Filipi 3

Abisan Ahode hode

1Illarak iko haniyarak hoŋ, etisidok ni jio, omunoti te enoso hatai iko Lamonye. Obeŋ orroho idasiere jihatai erre hunyia egiorok ni jihatai; nyio, iyaŋuno adi inyi ayiji jihatai. 2Ihumata imijio aati hulla amanyai 'to ihuo aŋohe! Isi hulia, aati ehanak hirre hunno orrohoji; hullo odulori 'to jio, ijiara aati obosoi. 3Hohoi hullo obosi hode hode, obiaŋara isi. Nyio, emojo hohoi Hollum ta agolon ono Oloholio honyi, buo fe emuno imanyari te enoso iko Kristo Yesu. Ebeŋ busi hohoi eyihi jio etaduarita hunne ihanie ihuattek hohoi. 4Aremik duo buo fe ni luŋa iyihina jio erre ihuo hunia. Elle igigilo obo alatai jio aremik inyi iyihina jio etaduarita hunne ihanie ihuattek hunia, aremik tibuo ni iyihina agalik inyi. 5#Ehanita 23:6; 26:5; Rom 11:1#Ehanita 8:3; 22:4; 26:9-11Isiuni nyia ani, ette ibos ihalu oŋitek hattarik. Ara ni olo Israele, to woyo bo Benyamin, Ebreitanani hode hode. Ara nyia ni a Fariseitanani alla aniŋio bebe efahita Yudei. 6Awak nyia ni bebe ehanio erre hunne egigilo ni jio awak Hollum, ania, ettigemiere ni eruhok Kristo. Obeŋ nyia obo epali jihoŋ nyio, aniŋio nyia ni efahita 'daŋ. 7Ati ihuania, erre 'daŋ hunyia egigilo ni jio arai ayijok, ayitoi ihuania ahirre asai, te eram Kristo. 8Obiaŋara hunia ijiai; arai erre 'daŋ jihoŋ ahirre asai, nyio, amijana Kristo Yesu, Lamonye hoŋ, ariŋ ania onno oyyu 'to agalik. Edehi ni erre 'daŋ, te eram honyi. Arai erre 'daŋ jihoŋ aharanyanya jio, oŋida bati ni ara a holo Kristo, 9buo fe inosori luŋa ikonyi. Abeŋ ni enyiak iwanan iko obo abisan anna ara 'to ahonoŋ; abisan onno orumani ta aniŋio ifahita. Awon ni ihuania iko abisan onno orumani te neruk jio Kristo; abisan onno obotu 'to jio Hollum te neruk. 10Awak ni imijana Kristo iko aduaran ninyia itubuhu 'to inyi toye. Awak ni irumana ettigemita ihuo inyi, buo fe iyeri ihuo inyi, 11jio, oŋida bati itubuhuna ani toye.

Arracara Ifuotuniere Esiorio

12Abeŋ ni ajio arumak ni inyi kuyya abeŋ riŋ aŋaramahi ani. Ati, harasa ni irracita eram esiorio ania; nyio, anyimu Kristo Yesu ani irari a holonyi. 13Illarak iko haniyarak hoŋ, abeŋ ni luŋa egigilo jio arumak ni inyi. Ati edehi ni erre eberien, atuhok ni egigilo hoŋ 'daŋ jio erre hutto hosiere. 14Inyi anna arracari ni fir fir attany esidi jio, oŋida bati ani efuotu esiorio ono amanya aŋejuk, enne iloŋuniere Hollum ani to Kristo Yesu.

15Ijiara hohoi hulla agol eruk, egigilo 'daŋ te ekoi abotie. Buo elle igigilo obo onno olufa, ihum adi Hollum italeyehina eram ania jihonyi. 16Ati haduloro amanya te nekoi enne ejifatio many ihuania.

17 # 1Kor 4:16; 11:1 Illarak iko haniyarak hoŋ, oduloro ehanio ihuo ani. Iyiyenuna jio aati hulle ijifatie 'to etamijanita hunyia etahutak hohoi jihatai. 18Eramak nyia ni eram ania jihatai enyiahita arriai. Ihuania enyiak ni idas inyi te neyyoo. Owoni aati arriai hulle ittarrohoji awoyo hiram ono naye Kristo likruce, ta amanya hosi. 19Itamuhini adi isi 'daŋ, nyio, arai ewahiti huattek hosi ajiok hosi. Itadarai isi te erre hunne iyaŋunie 'to ariri jihosi, buo fe otuhoni egigilo hosi 'daŋ jio erre hutta afau ana. 20Ati era a waati hulo edou. Ihuania ehum itila Etalahani hohoi ollo ottu 'to tedou, inyi Yesu Kristo, Lamonye. 21Ta aduaran enne ilohittohori inyi jio erre 'daŋ, ottu adi inyi iloit ahuattek hohoi huna, hunno oremehini 'to iye, oŋida arai ihuo ononyi enne ilaman 'to agalik 'daŋ.

Currently Selected:

Filipi 3: EA2003

Highlight

Copy

Compare