Ebrei 4

1Ihuania, isiarak Hollum jihohoi ecorit ifuotuniere ayiri ninyia ikiana inyi. Héhumata ti mijio, ŋadi obo tehiji hatai odiak arumana ayiri ania. 2Nyio, etayiru nyia Asayyo Ayijok ihuo isi; ati obeŋi nyia asayyo hunyia itayiruni isi, oluahi isi, nyio, obeŋ nyia neruk jihosi. 3Efuotu tibuo hohoi, hulle ewon 'to iko neruk, ayiri ania ninyia ocorok Hollum. Oso luŋa ihuo ninyia ojiari inyi jio,

“Ejoria nyia ni, ette ni ittuŋo jio:

‘Ittallihi adi isi fanyan jio afau anna aremehiniere ni isiaraniere jihosi ayiri!’ ”

Ara duadi bu ninyia attubak inyi egemita honyi 'daŋ many jio oloŋ ninyia oyyeuniere inyi afau, ikiana nyia inyi ihuo nyia. 4Te eram oloŋ etahattarihi, ikiana obo aŋati Buk Hollum jio: “Iholoŋ etahattarihi, oyiri nyia Hollum jio egemita honyi 'daŋ.” 5Jio aŋati ania, inyiak inyi jiaran jio, “Ittallihi adi isi ifanyan jio afau anna aremehiniere ni isiaraniere jihosi ayiri.” 6Obeŋi nyia hia, hinyia itteri 'to efuotuna Asayyo Ayijok, orumani ayiri ania nyio, obeŋ nyia eruk jihosi. Buo aŋatani jio omuk ifuotuniere inyi. 7Oloŋ ninyia inyiak Hollum inyimuna, enne iloŋoi “Ahana”, inyi itahutak eram ania. Ihalu aŋasi arriai, ikiana nyia inyi eram ania te etuk Dafide jio ekenita hoduo ilietuni to buk Hollum jiojio:

“Ahana, elle itayiruna itai etuk Hollum,

hètagoloto ossi.”

8Elle isiarak nyia Yosua jio aati ayiri ninyia ocorok Hollum, obeŋ duo Hollum inyiak ikiana eram obo oloŋ. 9Tania, hobeŋ oloŋ onno oyiriarik aati Hollum afany, onno orriama 'to iko oloŋ etahattarihi ninyia oyiriari Hollum. 10Atulo 'daŋ ollo onyurak 'to ayiri ninyia ocorok Hollum, oyiri adi jio egiama honyi, ihuo ninyia oyiriari Hollum jio egiama honyi. 11Tania, hakiamata luŋa bebe ifuotuniere ayiri ania, ŋadi obo tehiji hohoi okuaharu ihuo hohonyiok hohoi hinyia okuaharai 'to ta abiaŋan eruk jihosi.

12Odua ekiana Hollum, ara inyi ihuo ariŋ enne isu 'to; ofi inyi bebe agalik ademi erremit onno owon 'to iko aŋacio arrihai. Orriomoro parras many iboŋi ono oloyiri iko oloholio, many ittulita hoi buo fe many ittulai. Omijak inyi egigilita tulo iko ewahiti hutto taji honyi. 13Obeŋ obo ariŋ idima to hosiere Hollum. Asalanie erre 'daŋ ihosiere honyi, omijak inyi isi 'daŋ. Efuo adi luŋa iramana jihonyi erre 'daŋ hunne ehan 'daŋ ababo.

Yesu Ehumani elle ittokon Agalik

14Hagottiette luŋa neruk ottonohoi, nyio, ewon iko Ehumani elle ittokon Agalik, alla afany 'to luŋa ihosiere Hollum; inyi Yesu, Lonyi Hollum. 15Ewon iko Ehumani elle ittokon ollo omijak 'to elik ottonohoi. Nyio, okemi nyia inyi te ekotia arriai ihuo hohoi, ati obeŋ nyia inyi iyyau. 16Tania, héhutonia ta agolon tajia, iseger ilohittok Hollum ollo owon 'to iko ayiji taji jio oŋida bati efuotu amehino iko ayiji taji onno oremik 'to iluak hohoi jio asaa enne ewahari aluahio.

Currently Selected:

Ebrei 4: EA2003

Highlight

Copy

Compare