Kuen 23
23
1Kä cu Bil-am Ba-lak jiök i̱, “Lätni ɣä kä yi̱kni da̱ŋ bärɔw ɛn wa̱nɛ mi, kä mocä kɛ thääk bärɔw kɛnɛ rueeth rɔɔmni da̱ŋ bärɔw.” 2Kä cu Ba-lak kɛ la̱t ce̱tkɛ min ca lar ɛ Bil-am. Kä cu Ba-lak kɛnɛ Bil-am thäk kɛnɛ ruath rɔmä thöp wi̱i̱ yi̱kä ɛmɔ. 3Kä cu Bil-am Ba-lak jiök i̱, “Cuŋni gekä mucädu min waŋkɛ, a ɣä wa̱a̱. Dɔ̱ŋ bi Kuoth Nhial röm kɛ ɣä. Kä mɔ bɛ nyuɔ̱th ɣä mɔ, Bä ben la̱r ji̱.” Kä cuɛ wä nhial wi̱i̱ pa̱a̱m. 4Kä cu Kuoth röm kɛ Bil-am. Kä cu Bil-am ɛ jiök i̱, “Ɣän cä yi̱kni bärɔw rialikä, kä cä thäk kɛnɛ ruath rɔmä thöp wi̱i̱kä mɔ.” 5Kä cu Kuoth Nhial Bil-am ka̱m riet, kä cuɛ jiök i̱, “Locni kä Ba-lak bi jɛ wä la̱t nɛmɛ.” 6Kä cuɛ luny kä Ba-lak, kä cuɛ jɛ jek cuŋä gekä mucädɛ kɛnɛ bööth Mo-ab diaal. 7Kä cu Bil-am ruacdɛ lat wee i̱,
“Ci Ba-lak ɣä nööŋ ni kä Ä-ram
kuäär Mo-ab cɛ ɣä nööŋ
ni pääm nhial ɣɔaa i̱,
‘Bër läm ni ɣä Je-kɔb,
bër gak I-thɛ-rɛl!’
8Kä ɛ dëë ram mi /ka̱n lam
ɛ Kuoth ku lam?
Kä dëë ram mi /ka̱n gak ɛ Kuoth
Nhial ku lɛ gak i̱di?
9Kä cä naath nɛn bi̱i̱kä päämni,
ni wi̱i̱ bi̱i̱kä cä kɛ nɛn.
Cä nɛy ti cieŋ kä rɔ̱ nɛn,
ti /ca rɔ mat rɛy döri!
10Kä ɛŋa mi dëë gaat Je-kɔb kuɛn,
kiɛ dëë pek kuayni
I-thɛ-rɛl kuɛn?
A lewä kɛ lia̱a̱ raam mi tekɛ cuŋ,
kä dëë guutdä ce̱tkɛ guutdɛ!”
11Kä cu Ba-lak Bil-am jiök i̱, “Ɛŋu ci lät kä ɣä mɔ? Ɣän cä ji̱ nööŋ kɛ ɣöö bi gua̱n tɛ̈rä ben lam, kä nɛnɛ ci ben poth nikɛ.” 12Kä cuɛ jɛ loc i̱, “Ɣän /ka̱n ji̱ la̱t min ci Kuoth Nhial ɛ la̱r ɣä?”
Ruac go̱o̱kä Bil-am in rɛwdɛ
13Kä cu Ba-lak Bil-am jiök i̱, “Bër wanɛ guäth mi dɔ̱diɛn, mi dɔ̱ŋ bikɛ nɛn thi̱n. Kä bi nɛn ni tin thia̱k ni kɛn, kä /cikɛ bi nɛn kɛn diaal. Kä bikɛ cu la̱m ɣä ɛn wi̱n ɛ mi.” 14Kä cuɛ jɛ naŋ rɛy kakä Dho-pim, ni bi̱i̱kä pa̱a̱m Pi̱dh-ga, kä cuɛ yi̱kni bärɔw täth, kä cuɛ thäk kɛnɛ ruath rɔmä thöp wi̱i̱ yi̱kä mɔ. 15Kä cu Bil-am Ba-lak jiök i̱, “Cuŋni gekä mucädu min waŋkɛ, a wa̱a̱ röm kɛ Kuoth Nhial wi̱n ɛ mi.” 16Kä cu Kuoth Nhial röm kɛ Bil-am, kä cuɛ jɛ ka̱m riet wee i̱, “Locni kä Ba-lak, kä lät ni jɛ nɛmɛ.” 17Kä cuɛ ben kä jɛ, kä cuɛ jɛ jek cuŋä gekä mucädɛ min waŋkɛ kɛɛl kɛnɛ bööth Mo-ab. Kä cu Ba-lak ɛ jiök i̱, “Ɛŋu ci Kuoth Nhial ɛ lat ɔ?” 18Kä cu Bil-am ruacdɛ lat wee i̱,
“Jiɛc rɔ Ba-lak, kä liŋ ɣä.
