1 PETRO 2
2
Afau Elibo
1Tania, idehina emanyiti hatai hunno orrohoji 'to 'daŋ! Idehina agesemi, etihanio huattek, ahaini iko etarrohojo fureta waati. 2Isatta ihuo olodolioo; awahata aale huno oloholio hunne ilamani, amatata isi oŋida iboloroto, ittata italahuno. 3Ihuo ojio Abuk Hollum jio, “Igonyuna itai ayiji ono Lamonye.”
4Ifuanna jio Lamonye, alla ara 'to ihuo amoruo enne isu 'to. Ihari nyia aati inyi jio ara ariŋ asai, buo Hollum ette inyimuna inyi ariŋ anna agalik ta ayiji. 5Isata buo fe ihuo amoruoi hunne isui 'to hunno oduhoniere Oloholio aaji, enne ifuatti itai irari a hehumak aliborok; isioriere ehumita loholio hunne ifuotu Hollum to Yesu Kristo. 6Nyio, ojio abuk Hollum jio,
“Anyimu ni amoruo anna agalik 'to ta ayiji;
ehanak ni inyi etawoji ono agul Sayon.
Obeŋi adi itaŋarijoni lia, elle iruk 'to jihonyi.”
7-8Tania, jihatai hulle iruhoto 'to, oyyu amoruo ania agalik; buo jio hullo obeŋi 'to iruhi, ojio Abuk Hollum jio:
“Amoruo ninyia ihari aduhok jio ara ariŋ asai,
inyiak tibuo inyi igalihina 'daŋ ta ayiji…
Ara amoruo ania, ekosoni waati;
inyi onno olo 'to itakuahio isi.”
Ikosio adi amoruo ania isi, ta abiaŋan hosi iruhi ekiana Hollum; nyio, awak Hollum hétera jihosi ihuo nyia.
9 #
Tit 2:14
Ati, irata itai a waati olonyimot, a hehumak Hobu, buo fe a waati aliborok. Aati Hollum, hullo onyimuni iramaniere ehanita Hollum hunne iyaŋunie 'to ellilliha. Hollum nyia iloŋu itai tedumele jio afaŋan honyi enne ilaman 'to bebe. 10Berien, ibiaŋata nyia itai irata awaati Hollum, ati ihuania irata itai a hulonyi. Berien buo fe, ibiaŋata nyia itai imijana amehino Hollum, ati ihuania ifuotuna itai amehino honyi.
Apiti Hollum
11Attana ni itai, illarak iko haniyarak hoŋ; itai hulle irata 'to aterejok buo fe ihuo afuhok jio afau ana! Idehina ewahiti huattek hunno odulori 'to aŋalafa iko oloholioo hatai. 12Oduloro imanya onno oyyu ihiji Lufajak, duadi bu ikianai isi jio ipali ehanita hatai. Ofuoi adi isi luŋa igonyuna ayiji ono ehanita hatai, ette itahabuyo Hollum Iholoŋ onno ottuniere inyi.
13Te eram ono Lamonye, oniŋiete elettaha gala 'daŋ; agalik ti Hobu elle ittokon, alla agalik elohittok honyi 'daŋ. 14Oniŋiete buo fe a mondiri hulle ifahu Hobu elle ittokon ittigemiere epalak iko itamunoyere aati hulle ihanie onno oyyu. 15Nyio, awak Hollum itai itaduahina atimok hullo obeŋi hossi, te ehanio onno oyyu. 16Amanyati a waati hulle ibiaŋata 'to irata apiti. Hèlaha luŋa amanya hatai ania, ara eliet ihaniere epalita; amanyati apiti hulo Hollum. 17Abaŋata aati 'daŋ, itabuarata atajia jio eruhok hullomuk, itahabuyete Hollum, abaŋata buo fe Hobu elle ittokon.
Etamijani ono Ettigemita Kristo
18Jihatai egiamak, oduloro luŋa aniŋio elettaha hatai buo fe ibaŋata isi. Ihaniete ihuo nyia jio hullo oyiji 'to, hulla anyalami 'to jihatai iko jio hullo orrohoji 'to jihatai. 19Elle idihuna itai ettigemita hunno obeŋi 'to osiruni tetai ta amijana hatai awahan Hollum, isiarak adi inyi jihatai ayiji te eram ania. 20Anyio yiji 'tadi enne irumana itai, elle idihuna itai abahio te ehanio hatai epalita? Ati, isiarak adi Hollum jihatai ayiji elle idihuna itai ettigemio enne irumana itai te ehanio hatai onno oyyu. 21Inyi ania eram ninyia iloŋuniere Hollum itai; nyio, ittigemie nyia Kristo tetai jio, oŋida ara jihatai etamijani jio, oŋida bati itai ijifatiete ehanita honyi. 22Obeŋ nyia inyi ihan obo eyyau, buo fe obo agesemi obeŋ ottu to hutuk honyi. 23Ninyia omorierek inyi, obeŋ nyia inyi inienu. Ninyia ittigemierek inyi, obeŋ nyia inyi itabaŋ obo atulo; ati, iyihi nyia inyi jio Hollum, aŋotoni hiram ollo obis 'to. 24Iwwaharu nyia Kristo eyyata hohoi ihuan honyi to ninyia isihonierek inyi ikruce jio, oŋida bati ebeŋ enyiak iyyautta, ette imanya ta abisan. Itaŋidari itai ta atoŋos honyi. 25Isiabitati nyia itai ihuo akioro, ati ihuania inyiahunie itai ijifatiere Eyyahani alla ara buo fe a Hattoŋoni loholioo hatai.
Currently Selected:
1 PETRO 2: EA2003
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in South Sudan 2003
