ETALEYEHINA 22

1Attati ajilo alia itahutana jihoŋ olowore, onno opipiak ihua agilas, ono aari hunne iyaŋunie 'to nesu. Oŋeru nyia aari ania to seger ilohittok ninyia itoŋori Hollum iko Olosobe, 2ette iŋioron tehiji lofirik abore gala ania. Isuri nyia ayyani huno nesu ilotifori aari ania 'daŋ. Te eeŋa, oŋijattai nyia ayyani hunia enyiahita 'tomon harrihai; ayafa abotie, eŋijit abotie. Arai nyia abene hosi etaŋidarita waati hutta fau. 3Obeŋ adi obo ariŋ enne ipitak Hollum inyiak iwanan itua abore gala ania.

Itua abore gala ania, owon adi aseger ilohittok ono Hollum iko Olosobe. Itahabuye adi egiamak Hollum inyi, 4buo fe igonyuni inyi. Igioroni adi afure Hollum ihomomite hosi. 5Diya, obeŋ adi arue, buo fe aati hulla amanyai 'to diya obeŋi inyiahi iwahan allomo kuyya oloŋ. Nyio, ara adi Hollum Lamonye, afaŋan hosi. Ilohittohi adi isi 'tulaŋ, 'tulaŋ.

Attuna ono Yesu

6Attati ajilo lia jiaran jihoŋ, “Arai ekenita hunia 'daŋ ahode, buo fe oremehini iyihina jihosi. Hollum Lamonye, elle isiarak 'to Oloholio honyi jio ekianak honyi, inyi nyia ifahu ajilo honyi itahutaniere egiamak honyi erre hunne iliahai 'to luŋa eduoŋ.” 7Ojio Yesu jio, “Itayirie, eliaha ni attuna! Hotomunoi lia, ollo ogottiere 'to ekenita Hollum hutto tua abuk ana!”

8Ani alia Yoane, elle etayiru 'to buo fe egonyu erre hunia. Ninyia etayiru ni buo fe egonyu isi, ette ni iruboho ifau ihosiere hejek ajilo linyia itahutak 'to erre hunia jihoŋ. Ajio nyia ni etahabuyo inyi. 9Ati iramak nyia inyi nani jio, “Hèhanio ihuo nyia! Ara ni a hegiamani ihuo iyye; buo fe ihuo illarak hoi ekianak Hollum, kuyya ihuo hia 'daŋ, hullo ogottierek 'to ekenita hutto tua abuk ana. Itahabuye Hollum!” 10Attati ajilo lia jiaran jihoŋ jio, “Hèdimatio ekenita Hollum hutto tua abuk ana, nyio, iliaha asaa onno ofuarik isi 'daŋ iduoŋ. 11Ijiara luŋa etarrohojani, odulo etarrohojo; buo ebuatani, odulo luŋa ehanio erre hunne iboti 'to. Ijiara luŋa abisani, odulo ehanio onno obis; buo fe ololibo odulo luŋa alibori.”

12Attati Yesu jiaran jihoŋ, “Itayirie, eliaha ni attuna! Eyaŋuno adi ni esiorita hoŋ, isiaraniere jio hia 'daŋ ababo ihuo oremehini te ehanita hosi. 13#Eta 1:8, 17; 2:8Ani osiere iko ecuŋi, etteri iko esidi.”

14Hotomunohi hia hullo omoti 'to aboŋojin hosi; nyio, osiru jihosi iŋiyere eŋija 'yani huno nesu, buo fe ijiŋari itua bore gala ania, tettekatin. 15Ati, arasai adi epalak illet; isi iko emimualak, asomok, attok waati, etahabuok rijiorihien, iko aati 'daŋ hullo omunoi 'to agesemi iko erre gesem.

16“Ani Yesu, linyia efak 'to ajilo hoŋ iramaniere erre huna jihatai, hutte iluluŋi heruhok. Adetuno ni to woyo Dafide. Ani elelef otto taŋatio motie, anna afaŋ 'to 'tel 'tel.”

17Attati Oloholio iko oduoti anna ayemuni jiaran, “Waŋ!”

Ijiara hia 'daŋ hulle itayiruni 'to eram ania ojiori luŋa, “Waŋ!”

Elle iboto iyye, waŋ! Elle iwak iyye aari hunne iyaŋunie 'to nesu, amata; obeŋi itadumie.

Etisidi

18Asar ni atulo 'daŋ elle itayiru 'to ekenita Hollum hutto tua abuk ana jio: alla afonik obo omuk erre jio ekenita hunia, ofonik adi buo fe Hollum jihonyi ettigemita hunne igioroni ibuk ana. 19Elle iduha obo atulo omuk ekenita addi, jio ekenita Hollum hutto tua abuk ana, iyimo adi buo fe Hollum inyi eŋija 'yani ono nesu iko iwanari Ibore Gala Elibo, hunne ikiana abuk ana, eram hosi. 20Ikiana nyia lia, linyia iramak 'to erre huna 'daŋ jio, “Hode, eliaha ni attuna!”

Hétera ihuo nyia. Yesu Lamonye, waŋ! 21Ijiara ayiji taji Yesu Lamonye, hatawana jihatai 'daŋ ababo#22:21jihatai 'daŋ ababo : igioroni omuk egierita jio aati Hollum; buo omuk aati Hollum 'daŋ..

Currently Selected:

ETALEYEHINA 22: EA2003

Highlight

Copy

Compare