ETALEYEHINA 17

Esomo onno Ohu 'to Bebe

1Attati obo tehiji ajilohien hula hattarik, hunyia oŋuahatie 'to arranyi huna hattarik, ittuna ette jiaran jihoŋ, “Waŋ, etahutak adi ni iyye aŋai ofuoi ittigemio esomo onno ohu 'to; abore gala, ehittok, ninyia oduhoni iger hariak arriai. 2Ajotorik obuok fau 'daŋ inyi, buo ehanita honyi hunno orrohoji 'to ette itaruma aati ta fau 'daŋ ihuo alla amati isi abalu.”

3 # Eta 13:1 Inef nyia Oloholio nani, ette ajilo alia iyaru ani ihidiofo; amaji ninyia egonyuniere ni obo aŋotte itoŋo ihoruoŋ obo ahuanyani onno odo. Igioroni nyia ihuan ahuanyani ania 'daŋ, egierita hunne ittarrohojie 'to afure Hollum. Owon nyia ahuanyani ania iko ossi hattarik buo amuarrak 'tomon. 4Iyyafatio nyia aŋotte ania aboŋo erigie iko ariet, buo oburuhak ahuan honyi ta ayyel iko ta amoruoi hunno opipiahi 'to buo asihira hunna arai emuluyak. Oŋuahatio nyia inyi ematit anna ara ayyel, enne ifut iko ehanita somon honyi hunno oŋuoji buo fe iboti. 5Igioroni nyia ihomom honyi afure anna agalik awoyo hiram honyi ofioro waati, onno ojio jio: “Ani Babilonia, abore gala ehittok, nonye somok iko erre arrohojak hutta fau 'daŋ.” 6Egonyu nyia ni aŋotte ania oruma nooto waati Hollum iko ono aati hunyia ottohori te ejifatio hosi Kristo.

Ellilliha nyia ni bebe, ninyia egonyu ni inyi. 7Ania, ifiyere ajilo alia nani jiojio, “Nyio illilliha iyye? Ekukubok adi ni jihoi awoyo hiram ono aŋotte ania, anna agalik 'to ania ofioro waati iko ono ahuanyani anna akafatio 'to ania inyi; onno owon 'to iko ossi hattarik buo amuarrak 'tomon. 8#Eta 11:7Berien, isu nyia ahuanyani ania, ati ihuania abeŋ inyi. Iliaha inyi ajiŋuna to tua iwure onno obeŋ esidi, ette tibuo ifadara inyi. Te eram honyi, illillihai adi aati hutta fau, hia hunyia obeŋi afureta hosi igioronie ibuk ono esuok many tetteri fau. Isu nyia inyi berien, ihuania abeŋ, ati inyiak adi inyi icohuno.

9“Awak eram ania atulo elle ilofioro. Ossi huna hattarik, isi adoŋiok hattarik hunne itoŋori aŋotte ania. Isi buo fe oobuok hula hattarik. 10Ayei oobuok miyet tehiji oobuok hulia, buo abotie harasa ilohittok; buo ollobo hobeŋ ottu. Alla attu inyi, ottu adi inyi ilohittok oŋitek kaiyo. 11Alla ara eram ahuanyani ninyia isu 'to berien, buo abeŋ ihuania, inyi etahattarihi hobuok, ollo ottu 'to irahan oobu etahottohunihi, ollo ofuoi tibuo ifadara.

12“Amuarrak huna 'tomon hoduo igonyu iyye, isi oobuok hula 'tomon, hullo hobeŋi 'to ilohobuji. Ati isiarani adi jihosi elohittok ilohobujori asaa abotie, isi arabotie iko ahuanyani. 13Owoni isi 'daŋ iko egigilo abotie, buo fe isi isiori agolon iko elohittok hosi 'daŋ jio ahuanyani. 14Irumoni adi isi Olosobe. Ati itattur adi Olosobe isi, nyio, inyi Lamonye alla agalik 'to 'daŋ, buo fe a Hobu alla agalik 'to 'daŋ. Arai lejifak honyi eloŋot, olonyimot buo fe ahayijok.”

15Ojio nyia buo fe ajilo lia jihoŋ jio, “Oloworio hoduo igonyu iyye itoŋori nonye somok, isi eluluŋi woi waati 'daŋ, jio afauhien 'daŋ. 16Buo amuarrak huna 'tomon iko ahuanyani hoduo igonyu iyye, oliwarik adi isi nesomo ania. Iyarai adi isi erre honyi 'daŋ, ette idiaharu inyi aŋaturoi. Ohonyai adi isi inyi, ette isuahina ihima. 17Nyio, Hollum nyia ihanak itajia oobuok hulia egigilo arabotie buo fe isiaraniere agolon hosi jio ahuanyani ania. Ihanie adi isi ihuo nyia many itasirunierek ekenita Hollum.

18“Aŋotte noduo igonyu iyye, inyi abore gala ehittok enne ilohittohori oobu honyi oobuok 'daŋ hutta fau.”

Currently Selected:

ETALEYEHINA 17: EA2003

Highlight

Copy

Compare