Liŋ ɣä lö gat Dhi-por.
19/Ci Kuoth a raan a derɛ
kac kac,
kiɛ ɛ gat ran a derɛ
ca̱rɛ nyɔk.
Tëë kɛ mi cɛ lar kä bɛ tey
a /cɛ jɛ lät?
Kiɛ tëë kɛ mi cɛ lar kä
/kenɛ jɛ thuk?
20Nɛnɛ ɣän ca ɣä la̱r ruac puthä.
Cɛ kɛ poth,
kä /cä dëë ben woc.
21Thilɛ duer mi cɛ nɛn
kä Je-kɔb,
kä thilɛ riɛk mi cɛ nɛn
kä I-thɛ-rɛl.
Te Kuoth Nhial Kuothdiɛn
kɛɛl kɛ kɛ.
Kä te ruac Kua̱r rɛydiɛn.
22Ci Kuoth kɛ ka̱m raar kä I-jëp.
Tekɛ kɛ buɔ̱m mi ce̱tkɛ
buɔ̱m tha̱a̱k.
23Kɛ ɣöö thilɛ ti̱et
mi lo̱k Je-kɔb,
kä thilɛ gua̱n kuthni
mi lo̱k I-thɛ-rɛl.
Kä ba la̱r Je-kɔb kɛnɛ
I-thɛ-rɛl täämɛ i̱,
‘Ɛŋu ci Kuoth ɛ la̱t ɔ!’
24Kä kɛnɛ nɛy ti ca rɔ jiɛc
ce̱tkɛ ŋuɔ̱ɔ̱t luɔny,
ce̱tkɛ lony mi yuur rɔ.
/Cɛ dëë tɔ̱ɔ̱c a ni mi cɛ ley käp,
kä cɛ riɛmdɛ lot.”
25Kä cu Ba-lak Bil-am jiök i̱, “/Keni kɛ nyäk kɛ la̱m kä /keni kɛ nyäk kɛ puɔ̱th.” 26Kä cu Bil-am jɛ loc i̱, “Ɣän /ka̱n jɛ la̱r ji̱ i̱, ‘Bä la̱t ni tin diaal tin ci Kuoth Nhial kɛ lar?’ ”
Ruac go̱o̱kä Bil-am in diɔ̱ɔ̱kdiɛn
27Kä cu Ba-lak Bil-am jiök i̱, “Ku ben ɛn täämɛ, bä ji̱ naŋ guäth mi dɔ̱ŋ. Dɔ̱ŋ bi Kuoth ɛ nhɔk a deri kɛ cu wä la̱m ɣä ɛn wi̱n ɛ mi.” 28Kä cu Ba-lak Bil-am naŋ bi̱i̱kä pa̱a̱m Pɛ-or, min guic ni day piny. 29Kä cu Bil-am Ba-lak jiök i̱, “Täth ni ɣä yi̱kni bärɔw, kä moc ɣä kɛ thääk bärɔw kɛnɛ rueeth rɔɔmni da̱ŋ bärɔw.” 30Kä cu Ba-lak ɛ la̱t ce̱tnikɛ min ci Bil-am ɛ lar, kä cuɛ thäk kɛnɛ ruath rɔmä thöp wi̱i̱ yi̱kä mɔ.
Currently Selected:
Kuen 23: nusNHB
Highlight
Copy
Compare
Share
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
