ETALEYEHINA 11

Asuuti hula Arrihai

1Isiarani nyia jihoŋ atelek ekemit, ette iramana ani jio, “Ilo, okiama Aaji emojit enne ittokon ono Hollum iko etitiek ehumi. Ihiana hia, hullo omojoi 'to diya. 2#Luk 21:24Ati hèkiem aloŋon hutteger. Idehi isi, nyio, isiori nyia isi jio, atimok Hollum. Irririei adi isi Abore Gala Elibo many ayafajin atomuana aŋuan harrihai. 3Efak adi ni asuuti hoŋ hula arrihai, hulle iyyafatie 'to asuwali. Ittittoye adi isi asayyo Hollum jio oŋitek 1,260.”

4Asuuti hula arrihai, isi ayyani huŋuro huna arrihai iko etawojita 'lomohien huna arrihai, hunno owotia 'to ihosiere Lamonye fau. 5Alla awak obo iriafuna isi, ette neema ipuhuna to hutuhe hosi, ette ituk amiorok hosi. Ihuo nyia, ottohori adi atulo 'daŋ alla awak 'to iriafuna isi. 6Owon aduaran jihosi itihiere edou oŋida ahide obeŋ asayo jio oŋitek hunne ittittoyerek isi asayyo Hollum. Owon buo fe aduaran jihosi iloiciere aari huno olotilik ahoto buo fe iyaŋuniere arrohojita 'daŋ lifau ihua awahi isi.

7 # Eta 13:5-7; 17:8 Buo alla atuhoni isi ettittoyo asayyo hunia, ette aciaŋ, onno ojiŋu 'to to tua iwure onno obeŋ isidi, irriomonio ikosi, ette itattur isi, ette ittohoro. 8Ibibiatai adi ahuattek hosi bet bet ilofirihi bore gala ehittok, ninyia isihonierek Lamonye hosi. Afure anna ara 'to etahuti ono abore gala ania, inyi Sodom kuyya Masir. 9Ofuonni adi aati ta fauhien 'daŋ iko to woi waati 'daŋ, ette iŋiŋiala ahuattek ayaak hulia oŋitek hunihoi iko anus. Obeŋi adi isi aŋatani ayaak hulia onuhani. 10Omunoi adi aati hutta fau naye hosi. Ohiai adi isi ta amuno, ette isiorio esiorita jio mottiarak hosi, nyio, ittigemie nyia asuuti hula arrihai hulia aati hutta fau 'daŋ. 11Ati ihalu oŋitek hunihoi iko anus, ottu nyia oloyiri ono nesu jio Hollum, ette ihudanio jihosi, ette isi iwotia ahide. Inef nyia abaŋi hia 'daŋ, hunyia igonyuni 'to isi. 12Attati ekianak Hollum hula arrihai hulia, itayiruna etuk iloŋo tedou woŋ woŋ jiojio, “Ifuanna ihide dini!” Ette isi idahan lidou te edohuo, buo amiorok hosi omijie. 13#Eta 6:12; 16:18Ta asaa tonyia, odioto nyia olokitik onno orroho, ette aŋati etattomoni ono abore gala ania iritihoro, ette aati alif hattarik (7,000) ittohino; buo abaŋi ette inef ofitot, ette isi itahabuyo Hollum olo edou.

14Atuhoro arrohoji etarrihi, ati, iliaha arrohoji etahunihi attuna!

Afuruju Etahattarihi

15Attati ajilo etahattarihi ihut afuruju honyi, ette etuhe iwuwoŋita idou jiojio, “Ilohittok Lamonye hohoi jio afau ana, inyi iko Olonyimoto honyi. Ilohittok adi inyi 'tulaŋ, 'tulaŋ!” 16Buo lahou hula atomuana arrihai haŋuan, hulle itoŋoi 'to isegeri ilohittok ihosiere Hollum, ette iruboho ifau, ette itahabuyo Hollum, 17jiojio:

“Hollum Lamonye, Laduarani, ollo owon 'to ihuania, linyia buo fe owon 'to berien!

Esio hohoi ahumo jihoi nyio, iduhu iyye elohittok hoi anna agalik 'to

itte itterio elohittok!

18Asuaharai atajia huno atimok hoi,

nyio, alum asaa ono ajore hoi,

asaa onno oŋocierek eram hayaak.

Alum asaa isiaraniere esiorio jio egiamak hoi, hulla arai a hekianak hoi,

iko aati hoi 'daŋ hulla abaŋi 'to iyye,

elettaha iko aati asai.

Alum asaa itamuhiniere attok waati hutta fau!”

19Attati Aaji emojit enne ittokon ono Hollum ettedou iŋa, buo Asenuk Ecorit ette leyo teya. Owoni nyia diya emedehita iko etirita hilai, attor hutuhe, olokitik iko afalaŋa onno obolo.

Currently Selected:

ETALEYEHINA 11: EA2003

Highlight

Copy

Compare