Filipi 2

Afiahaji iko Agalihina onno Owon 'to jio Kristo

1Itagol amanya hatai to Kristo itai, buo fe abuaran taji honyi itilik atajia hatai. Itoŋoti itai arabotie to Oloholio#2:1 Itoŋoti itai arabotie to Oloholio : kuyya, iyaŋuno Oloholio jihatai etoŋo arabotie.; inyalamata buo fe imunoti ahuattek. 2Attana ni itai jio, itattubana amuno hoŋ ta awanan iko egigilo abotie, te etarriamahina abuaran tajia hatai, te egigilo iko ta awahan ariŋ abotie. 3Hèhaniete obo ariŋ te ewahiti hutto tajia hatai kuyya te etadara; ati itafiahajata ahuattek, oduloro egigilo jio, agalihini aati hullomuk itai. 4Hègigiloti te ewahiti huttanatai hama, igigiloti buo fe te ewahiti waati hullomuk. 5Ijiara luŋa egigilo ninyia owon 'to jio Kristo Yesu, hatawana itajia hatai.

6Odulo nyia inyi arahan ihuo Hollum,

ati, obeŋ nyia inyi igigilo igolihiniere#2:6 igolihiniere : kuyya ittuniere irahan. jio arriamara iko Hollum.

7Ati idehi nyia inyi elobia honyi 'daŋ,

ette irahan ihuo apit.

Isiuni nyia inyi atulo

ette irahan atulo.

8Itafiaha nyia inyi ahuan honyi, ette iniŋio Hollum many liye — ta aye honyi ikruce.

9Ania, akafaniere Hollum inyi imaji ilohittok anna agalik 'to 'daŋ,

ette isiarana jihonyi elohittok anna agalik 'to hunnomuk 'daŋ.

10Tania, te elohittok ottono Yesu,

itahabuye adi erre 'daŋ huttedou iko hutta fau buo hutto tua fau#2:10 hutto tua fau : Igigiloi nyia jio, arasai ayaak amanya jio edumele otto tua fau. inyi,

11ette 'daŋ ipulonia jio, Yesu Kristo inyi Lamonye,

isiaraniere akuatan jio Hollum, Monye.

Awulori ihua Allomohien Ifau

12Tania, illarak iko haniyarak hoŋ, ihuo ninyia iniŋiette itai eram hoŋ buo ni hawon ikatai, oyyu atibuo bebe elle iniŋiete itai ani ihuania buo ni abeŋ awon ikatai. Ta abaŋi Hollum, otuhonia atajia hatai 'daŋ jio egiama honyi; oŋida etalahuno hatai ottuba. 13Nyio, odulo Hollum awanan ikatai jio, oŋida itai iwahata buo fe iremehina iniŋio erre hunna awak inyi.

14Ihaniete erre 'daŋ buo ibiaŋata iŋuŋusiati kuyya itarisati, 15oŋida bati irata aduri Hollum aliborok, buo fe ibiaŋata iwanata iko obo epali. Imanyati itai ihiji waati afau ana, hulla arai 'to a hepalak buo fe a heyyak. Ati, owuloroto luŋa ihiji hosi ihuo elelefi hunne itafaŋi 'to edou, 16buo itai itahuciete jihosi asayyo hunne iyaŋunie 'to nesu. Elle ihanata itai ihuo nyia, aremik adi ni itadara jio Noloŋ onno ocohuniere Kristo nyio, itahutak adi ania jio, obeŋ egiama iko apulo hoŋ olo asai.

17Oremehini adi buo fe ittohoro ani, ette adi ania irahan ihuo nooto enne iharruahini iko ehumi enne isiatta itai jio Hollum te neruk hatai jihonyi. Elle iduoŋ eram ania ihuo nyia, amuno adi ni, buo fe etamuno itai. 18Ihuo nyia buo fe, oŋida luŋa imunoti, buo fe itamunoto ani.

Timoteyo iko Epafroditos

19Alla ara awahan ono Lamonye, egigilo ni aremik adi ni ifahina Timoteyo kokuak jihatai, oŋida bati ataji hoŋ ilik, elle etaniŋu ni asayyo huno etoŋo hatai. 20Jihoŋ, obeŋ obo atulo elle igigilo bebe tetai, ihuo inyi. 21Igigiloi aati hullomuk 'daŋ te ewahiti tajia hosi hama, obiaŋara te ewahiti huno Yesu Kristo. 22Imijana buo itai ayiji honyi. Ara nyia inyi ihuo lonyi hoŋ to ninyia egiamari ni ikonyi te eram ono asayyo ayijok. 23Tania, egigilo ni ifahiniere inyi jihatai, alla amijak ni olo eram hoŋ irahan aŋai. 24Eyihi buo fe ni jio, aŋatak adi Lamonye jihoŋ obo ekoi ilari jihatai kokuak.

25Egigilo ni oyyu luŋa ifahiniere jihatai illa hohoi, Epafroditos, linyia ifahuna itai oŋida ottu iluahio nani. Inyi egiamani elle edihu 'to ikoŋ esiyo sayyo ayijok. 26Awak inyi luŋa bebe igonyuna itai 'daŋ nyio, obeŋ nyia inyi omuno ninyia amijak inyi jio itaniŋuna itai aŋuai honyi. 27Hode, oŋuai nyia inyi opuany aye. Ati amehino Hollum jihonyi, buo fe omehino jihoŋ ta abiaŋan honyi iyaŋuno jihoŋ ejiriŋa onno obolo agalik. 28Ihuania, awak tibuo ni luŋa ifahina inyi jihatai, oŋida inyiahata imuno elle igonyuna itai inyi, buo fe oŋida ejiriŋa obeŋ jihoŋ. 29Ifuotuna inyi ta namuno ihuo enne ifuotuttati itai eruhok hulo Lamonye. Itahutana abaŋi hatai jio aati 'daŋ ihuo inyi, 30nyio, opuany nyia inyi aye te eram ono egiama jio Kristo. Orinyak nyia inyi aye iluahiere ani jio egiama ninyia ibiaŋata itai iremehina ihan.

Currently Selected:

Filipi 2: EA2003

Highlight

Copy

Compare