ETALEYEHINA 21

Edou Aŋejuk iko Afau Aŋejuk

1 # 2Pet 3:13 Attati ni igonyuna edou aŋejuk iko afau aŋejuk. Atuhoroi nyia afau etteri iko edou etteri. Atuhoro buo fe aari enne ittokon. 2#Eta 3:12Attati ni igonyuna abore gala elibo, Yerusalem aŋejuk, ottu jio Hollum tedou. Ihuhum nyia inyi ahuan honyi ihuo oduoti onno ofuoi iyama, onno olo 'to iruaŋanio iko ayamani honyi. 3Etayiru nyia ni etuk onno okuat ikiana to seger ilohittok jiojio, “Ihuania, awon ahaŋ Hollum ihiji waati! Itoŋo adi inyi ikosi, arai adi isi a waati honyi. Owon adi Hollum ta ahuan honyi ikosi. 4Ifufuso adi inyi eyyoo 'daŋ to hoŋite hosi. Obeŋ adi naye, obeŋ adi buo fe eyyoo kuyya adiaha; nyio, atuhoroi erre eberien.”

5Attati lia, linyia itoŋo 'to iseger ilohittok jiaran, “Ihuania, ehan ni erre 'daŋ aŋejuho!” Ojio nyia buo fe inyi jihoŋ jio, “Igiorok erre huna, nyio, arai ekenita hunia hode, oremehini buo fe iyihina jihosi.” 6Attati inyi jiaran, “Atuho! Ani osiere iko ecuŋi, etteri iko esidi. Jio lia elle iboto 'to, etamatak adi ni inyi aari otilik enne iyaŋuno 'to nesu, abeŋ etaduma. 7Lia, elle itatturi 'to egoliti huno neyyau, ifuotu adi inyi ecoriti huna; ara adi ni a Hollum honyi, buo inyi ara a hito hoŋ. 8Ati jio abaŋak, eharak iruk, epalak, attok waati, asomok, emimualak, arotok, etahabuok rijiorihien iko agesomok 'daŋ…amaji hosi adi atafar ono efuoto amunek onno owulo 'to ahima; inyi ania naye etarrihi.”

Yerusalem Aŋejuk

9Ottu nyia obo olo ajilohien hula hattarik, linyia owon 'to iko arranyi hattarik hunne ifuti iko ettigemita hattarik esidita, ette jiaran jihoŋ, “Waŋ. Etahutak adi ni iyye Oduoti onno hobeŋ oyemuni, ŋoruoi Olosobe.” 10Inef nyia Oloholio nani, ette ajilo alia iyaru ani ihide obo adoŋe onno ohodo bebe; ette itahutana jihoŋ Yerusalem, Abore Gala Elibo, onno ottu jio Hollum tedou. 11Itafaŋ nyia akuatan Hollum inyi. Opipiak nyia inyi ihuo amoruo enne egara, buo olibo lir lir ihua nafalaŋa. 12Owon nyia abore gala ania iko eliati onno oduhi ta amoruoi. Obolo nyia eliati ania buo fe ohodo. Owon nyia inyi iko akoli 'tomon harrihai. Irririai nyia ajilohien hulia akoli hunia abotie abotie. Igioroni nyia jio akoli hunia 'daŋ ababo, afure abotie jio awoi waati Israele huna 'tomon harrihai. 13Owoni nyia akoli, hunihoi tetteduoŋi holoŋ, hunihoi totto sumal, hunihoi totto junub, buo hunihoi tettedorroi holoŋ. 14Oduhoni nyia abore gala ania jio amoruoi 'tomon harrihai etawojita. Imoruoi hunia 'daŋ ababo, igioroni nyia afureta Lefahat hula 'tomon harrihai hulo Olosobe. 15Oŋuahatio nyia ajilo linyia ikiana 'to jihoŋ, atelek ekemit anna ara ayyel ikemiere abolori abore gala ania iko akoli honyi buo eliati honyi. 16Orriamari nyia aŋacio honyi huna aŋuan 'daŋ, buo fe elatit honyi orriama iko ahodori honyi. Ninyia akem ajilo alia abore gala ania, ara nyia ahodori honyi ihuo amaili alif abotie iko esiha miyet (1500), buo fe elatit honyi ara 'daŋ ihuo nyia. 17Attati buo fe ajilo alia ikem eliati bore gala ania. Ara nyia ahodori#21:17ahodori : kuyya abolori. honyi ihuo amitiri atomuana miyet haŋuan#21:17 Jio ekori 16 iko 17 igioroni te ekiana Grik jio 12,000 stadia iko 144 cubits. Jio aati Ebrei, owoni anambari hunia iko awoyo rami hosi., te ekemit waati ninyia okemiere inyi. 18Oduhi nyia eliati ta amoruo enne egara, buo oduhi abore gala ta ayyel onno obeŋ iharrua iko obo ariŋ, onno olibo lir lir ihua agilas. 19Italamani nyia etawojita iliati abore gala ania ta afacani moruoi 'daŋ hunno opipiahi. Ara nyia amoruo etteri egara, buo etarrihi emuluyak, buo etahunihi aboŋ, buo etaŋuani elube, 20buo etamiyeti amerie, buo etilleji ariet, buo etahattarihi olojasi, buo etahottohunihi emuluyak enne iharrua iko egara, buo etahottoŋuani amunek, buo etattomoni egara ihuo aŋaboli, buo etattomoni habotie amugie, buo etattomoni harrihai ara erigie. 21Arai nyia ekatin huna 'tomon harrihai asihira 'tomon harrihai. Oduhi nyia ekatin hunia 'daŋ ababo ta asihirati; buo oduhi olofirihi abore gala ania ta ayyel onno obeŋ iharrua iko obo ariŋ, onno olibo lir lir ihua agilas.

22Abeŋ nyia ni egonyu aaji emojit enne ittokon jio abore gala ania; nyio, Hollum Lamonye, Laduarani, iko Olosobe, isi nyia arai aaji honyi emojit enne ittokon. 23Obeŋ nyia abore gala ania inyiak iwahan oloŋ kuyya ayafa nyio, afaŋ nyia akuatan Hollum jihonyi, buo Olosobe ara allomo honyi. 24Amanyai adi aati hutta fau te efaŋit abore gala ania. Iyaŋunie adi oobuok hutta fau esamiti hosi diya. 25Odulori adi ekatin abore ania aŋaa afanni 'daŋ, nyio, obeŋ arue adi teyya. 26Iyaŋunie adi ahujon iko esamiti fauhien 'daŋ jio abore gala ania. 27Ati obeŋi adi aŋatani obo ariŋ enne ibot ojiŋak diya, ara duo bu lia elle ihanio 'to erre hunna aŋariji kuyya ogesem; arari fe hia hama, hunyia igioronie afureta hosi ibuk ono nesu, ono Olosobe.

Currently Selected:

ETALEYEHINA 21: EA2003

Highlight

Copy

Compare