Kuen 25

Pal ji̱ I-thɛ-rɛl kɛ Kuoth baal Pɛ-or

1Mëë cieŋ ji̱ I-thɛ-rɛl kä Ci-tim cu naath ɛ tok kɛ mi tɔ̱ɔ̱ckɛ kɛ nyier Mo-ab. 2Kɛn lät tɔ̱tɔ̱ cua ji̱ I-thɛ-rɛl buath kä muc kuthnikiɛn, cukɛ kɛ cam kä cua kuthkiɛn pal. 3Inɔ cu ji̱ I-thɛ-rɛl rɔ mat palä kuɔth Baal Pɛ-or. Kä cu Kuoth Nhial kɛ̈c kɛ ji̱ I-thɛ-rɛl. 4Kä cu Kuoth Nhial Muthɛ jiök i̱, “Käni bööth nɛɛni ti̱ti̱, näkɛ kä bikɛ ŋap rɛy ca̱ŋ nhiam Kuɔth Nhial, dɔ̱ŋ bi waŋ lɔaac Kuɔth Nhial rɔ̱ ri̱t kä ji̱ I-thɛ-rɛl.” 5Kä cu Muthɛ rueec I-thɛ-rɛl jiök i̱, “Ɛ ramɔ kä yɛ näk nɛɛkɛ tin ca kuoth Baal Pɛ-or wä pal.”

6Kä nɛnɛ cu ram kɛl kä ji̱ I-thɛ-rɛl ciek ji̱ Mid-yan nööŋ dhɔriɛn, nhiam Muthɛ kɛnɛ duɔl ji̱ I-thɛ-rɛl diaal, min pärkɛ thok kɛmɛkä ro̱mä kɛ Kuoth Nhial. 7Kä min ci Pi-nɛ-ɣath gat Ɛl-a-dhar, gat bo̱o̱th palä ni Ä-ron ɛ nɛn, cuɛ rɔ jiɛc cuɛ duɔl ba̱ny piny, kä cuɛ mut ka̱n, 8kä cuɛ wä cuɛ wä kɔɔr ran I-thɛ-rɛl duëël rɛci, kä cuɛ kɛn da̱ŋ rɛw yiath raan I-thɛ-rɛl kɛnɛ ciek. Kä cu juey cu cuɔ̱ŋ kä ji̱ I-thɛ-rɛl. 9Kä nɛy tëë cu li̱w kɛ juey cukɛ a nɛy ti bathdɔɔri ti jiɛɛn da̱ŋ rɛw wi̱cdɛ ŋuaan.

10Kä cu Kuoth Nhial Muthɛ jiök i̱, 11“Ci Pi-nɛ-ɣath gat Ɛl-a-dhar gat bo̱o̱th palä ni Ä-ron kɛ̈cdä luɔc jɔk kä ji̱ I-thɛ-rɛl, kɛ ɣöö cɛ tekɛ tiɛɛl mi ce̱tkɛ tiɛɛlä rɛydiɛn, ɛ jɛn /ka̱n ji̱ I-thɛ-rɛl thum ɔ kɛ tiɛɛlä. 12Kɛ kui̱c ɛmɔ laarɛ jɛ i̱, ‘Ɣän la̱tdä guk malädä kɛ ji̱. 13Kä bɛ tekɛ jɛ kɛnɛ kuaykɛ kɔɔrɛ, guk bo̱o̱thä palä mi do̱raar. Kɛ ɣöö cɛ tekɛ tiɛɛl kɛ kui̱ Kuɔthdɛ, kä cɛ ji̱ I-thɛ-rɛl luɛl.’ ” 14Kä ciöt ran I-thɛ-rɛl ëë ca näk kɛɛl kɛ ciek ji̱ Mid-yan ɛ Dhim-ri gat Thalu bo̱o̱th dhɔaar Thalu. 15Kä cua ciöt ciek Mid-yan ëë ca näk cɔɔli Kɔdh-bi nya Dhur mi la bo̱o̱th thuɔk duëël kä Mid-yan.

16Kä cu Kuoth Nhial Muthɛ jiök i̱, 17“Mäkni ji̱ Mid-yan, kä näk kɛ. 18Kɛ ɣöö ca ji̱ jak kä pali kuoth Pɛ-or, kɛnɛ kui̱ nyimandiɛn ni Kɔdh-bi nya bo̱o̱thä ji̱ Mid-yan, mëë na̱kɛ mëë ci juey ben kɛ kui̱ kuɔth Pɛ-or.”

Currently Selected:

Kuen 25: nusNHB

Highlight

Copy

Compare