1 PETRO 4

Iloitoto Amanya Hatai

1Orumak nyia Kristo ettigemita ifau dini. Ihuania, ihuhumata luŋa ahuattek irumaniere ettigemita ihuo inyi. Nyio, itahutak arumana ettigemita jio, idehina itai eyyautta. 2Ihuania many ahosiere, amanyati oŋitek hatai hunna harasari 'to ihuo awak Hollum buo obiaŋara ihuo ojiori ewahiti hatai. 3Berien, ituhonia nyia itai oŋitek hatai arriai imanyari ihuo atimok Hollum. Iwahata nyia itai bebe bebe erre somon, asilara, arumatio, agarihien huno arumatio iko ehanita hirre somon. Itahabuyete nyia itai arijorihien jiohin hunno orrohoji 'to. 4Ihuania, illillihai atimok Hollum ta abiaŋan hatai ittubanio ikosi imanyari asai asai; ania, omorierek isi itai. 5Ati, te eram ono ehanita hosi hunia, ofuonni adi isi itarraŋ Hollum, aŋotoni hiram ono esuok iko ayaak. 6Inyi buo fe ninyia ittittoyerek Asayyo Ayijok jio ayaak jio, oŋida bati oloholioo hosi amanyai ihuo awak Hollum; ara duadi bu oŋoti eram hosi ihuo ono esuok.

Igiamatti Esiorita Hollum onno Oyyu

7Iliaha esidi hirre 'daŋ. Ottoŋotiete ahuattek hatai onno oyyu, ihumata iŋa ossi hatai oŋida imojoti onno oyyu. 8Jio hunia 'daŋ, ijiara luŋa abuaran taji odulo iwanan ihiji hatai; nyio, oremik abuaran taji imuluhana eyyata arriai. 9Ifuotuttati aati ihaŋitek hatai, buo ibiaŋata iŋuŋusiati. 10Te efuotuna hatai 'daŋ ababo esiorita Hollum gele gele; igiamatti luŋa isi onno oyyu, iluahiere aati hullomuk. 11Ijiara luŋa ettittoni, ittittoyo asayyo Hollum; buo egiamani, igiama luŋa ta agolon enne isiarak Hollum jihonyi. To Yesu Kristo, ijiara erre 'daŋ hunne ehanio iyaŋunie olohuo jio Hollum, ollo owon 'to iko akuatan buo agolon 'tulaŋ, 'tulaŋ. Amen.

Arumana Ettigemita ta Arahan a Kristiani

12Illarak iko haniyarak hoŋ, hèllillihati eram ono ettigemio onno omi 'to ania onno okemierek itai, ihuo obo ariŋ onno olufa jio amanya hatai. 13Ati, omunoti jio irumana itai ettigemita ihuo Kristo jio, oŋida bati ifuatta buo fe ifuotuna amuno onno obolo alla afuonni italeyehina akuatan honyi. 14Omunoti alla amorie itai te eram Kristo, nyio, itahutak ania jio iwanata itai iko Oloholio Hollum anna agalik 'daŋ ta ayiji. 15Hèlaha obo jihatai orumak ettigemita ta arahan a hattohoni kuyya olohoho, kuyya olorroho kuyya olodiefer. 16Buo elle ittigemie iyye ta arahan hoi a Kristiani, hèloriri; ati isiarak ahumo jio Hollum ta arahan hoi a holo Kristo.

17Attuba asaa enne itteriere Hollum aŋocio hiram waati honyi. Elle itterio buo inyi jihohoi, olo 'tadi inyi irahan aŋai jio hia, hullo obeŋi 'to iruhi Asayyo Hollum Ayijok? 18Ihuo igioroni ibuk Hollum jio,

“Ogol italahuniere ayijok;

iduoŋ 'tadi anyio jio eyyak hulle ihari 'to Hollum?”

19Tania, ijiara hia, hullo orumani 'to ettigemita ihuo awak Hollum, odulori ehanio onno obis, buo fe iyihini jio Ayyani hosi, ollo ogottiere 'to ecorit honyi.

Currently Selected:

1 PETRO 4: EA2003

Highlight

Copy

Compare