ETALEYEHINA 10

Ajilo iko Agagar ollo Odiha 'to

1Attati ni igonyuna obo ajilo elle ittok osuu tedou, ollo oburuhanio jio obo edohuo, buo atolohe owon ihou honyi. Ara nyia omom honyi ihuo noloŋ, buo eejek honyi arai ihuo awulori hima.

2Oŋuahatio nyia inyi obo agagar ollo odiha alla awalaha ihani honyi, buo akaddak eeju iŋet honyi ihide hari enne ittok buo eeju ihorroŋ ihide fau; 3ette iloŋ woŋ woŋ ihuo eguri lemie. Ninyia héloŋ inyi ihuania, ottoi etirita hilai huna hattarik itarraŋ te etitta. 4Buo ninyia itayirunie etirita hunia, awak nyia ni igioronia eram hosi. Ati etayiru nyia ni obo etuk ottu tedou onno ojio, “Oduarai erre hunno ojiori etirita huna hattarik; hègiorok!”

5Attati ajilo loduo egonyu ni owotia ihari iko ilotifor ikaf aani iŋet honyi attany edou, 6ette ilama ta afure Hollum, lesuoni 'tulaŋ 'tulaŋ, layyani idou iko nafau buo aari enne ittokon iko erre hunno owoni 'to jihosi 'daŋ. Ojio nyia ajilo lia jio, “Obeŋ obo elliŋia inyiak iwanan! 7Buo alla ahut ajilo etahattarihi afuruju honyi, itasiru adi Hollum egigilo honyi anna agalik 'to ofioro tulo, ihuo iramak nyia inyi jio egiamak honyi, hulla arai a hekianak honyi.”

8Attati etuk, noduo etaniŋu ni ikiana tedou, inyiak jiaran jihoŋ jio, “Ilo iduhu agagar anna awalaha 'to, otto hani ajilo ollo owotia 'to ihide hari enne ittokon iko ifau.” 9Ania, ette ni leten jio ajilo lia, ette ni imojuna jihonyi agagar ollo odiha 'to lia; buo inyi ette jiaran jihoŋ jio, “Hibe, inya. Odua adi inyi ihohe hoi, buo ofifil ihuo eesio ihutuk hoi.”

10Efuotu nyia ni agagar lia ta hani honyi, ette ni inya. Ofifil nyia inyi ihutuk hoŋ ihuo eesio; buo odua 'tek 'tek ihohe hoŋ, ninyia adilo ni. 11Attati iramana jihoŋ jio, “Ijiara luŋa iyye inyiak ittittoyo ariŋ onno olo Hollum ikiana jio awoi waati arriai, afauhien arriai, ekenita waati arriai iko jio oobuok arriai.”

Currently Selected:

ETALEYEHINA 10: EA2003

Highlight

Copy

Compare