛ ben
kä I-thɛ-rɛl.
Kä bɛ bööth Mo-ab dup.
Kä bɛ gaat ce̱t diaal
da̱k ni piny.
18Ba Ɛ-dɔm ciɛŋ, ɛ ji̱ tɛ̈rɛ,
duundɛ ɣöö bi I-thɛ-rɛl
kulɛ wä kɛ buɔ̱m.
19Kä bi rueec ben kä Je-kɔb,
kä bɛ duɔth kä tin tëk
wi̱c däk!”
20Kä cu Bil-am Ä-ma-lek guic, kä cuɛ ruacdɛ lat wee i̱,
“Ä-ma-lek ɛ do̱r in nhiam kä dör,
duundɛ ɣöö kɛ jɔak bɛ da̱k.”
21Kä cuɛ ji̱ Kɛɛn guic, kä cuɛ ruacdɛ lat wee i̱,
“Te gua̱th ciɛŋädu kɛ mal,
te duelu rɛy päämni.
22Kä ciɛ jɛn bä yɛn
ji̱ Kɛɛn bia da̱k,
kä bi A-cɛr yɛ kulɛ naŋ
ala pɛ̈ɛ̈c i̱di?”
23Kä cu Bil-am ruacdɛ lat wee i̱,
“Aɣ ɛŋa biku lɛ tëk ɔ mi wä
Kuoth Nhial nɛmɛ wä la̱t?
24Bi babuuri ben kä Ki-tim,
kä ba A-cɛr kɛnɛ E-bɛr ben ka̱n,
kä kɛn bikɛ da̱k bä.”
25Kä cu Bil-am rɔ jiɛc, cuɛ wä wi̱i̱dɛ, kä cu Ba-lak wä dupdɛ bä.
Currently Selected:
Kuen 24: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
