Efeso 5

Amanya Ifaŋan

1Ta arahan hatai aduri Hollum hullo obuor ataji honyi, okiamata luŋa irari ihuo inyi. 2Ijiara luŋa abuaran taji ogottiere amanya hatai, ihuo ninyia obuarari ataji Kristo hohoi, ette iye te eram hohoi, irari esiorio ehumi onno oŋuo 'to gir gir onno omuno Hollum.

3Ta arahan hatai awaati Hollum, hèlaha luŋa ojiori jio, owon asomon kuyya asilara kuyya anahan tua ihiji hatai. 4Obeŋ buo fe osiru jihatai ikianari te ekenita hunno oŋuoji 'to kuyya hunno orrohoji 'to kuyya hunna aŋariji 'to te etayirio. Ati isiatta luŋa ahumo jio Hollum. 5Omijana jio, ittallik olosomo kuyya olosila kuyya atulo ollo onok tua irahan a hulo Olobie Kristo iko olo Hollum. (Nyio, omuno atulo ollo onok tua erre ihuo alla arai isi Hollum.)

6Hèlaha obo atulo inyob itai te ekenita asai. Isi erre hunia hunne iyaŋunie 'to Hollum ijoriari jio hia hullo omesie 'to inyi. 7Tania, hènyihati luŋa iko aati ihuo hulia. 8Iwanata nyia itai idumele; ati ta arahan hatai a waati Lamonye, iwanata itai ifaŋan. Tania, amanyati luŋa a waati hulo afaŋan; 9nyio, afaŋan#5:9 afaŋan : igioroni omuk egierita jio, Oloholio., inyi iyaŋuno ehanita 'daŋ hunno oyiji 'to, hunno obisi 'to iko hunna arai 'to hode. 10Okiamata luŋa iyiyenuniere ariŋ enne itamunoyo 'to Lamonye. 11Alamajata jio erre asai hunne ihanie idumele, ati asalana isi 'daŋ. (12Ati, ara luŋa bebe ariri ikianari eram ono erre hunne ihanie te edidima.) 13Buo alla asalanie erre 'daŋ illet, oleyo adi ahode hode hosi 'tel 'tel; 14nyio, ariŋ 'daŋ enne italeyehini 'tel 'tel, ara afaŋan#5:14 ariŋ 'daŋ enne italeyehini 'tel 'tel, ara afaŋan : kuyya afaŋan italeyehi erre 'daŋ 'tel 'tel. inyi onno ojiarik jio

“Hajotoni, ohenyune,

ibuhu toye,

afaŋ adi Kristo jihoi.”

15Tania, ihumata imijio imanyati itai aŋai. Hèmanyati ihuo atimok hirre, ati amanyati ihuo alofiorojok. 16#Kol 4:5Ihaniete onno oyyu elle irumana itai obo ekoi, nyio, oŋitek huna hunno orrohoji 'to. 17Hèsata awaati hullo obeŋi ossi, ati omijana ariŋ anna awak Lamonye oŋida ihaniete.

18Hètarrohojiata ahuattek ta arumatio; ati, ijiara Oloholio ifut imanya hatai. 19#Kol 3:16-17Ihiji hatai, ikianati te ekenita hutto buk fureta Dafide, te edolita iko ta afureta etahabuta Hollum; idoloti afureta etahabuta Lamonye, ta atajia hatai 'daŋ. 20Ta nafure Yesu Kristo, Lamonye hohoi, oduloro esiorio ahumo jio Hollum, Monye, te erre 'daŋ.

Aŋoruo iko Habiok

21Ta abaŋi hatai Kristo, ijiara abaŋi huattek owon ihiji hatai.

22 # Kol 3:18; 1Pet 3:1 Itai aŋoruo, abaŋata habiok hatai ihuo enne ibaŋatti itai Lamonye. 23Nyio, ilohittok alle jio ŋoruoi honyi ihuo enne ilohittohori Kristo jio eluluŋ heruhok; Kristo ta ahuan honyi ara etalahani olo eluluŋ heruhok, anna ara 'to ihuo ahuan honyi. 24Tania, ijiara luŋa aŋoruo odulori abaŋi habiok hosi ihuo anna abaŋari eluluŋ heruhok Kristo.

25 # Kol 3:19; 1Pet 3:7 Itai habiok, itabuarata atajia jio aŋoruo hatai ihuo onno obuarari ataji Kristo eluluŋ heruhok, ette buo fe iye te eram honyi. 26Ihan nyia inyi eram ania, igialaniere eluluŋ heruhok jio Hollum ta agolon ono ekiana honyi. Illilla nyia inyi eluluŋ heruhok ta aari italiborori inyi, 27jio oŋida eluluŋ heruhok, te elamani iko ta alibori honyi 'daŋ, ara ahononyi; obeŋ obo epali, kuyya arrohoji, kuyya eyyau, kuyya obo ariŋ onno orroho. 28Ijiara luŋa alle itabuor ataji jio ŋoruoi honyi, ihuo onno obuarari inyi ahuan honyi. Nyio, atulo ollo obuor ataji honyi ŋoruoi, obuor buo fe ataji honyi ahuan honyi. (29Obeŋ obo atulo oliwari ahuan honyi; ati itaŋiyo inyi ahuan honyi buo fe ihum ittoŋotio inyi, ihuo enne ihaniere Kristo jio eluluŋ heruhok. 30Nyio era aŋacio huan honyi.) 31Ihuo ojio abuk Hollum, “Te eram ania, idiaharu adi alle monyonyi iko honyonyi ette inosonio iko ŋoruoi honyi, ette isi 'daŋ arrihai irahan ahuan abotie.” 32Owon elahode anna agalik 'to bebe ofioro waati jio egierita hunia, ati amijak ni jio, ikiana inyi te eram Kristo iko eluluŋ heruhok. 33Ati ikiana buo fe inyi tetai. Ijiara habiok 'daŋ itabuori atajia jio aŋoruo hosi; ijiara buo fe aŋoruo 'daŋ abaŋi habiok hosi.

Currently Selected:

Efeso 5: EA2003

Highlight

Copy

Compare