Efeso 3

Egiama Paulo jio Alufajak

1Inyi eram ania anna amojori ni jio Hollum; nani, Paulo, elle efita 'to ibabus te eram Kristo Yesu, iluahiere itai, Alufajak. 2Hode, itaniŋuna nyia itai jio, Hollum, ta ayiji taji honyi, isiarak jihoŋ egiama ana iluahiere itai. 3Italeyehi nyia Hollum egigilo honyi anna agalik 'to ofioro tulo, ette itamijanana jihoŋ. (Egiorok ni eram ana obo kai; 4#Kol 1:26-27elle ihianata itai erre hunne egiorok ni hunia, iremehina adi itai igonyuna amijana hoŋ eram anna agalik 'to ofioro waati ania, ninyia iyaŋuno Kristo.) 5Berien, obeŋi nyia itahutani eram ania jio aati, ati ihuania, itahutak Hollum inyi, to Oloholio, jio lefahat iko ekianak honyi aliborok. 6Ajiaran ania jio, ifuotuni Alufajak emuniti jio Hollum arabotie iko Yudei te eram ono asayyo ayijok. Arai isi aŋacio huno ahuan abotie, buo fe ifuotuni arabotie erre hunyia ocorok Hollum to Kristo Yesu.

7Ihanani nyia nani a hegiamani olo asayyo ayijok, ta ayiji taji Hollum ninyia isiarani jihoŋ ta aduaran honyi. 8Ani olofiaha waati Hollum 'daŋ. Ati itasiru Hollum ani amiji ta anyimuna honyi nani irari a hettittoni olo Alufajak, itamijananiere ayiji iko elamani anna agalik 'to 'daŋ, onno ottu 'to to Kristo; 9buo fe itahutaniere aati 'daŋ aŋai adi itasiruni egigilo Hollum anna agalik 'to ofioro tulo. Hollum Layyani hirre 'daŋ, inyi nyia itik aati 'daŋ hunyia berien imijaniere erre hunia jio, 10oŋida bati eluluŋ heruhok itamijanak ihuania ofioro hirre 'daŋ jio ajilohien hulle ilohittohi 'to ihiji idou iko afau. 11Ihan nyia Hollum eram ania ta awahan honyi onno osio 'to 'tulaŋ, enne ihan inyi tottolo Kristo Yesu, Lamonye hohoi. 12Te enoso hohoi iko Kristo buo fe te neruk jihonyi, inyi enne ewanari iko agolon taji ifuari ihosiere Hollum. 13Tania, attana ni itai jio, te eram ettigemio onno ottu 'to jihoŋ te eram hatai, hèhoronia; nyio, iyaŋuno adi inyi ayiji jihatai.

Abuaran Taji Kristo

14Te eram ania, arigoŋo ni imojori jio Monye, 15ayyani hirre 'daŋ huttedou iko hutta fau. 16Ta aluaji hirre ayijok jio Hollum, amojo ni ijiara Oloholio honyi isiarak jihatai agolon tajia. 17Amojo buo fe ni jio, ijiara Kristo odulo awanan itajia hatai te neruk. Ijiara buo fe abuaran taji honyi ogottiere amanya hatai 'daŋ, 18oŋida bati itai 'daŋ arabotie iko aati Hollum iwanata iko ofioro ihumari imijaniere abolori buaran taji Kristo, anna agalik 'to 'daŋ.

19Aafe, oŋida luŋa ifuanna imijana abuaran taji honyi anna agalik 'to ofioro waati 'daŋ jio, oŋida bati luŋa isatta ihuo Hollum.

20Jio lia, elle igiama aduaran honyi ituajin hohoi; lia ollo oremik 'to ihanio erre hunna agalihini 'to 'daŋ hunne emojo kuyya hunne egigilo: 21ijiara eluluŋ heruhok iko Kristo Yesu iyaŋunie akuatan jio Hollum, 'tulaŋ, 'tulaŋ! Amen.

Currently Selected:

Efeso 3: EA2003

Highlight

Copy

Compare