1Korinto 9

Asaŋ hunno Osiruni a huno Elefahata iko Egemita Honyi

1Obeŋi soho aŋatani nani ihaniere ihua awak ni? Abeŋ soho ni ara elefahata? Habeŋ soho ni egonyu Yesu, Lamonye hohoi? Obiaŋara soho itai irata etamijani ono egiama hoŋ jio Lamonye? 2Ara ni jihatai elefahata, duadi bu abeŋ ni ara jio aati hullomuk. Nyio, irata itai emoi ono egiama hoŋ elefahata jio Lamonye.

3Elle ikianai aati onno orroho jihoŋ, efau ni ahuan hoŋ ihua ana: 4Obeŋ ti aŋiyo iko amata osiru jihoŋ te egiama hoŋ? 5Obeŋ ti inyi osiru jihoŋ iyemuniere aŋotte Kristiani ette leten ikonyi jio amomoriyahien hoŋ, ihuo enne ihanierek lefahat hullomuk iko illarak Lamonye buo Petro? 6Kuyya oŋida ti ani iko Barnaba hama egemu asaŋ hohoi igemuna? 7Hulali oseŋer hulle igiamai buo inyiahi duma ahuattek hosi? Hulali aromok hullo obeŋi 'to oŋiye aaŋer fino hutta matta hosi? Hulali eyyahak hullo obeŋi 'to amatai aale kioro hosi?

8Ofuonni soho erre hunne ekiana ni hunia to hou hoŋ? Obeŋi soho Efahita buo fe ikianai tesi? 9#1Tim 5:18Igioroni Ifahita Mose jio, “Hèttuhoto etuk 'tamot elle igisa inyi emma.” Ikiana soho Hollum te eram 'tamoti? 10Obeŋ soho inyi ikiana te eram hohoi luŋa? Hode, igioroni nyia te eram hohoi. Ijiara aromoni iko adioŋoni ihanie egiama hosi buo iyihini ifuotuniere omuk jio emma hua. 11#Rom 15:7Eyehi nyia hohoi erre huno Oloholio Hollum itajia hatai. Orroho ti inyi elle edeŋu hohoi erre afau ana jihatai? 12Alla asiru eyihina jio aati hullomuk ifuotuniere asaŋ hunia jihatai, obeŋ 'tadi ihum isiruna jihohoi?

Ati ebas hohoi ehanio ihuo nyia. Ati edihu hohoi erre 'daŋ jio ŋadi hohoi ehan obo ariŋ enne itik 'to ettittoyo ono Asayyo Ayijok huno Yesu Kristo. 13Itimoti itai jio hia hulle igiamai 'to Ihaji emojit enne ittokon orumani isi aŋiyo hosi diya; buo fe hia hulle isiorie 'to ehumita ititiek, obuanyuttai hunosi teya? 14#Mat 10:10; Luk 10:7Ihuo nyia buo fe ihum Lamonye iramana jio, ijiara hia hulle ittittoye 'to Asayyo Ayijok, orumani aŋiyo hosi tesi.

15Ati ebas ni ehanio ihuo nyia. Abeŋ buo fe ni egiorok awaraga ana imojori erre ihuo hunia. Osiru jihoŋ iyeri agalik, jio obo atulo ittaŋari nani addi jio ariŋ enne etadarari ni. 16Obeŋ osiru jihoŋ itadarari te ettittoyo Sayyo Ayijok. Nyio, Hollum nyia iramak nani ittittoyere. Orroho duo jihoŋ bebe alla abeŋ nyia ni ettittoyo Asayyo Ayijok. 17Elle ehan nyia ni egiama hoŋ ta ahou hoŋ, odumai duo fe nani. Ati egiama ni egiama ninyia isio Hollum ihas hoŋ. 18Anyio edumit 'tadi anna arumak ni? Edumit nyia ana; ittittoyere Asayyo Ayijok buo abeŋ etaduma, abiaŋan mojo erre hunno osiruni 'to jihoŋ imojori te ettittoyo hoŋ Asayyo Ayijok.

19Abeŋ ni ara apit olo obo atulo ati, ehanak ni ahuan hoŋ apit olo aati 'daŋ jio, oŋida bati aati arriai iruhi. 20To ninyia amanyari ni iko Yudei, amanya nyia ni ihuo isi jio, oŋida bati isi iruhi amanya a Kristiani. Ninyia amanyari ni iko ejifak Ifahita, amanya nyia ni ihuo awahi Efahita hunia; duadi bu obeŋi isi arai toni, jio, oŋida bati aati iruhi amanya a Kristiani. 21Ihou nyia buo fe, ninyia amanyari ni iko hia hullo obeŋi 'to ijifatie Efahita, amanya nyia ni ihuo isi abeŋ ejifatio Efahita; jio, oŋida bati isi iruhi amanya a Kristiani. Ati obeŋ ania itahutak jio, abeŋ ni abaŋ Efahita Hollum; ejifatio ni luŋa efahita Kristo. 22Ninyia buo fe amanyari ni ihiji waati hullo obeŋ neruk hosi ogol, amanya nyia buo fe ni ihuo isi; jio, oŋida bati isi iruhi amanya a Kristiani. Atuk ni emanyiti 'daŋ jio, oŋida bati nani etaluahu omuk jihosi te ekotia 'daŋ hunna aremik ni imanya.

23Ehanio ni erre hunia 'daŋ te eram Sayyo Ayijok jio, oŋida nani efuotu eyijiti hunne iyaŋunie Asayyo hunia. 24Itimoti ti itai jio, jio aŋettio, arracari afejak arriai, ati atulo abotie ijiai jihosi ifuotu esiorio? Tania, oŋioroto luŋa oŋida bati ifuotuna esiorio nyia. 25Olofeja 'daŋ elle ittiyenie arracita, ihum inyi niŋio erre 'daŋ. Ihanio inyi ihuo nyia ifuotuniere esiorio onno obeŋ 'to osio 'tulaŋ; buo ehanio ihuo nyia, ifuotuniere esiorio onno osio 'to 'tulaŋ. 26Inyi anna aŋiorori ni fir fir many isidi, inyi buo fe anna arari ni ihuo atulo bunia ollo obeŋ 'to ittarrohojak ettuditi honyi. 27Etagol ni ahuan hoŋ te ettuditi buo fe attoŋ inyi 'tid 'tid jio, ŋadi ittaŋari nani addi jio aŋettio ania ninyia eloŋuniere ni aati hullomuk.

Currently Selected:

1Korinto 9: EA2003

Highlight

Copy

Compare