1 PETRO 3

Aŋoruo iko Habiok

1 # Efe 5:22; Kol 3:18 Itai aŋoruo hunne iwanata 'to ta haŋ, oniŋiete luŋa habiok hatai; oŋida bati amanya hatai iyaŋuno neruk jio habiok hatai, hulle ihari 'to eram Hollum. Hèkianati ikoddaŋ obo eram jio habiok hatai; 2nyio, oremihini isi igonyuna ayiji manya hatai iko abaŋi hatai Hollum. 3#1Tim 2:9Hèlaha elaman hatai ara te eŋatiti ihuo, ayyeyo hofir, eyyafatio 'yeli iko aboŋojin hunno ogoli te enyiaŋa. 4Ati, ijiara atajia hatai ilamani ta anyalami iko te etoŋo dee. Inyi ania, elaman onno osio 'to 'tulaŋ, onno oyyu 'to bebe to hosiere Hollum. 5Ihuo nyia buo fe, italamani nyia aŋoruo eberien ahuattek hosi ta aniŋio hosi habiok hosi. Aŋoruo hunia hunyia abaŋi 'to Hollum buo fe iyihini 'to jihonyi. 6Ara nyia Sara ihuo nyia. Oniŋio nyia inyi Abramo buo fe iloŋo inyi jio, lettok. Ihuania, irata itai aŋarriok honyi elle ihaniete itai erre hunno oyiji 'to buo fe ibiaŋata ibaŋata obo ariŋ.

7 # Efe 5:25; Kol 3:19 Ihuo nyia buo fe, ijiara luŋa itai aliawa imanyati onno oyyu iko aŋoruo hatai buo imijana jio obeŋi isi ogoli ihuo itai. Abaŋata isi, nyio, ofuoi buo fe isi ifuotuna arabotie ikatai nesu onno olo Hollum isiarana. Ihaniete ihuo nyia, oŋida obo ariŋ obeŋ itik emojiti hatai.

Ettigemio onno Orumani te Ehanio onno Oyyu

8Ihuania, etisidok ni eram ana ta ajiaran jio: itoŋoti te egigilo abotie, igigiloti ta aati hullomuk, itabuarata buo fe itabijoto atajia jihosi, anyalamata jihosi. 9Hènienuna arrohoji ta arrohoji, kuyya emoriti te emoriti; ati, omojonia ayiji jio atulo 'daŋ elle ihanio 'to jihatai onno orroho. Nyio, eram ania ninyia iloŋuniere Hollum itai jio, oŋida bati ifuotuna jihonyi ayiji. 10Ihuo igioroni ibuk Hollum jio,

“Lia, ollo omuno 'to amanya onno oyyu,

buo fe awak irumana amuno jio oŋitek honyi,

ijiara luŋa itik aŋadief honyi jio ekenita hunno orrohoji 'to

iko jio agesemi.

11Idehina luŋa neyyata, ihaniete luŋa erre ayijok;

ottifiati luŋa nelik tajia ta atajia hatai 'daŋ.

12Nyio, omijio Lamonye abisak,

buo fe itayirio jio emojiti hosi;

buo iha aati hulle ihanie 'to eyyau.”

13Ŋai adi oremik iriafuna itai, elle ikiamata itai bebe ihaniere erre ayijok? 14#Mat 5:10Duadi bu irumana itai ettigemio te ehanio hirre ayijok, osiru adi itai amiji! Hèbaŋata obo atulo, hèhawwati. 15Ati ijiara atajia hatai abaŋi Kristo. Itahabuyete inyi a Lamonye. Oŋitek 'daŋ, ihuhumata ahuattek itarraŋiere elle efiyo obo atulo itai eram ono eyihina attanatai. 16Itarraŋata ta anyalami iko ta abaŋi oŋida egigilita hatai olibori. Te ekoi ania, anyahini adi ariri aati hulle ikianai 'to onno orroho te eram ono ayiji manya hatai, a hejifak Kristo. 17Nyio, alla ara awahan ono Hollum ania, iyyak irumaniere ettigemita te ehanio hirre ayijok, buo obiaŋara te ehanio hirre arrohojak. 18Nyio, te eram ono eyyata waati 'daŋ, oye nyia Kristo enyiahi abotie ijiai. Oye nyia abisani te neram ono eyyak jio, oŋida bati inyi eyaru hohoi jio Hollum. Ninyia ottohorik Kristo, ara nyia inyi atulo; buo ninyia itubuhu Hollum inyi, ara inyi oloholio. 19Buo ta arahan honyi oloholio olo inyi nyia ittittoyo jio oloholioo hunyia ifitani ibabus. 20Oloholioo huno aati hunyia obeŋi 'to oniŋie Hollum to ninyia odihari Hollum isi dee, jio oŋitek hunyia ihuhumiere Noa atogol. Owoni nyia aati kaiyo itua atogol nyia, aati hottohunik ijiai hunyia italuahuni. 21Arai nyia aari hua ihuo batisimo enne italahu 'to itai ihuania, onno obeŋ 'to ara ellillai ono eboti otto huan. Ara inyi attana Hollum jio oŋida bati ewon iko egigilo onno oyyu. Italahu batisimo itai te ebuhuna ono Yesu Kristo, 22linyia alo 'to idou. Owon inyi ihuania iŋati iŋet Hollum. Ara inyi elettok olo ajilohien 'daŋ, buo fe a holo egoliti iko eduariti hutte ihiji idou iko afau.

Currently Selected:

1 PETRO 3: EA2003

Highlight

Copy

Compare