Efeso 4

Enoso iko Kristo

1Ani, elle efita 'to te egiama hoŋ jio Lamonye, attana ni itai jio, amanyati, amanya onno osiru 'to jio eloŋuna enne iloŋuniere Hollum itai. 2#Kol 3:12-13Hèkafatiete ossi, oduloro anyalami, odihuna ettigemita; ta abuaran tajia, hèŋuŋusiati aati hullomuk. 3Iyaŋuno Oloholio Hollum jihatai nelik tajia itoŋori arabotie; tania, okiamata luŋa igottiere etoŋo arabotie ania. 4Era 'daŋ aŋacio huan abotie, owon buo fe Oloholio abotie; ihuo ninyia isiaranierek jihatai eyihina abotie ninyia onyimuniere Hollum itai. 5Owon Lamonye abotie, neruk abotie, batisimo abotie; 6Hollum abotie Monye waati 'daŋ, Lamonye waati 'daŋ elle igiama 'to tottolo aati 'daŋ buo fe owon jihosi 'daŋ.

7Efuotu 'daŋ ababo esiorio enne itahutak 'to abolori ono emorot Kristo. 8Ihuo ojio abuk Hollum jio,

“Ninyia adok inyi ahide,

anyaru nyia inyi aati arriai ikonyi,

ette buo fe isiarana esiorita jio aati.”

9Anyio soho awoyo hiram ono “adok ahide”? Ojio awoyo hiram honyi jio, isur nyia inyi do itua ewure onno owudo 'to bebe otto fau.#4:9 itua ewure onno owudo 'to bebe otto fau : kuyya itua ewure onno owudo 'to bebe otto fau, ahuan afu luŋa. 10Ajiaran ania jio, ahuan lia, linyia isuru 'to ifau, inyi buo fe linyia odok 'to ahide bebe many agalaru edou jio, oŋida inyi owon imasik 'daŋ. 11Inyi nyia “Isiarak esiorita jio aati 'daŋ.” Onyimu nyia inyi omuk irari elefahat, buo omuk irari a hekianak Hollum, buo omuk irari a hettittok sayyo Ayijok, buo omuk irari a heyyahak heruhok, buo omuk irari a hettiyanak. 12Ihan nyia inyi eram ania, ihuhumaniere aati Hollum 'daŋ ihaniere egiama Kristiani, itagoliere eruhok hulla arai 'to aŋacio huan Kristo. 13Tania, ettubanio adi 'daŋ arabotie jio enoso ono neruk iko ono amijana Lonyi Hollum; ette adi neruk hohoi luŋa ibolori, ette luŋa ifanyan jio ettubit abolori ono Kristo. 14Hèlaha luŋa era ihuo aduri; hèlaha eŋatak enyabak itisiabari hohoi te ettiyenita hosi enyobita, hunna arai 'to ihuo asiŋit enne ipipoŋio 'to atagol itua hari. 15Ati, te ekotia 'daŋ, ijiara luŋa ekiana elahode ta abuaran tajia buo ebobolororo irari ihuo Kristo, alla ara 'to elettok. 16#Kol 2:19Ta agolon ottononyi, ogottiere inyi aŋacio huan 'daŋ arabotie imasik hosi, buo ettulita 'daŋ ababo itagolie buo fe ogottierek ahuan 'daŋ arabotie. Tania, elle igiamai aŋacio hunia 'daŋ onno oyyu, ette ahuan 'daŋ ibobolororo buo fe ogogolororo ta abuaran taji.

Amanya Aŋejuk to Kristo

17Ta afure ono Lamonye, asar ni itai jio, hèmanyati luŋa ihuo atimok Hollum hullo obeŋi egigilita hosi oyiji; 18buo fe ossi hosi ilironie. Obeŋi isi osiruni jio amanya onno ottu 'to jio Hollum, nyio, obeŋi luŋa ossi jihosi, buo fe atajia hosi ogoli. 19Obeŋi ariri jihosi; atuhoni isi ahuattek hosi 'daŋ ihaniere erre 'daŋ hunno orrohoji, buo fe obeŋi oyuhoi ehanio awoi hirre 'daŋ hunne iboti. 20Obiaŋara erre Kristo hunia hunyia ittiyenuna itai! 21Hode, itayiruna nyia itai eram honyi, buo ta arahan hatai a hejifak honyi, ittiyanani nyia jihatai nelahode ottononyi. 22#Kol 3:9Tania, obusana ekotia hunyia imanyatti itai berien; emanyiti hunyia ittarrohoji 'to itai te ewahiti hunno orrohoji, hunyia itisiabari 'to itai. 23Ijiara luŋa iloiti atajia iko ossi hatai. 24#Kol 3:10Irata luŋa awaati aŋejuho, hunyia oyyeuni irari ihuo arrijiori Hollum, ta abisan iko ta alibori anna ara 'to hode.

25Tania, hèlaha agesemi owon ihiji hatai! Ikianati ahode hode hiram jio eruhok hullomuk; nyio, era 'daŋ ababo aŋacio huan Kristo. 26Elle iloŋojita iyye, hèlaha ajore hoi iyaru iyye jio eyyau; hèlaha buo fe oloŋ iddorro buo iyye heloŋojita. 27Hèŋatak Sittan obo ekoi. 28Elle ira nyia iyye olohoho, idehi luŋa ahoho; itterie luŋa egiama, oŋida irumak erre hoi te ekoi onno obis 'to, buo fe iremik iluak alociaŋak. 29Hèlaha ekenita hunno oŋuoji 'to ofuonni to hutuhe hatai. Ati, ijiara etuhe hatai ikianai erre ayijok hunno oremehini 'to iluak aati jio ewahiti hosi, oŋida bati ekenita hatai hunia iyaŋunie ayiji jio hia hulle itayirie 'to jihatai. 30Hètaloŋojata Oloholio Hollum; nyio, Oloholio ara emoi Hollum enne itahutak 'to jio, ira iyye a holonyi, buo fe itahutak jio, ottu adi Oloŋ anna alari Hollum italahuniere iyye. 31Idehina luŋa amuguta, eloŋojita, ajore, eŋerejita, emimoro iko aliwa ta maji honyi 'daŋ. 32#Kol 3:13Ati ijiara anyalami iko abijon tajia hatawana ihiji hatai. Idehina epalita waati hullomuk, ihuo enne idehiniere Hollum hunatai to Kristo.

Currently Selected:

Efeso 4: EA2003

Highlight

Copy

Compare