1Korinto 8

Eram ono Aŋiyo enne Isiori jio Arrijiorita Jiohin

1Alla ara eram ŋiyo enne isiori jio arrijiorita jiohin ninyia igioronia itai:

Emijak 'daŋ jio, “Ewon 'daŋ iko olofioro.” Ati iyaŋunie olofioro hunia etadara, buo abuaran taji iyaŋuno agolon. 2Elle igigilo obo jio amijak inyi obo ariŋ, hobeŋ tibuo inyi luŋa omijak ariŋ nyia ihuo oremik inyi imijana. 3Buo alla abuor ataji obo atulo Hollum, omijak buo fe Hollum inyi.

4Tania, alla ara eram ono aŋiyo hirre hunne isiori jio arrijiorita jiohin: emijak jio obeŋi arrijiorita hunia arai arrijiorita jiohin hunna arai hode. Emijak buo fe jio owon Hollum abotie ijiai. 5Duadi bu ojiori owoni “ajiohin” hunia idou kuyya ifau, duadi bu owoni “ajiohin” hunia arriai iko “ajiohin huttehiji fau iko edou;” 6ati jihohoi, owon Hollum abotie ijiai, Monye hohoi, Layyani hirre 'daŋ, elle isio 'to jihohoi nesu. Owon buo fe Lamonye abotie ijiai; inyi Yesu Kristo, linyia oyyeuni erre 'daŋ tenyi, buo fe esu tenyi.

7Ati obeŋi aati 'daŋ omijani eram ania. Amohini omuk aati jio eram ono arrijiorita jiohin. Many ahana, alla anyai isi aŋiyo ania, harasai isi igigilo jio ara aŋiyo ania ahono arrijiorita jiohin. Omuta egigilo hosi nyio, igigiloi isi jio itibot aŋiyo ania isi. 8Ettallik itayyu amanya iko Hollum te eram ŋiyo; obeŋ obo ariŋ obiaŋarak hohoi elle ebeŋ eŋiyo; buo fe riŋ obeŋ ofonihino elle eŋiyo.

9Ati, ihumata mijio, hèlaha amanya enne imanyatti itai ihuo iwahata itai, itakuaha hia hullo obeŋ neruk hosi ogol. 10Elle igonyu obo atulo, ollo obeŋ eruk honyi ogol iyye atulo “lofioro”, iŋiyo ihaji enne ittokon ono arrijiori jiok, obeŋ 'tadi ehanio ania isusuhi inyi iŋiyere esiorita hunne isiori jio arrijiorita jiok? 11Tania, illahoi alia ollo obeŋ neruk honyi ogol, linyia oye buo fe Kristo tenyi, oye adi to “Olofioro” hoi hunia! 12Tania, iyyau iyye jio Kristo te eyyauna hoi jio Kristiani buo fe ittarroho neruk hosi onno obeŋ 'to ogol. 13Tania, elle iyaŋuno aŋiyo eyyau jio eruhoni, ettallik ni inyiak ŋiyo eriŋo, nyio, ŋadi obo jio eruhok hulia ette iyyauna.

Currently Selected:

1Korinto 8: EA2003

Highlight

Copy

Compare