1 TIMOTEYO 4

Ettiyanak Enyabak

1Ikiana Oloholio sar sar jio, jio oŋitek huttesidi, idehini adi omuk aati neruk hosi; ette iniŋio oloholioo hunno ogesemi 'to ette buo fe ijifatio ettiyenita huno aminiaŋa. 2Enyabak agesomok ittiyenie, ettiyenita hunia. Isi hulia aati hullo oye atuajin, ihuo onno osuahi isi ta abilata onno onok 'to. 3Ittiyenie aati hulia jio, ipal iyamari buo fe iŋiyere omuk aŋiriasin. Ati oyyeu nyia Hollum aŋiriasin hunia jio, oŋida hia, hulle iruhi 'to buo fe omijani nelahode, oŋiyei ta ahumo. 4Oyiji erre 'daŋ hunno oyyeu Hollum; hèlaha ihari obo ariŋ, ati ijiara ifuotuni erre 'daŋ ta ahumo. 5Nyio, te ekiana Hollum iko ta amojo hoi ifuotu adi Hollum aŋiyo ania.

Egiamani Oloyijio olo Kristo Yesu

6Elle isio iyye ettittotia hunia jio eruhok, ira adi iyye a hegiamani oloyijio olo Kristo Yesu. Itahutak adi iyye aboloronia hoi jio ettiyenita huno eruk hohoi iko jio ettiyenita ahode hode, hunne ijifatio iyye. 7Ati, alamaja jio ekenita hunna arai asai, hunno obeŋi 'to osiruni ikianari. Ihuhuma ahuan imanyari ihuo awak Hollum. 8Oyyu eddiddoŋio huan; ati, te ekotia 'daŋ, oyyu eddiddoŋio oloholio agalik nyio, iyaŋuno inyi nesu ono ahana iko ono moi. 9Arai ekenita hunia hode, osiru luŋa iruhori isi. 10Efuto buo fe egiama bebe, nyio, eyihi jio Hollum Lesuoni, alla ara 'to a hetalahani waati 'daŋ, agalik ti hia hulle iruhi 'to.

11Ittittoye jihosi erre hunia iko ettiyenita hunia. 12Hèlaha obo jihosi iyasio iyye ta arahan hoi anyarhaluti, ati ijiara iyye ira etamijani jio eruhok te ekenita hoi, ta amanya hoi, ta abuaran taji hoi, te eruk iko ta alibori hoi. 13Oŋitek 'daŋ, oduloi ehenio, ettittoyo iko ettiyenio ekenita hutto Buk Hollum jio aati many afanyari ni. 14Hèbasak nesorio loholio onno owon 'to jihoi, ninyia ifuotu iyye to ninyia ikianarik ekianak Hollum teyye, buo fe elettaha heruhok iyabani ahas hosi jihoi. 15Ihanie erre hunia, otuhok egigilo hoi 'daŋ jihosi oŋida aati 'daŋ igonyuni abobolororo ono amanya hoi a Kristiani. 16Ihuma mijio amanya hoi iko ettiyenio hoi. Oduloi ihanio erre hunia, nyio, elle ihanio iyye ihuo nyia, italuahu adi iyye ahuan hoi iko hia, hulle itayirie 'to jihoi.

Currently Selected:

1 TIMOTEYO 4: EA2003

Highlight

Copy

Compare