Popular Bible Verses from 1 PETRO 2

Share

Ati, irata itai a waati olonyimot, a hehumak Hobu, buo fe a waati aliborok. Aati Hollum, hullo onyimuni iramaniere ehanita Hollum hunne iyaŋunie 'to ellilliha. Hollum nyia iloŋu itai tedumele jio afaŋan honyi enne ilaman 'to bebe.

Iwwaharu nyia Kristo eyyata hohoi ihuan honyi to ninyia isihonierek inyi ikruce jio, oŋida bati ebeŋ enyiak iyyautta, ette imanya ta abisan. Itaŋidari itai ta atoŋos honyi. Isiabitati nyia itai ihuo akioro, ati ihuania inyiahunie itai ijifatiere Eyyahani alla ara buo fe a Hattoŋoni loholioo hatai.

Berien, ibiaŋata nyia itai irata awaati Hollum, ati ihuania irata itai a hulonyi. Berien buo fe, ibiaŋata nyia itai imijana amehino Hollum, ati ihuania ifuotuna itai amehino honyi.

Isatta ihuo olodolioo; awahata aale huno oloholio hunne ilamani, amatata isi oŋida iboloroto, ittata italahuno.

Attana ni itai, illarak iko haniyarak hoŋ; itai hulle irata 'to aterejok buo fe ihuo afuhok jio afau ana! Idehina ewahiti huattek hunno odulori 'to aŋalafa iko oloholioo hatai. Oduloro imanya onno oyyu ihiji Lufajak, duadi bu ikianai isi jio ipali ehanita hatai. Ofuoi adi isi luŋa igonyuna ayiji ono ehanita hatai, ette itahabuyo Hollum Iholoŋ onno ottuniere inyi.

Isata buo fe ihuo amoruoi hunne isui 'to hunno oduhoniere Oloholio aaji, enne ifuatti itai irari a hehumak aliborok; isioriere ehumita loholio hunne ifuotu Hollum to Yesu Kristo.

Tania, idehina emanyiti hatai hunno orrohoji 'to 'daŋ! Idehina agesemi, etihanio huattek, ahaini iko etarrohojo fureta waati.

Ifuanna jio Lamonye, alla ara 'to ihuo amoruo enne isu 'to. Ihari nyia aati inyi jio ara ariŋ asai, buo Hollum ette inyimuna inyi ariŋ anna agalik ta ayiji.

Amanyati a waati hulle ibiaŋata 'to irata apiti. Hèlaha luŋa amanya hatai ania, ara eliet ihaniere epalita; amanyati apiti hulo Hollum.

Nyio, awak Hollum itai itaduahina atimok hullo obeŋi hossi, te ehanio onno oyyu.