1Korinto 14

Ottifiati Esiorita hunne Iyaŋuno Loholio

1Ottifiati abuaran tajia. Otuhonia atajia jio esiorita huno Loholio, agalik ti irari a hekianak Hollum. 2Hia hulle ikianai 'to te etuhe hunno olufaji, obeŋi isi ikianai jio ati, ati ikianai isi jio Hollum. Nyio, obeŋ tulo omijak erre hunne ikianai isi. Ta agolon ono Loholio, ikianai isi elahode onno obeŋi omijani. 3Buo, hia hulle ikianai 'to eram Hollum, ikianai isi jio aati, iluahiere isi, iko itagoliere isi buo fe itilihiere atajia hosi. 4Hia hulle ikianai 'to te etuhe hunno olufaji, oluaharai isi ahuattek hosi hama. Ati, hia hulle ikianai 'to eram Hollum, oluahi isi eluluŋ heruhok 'daŋ ta amaji. 5Awak duo ni itai 'daŋ ikianati te etuhe hunno olufaji; ati, awak ni luŋa itai iwanata iko agolon ikianari eram Hollum. Nyio, agalik atulo elle ikiana 'to eram Hollum, atulo elle ikiana 'to te etuhe hunno olufaji…arari fe alla awon obo atulo ollo oremik 'to iramana awoyo hiram ania iluahiere eluluŋ heruhok ta amaji 'daŋ. 6Tania, illarak hoŋ iko haniyarak hoŋ, alla attu ni jihatai buo ekiana te etuhe hunno olufaji, aŋai 'tadi aluak ni itai? Ettallik ni iluak itai duadi bu obo kai, arari fe elle iyaŋuno ni omuk asayyo hunne italeyehi Hollum kuyya omuk ofioro kuyya omuk ekenita Hollum kuyya omuk ettiyenita.

7Ike imijata erre ihuo aciwal kuyya olokome hunno obeŋi 'to isui, alla abeŋi ihumi ihut kuyya ihumi irrib, aŋai 'tadi oremehini imijana anani ehutit kuyya erribi nyia? 8Buo alla abeŋ attihoni ottik edoŋ onno oyyu, omijani 'tadi aati aŋai jio owon erumita? 9Ihuo nyia buo fe, elle ikianati itai te etuhe hunno olufaji 'to erre hunno obeŋ tulo oremik imijana, aŋai 'tadi omijani ikianati itai anyio? Ohutaru adi oyyami ekenita hatai. 10Ifau dini, owoni ekenita arriai hunno olufaji, ati owoni isi 'daŋ awoi rami hosi. 11Ati, alla atimo ni etuk enne ikianai isi, ara ni aŋulatanani jihosi buo fe isi arai aŋulak jihoŋ. 12Ihuania, ta awahan hatai bebe esiorita Loholio, ihumata ti igiamari onno oyyu esiorita hunno itagolie 'to eluluŋ heruhok.

13Tania, atulo elle ikiana 'to te etuhe hunno olufaji 'to, ijiara omojo ifuotuniere agolon itahuciere ojio ekiana honyi anyio. 14Nyio, alla amojo ni te etuhe hunno olufaji 'to, oloholio hoŋ onno omojo 'to ania, buo ahou hoŋ obeŋ teya. 15Ehan 'tadi ni anyio? Amojo adi ni to oloholio hoŋ iko ta nahou hoŋ. Edolo adi ni to oloholio hoŋ iko ta nahou hoŋ. 16Elle isiorio iyye ahumo jio Hollum to oloholio ijiai, aŋai 'tadi oremik lia elle imojoti 'to iko iyye jiaran, “Amen” jio amojo hoi ania, buo inyi otimo ekenita hunne imojori iyye? 17Duadi bu oyyu esiorio hoi jio Hollum, obeŋ amojo hoi ania oluak luŋa atulo ollobo alia.

18Esiarak ni ahumo jio Hollum te ekiana hoŋ te etuhe hunno olufaji agalik itai 'daŋ. 19Ati alla amojo ni iko eluluŋ heruhok, oyyu luŋa jihoŋ ikenuniere omuk ekenita miyet ijiai, hunno oremehini aati imijana, ittiyeniere aati hullomuk. Agalik ania etabolorio hiram te etuhe hunno olufaji.

20Illarak iko haniyarak hoŋ, hègigiloti ihuo aduri, igigiloti ihuo aati hulle ittaha; buo itimoti eyyau ihuo aduri.

21Igioroni Ibuk Hollum jio,

“Ojio Lamonye, ekiana adi ni jio aati hoŋ

ta aati hulle ikianai 'to te etuhe hunno olufaji 'to.

Ekiana adi ni te etuhe ŋulak,

duadi bu ihuo nyia, odulori adi aati hoŋ ehara etaniŋio jihoŋ.”

22Tania, ara ekiana te etuhe hunno olufaji 'to, etamijani jio aati hullo obeŋi 'to arai a heruhok, buo obiaŋara jio eruhok. Buo ekiana sayyo Hollum ara etamijani jio eruhok, buo obiaŋara jio aati hullo obeŋi 'to arai a heruhok.

23Buo alla attubanie ti eruhok 'daŋ arabotie imojori, attati 'daŋ ikiana te etuhe hunno olufaji 'to, buo alla afuonni omuk aati hullo obeŋi ikianai etuhe hunno olufaji kuyya hullo obeŋi arai a heruhok, obeŋi 'tadi isi ojiori jio isitajata itai? 24Ati elle ikianati itai 'daŋ eram Hollum, buo alla afuonni omuk aati hullo obeŋi 'to arai a heruhok kuyya hullo obeŋi 'to ikianai etuhe hunno olufaji, iruhoni adi isi eyyata hosi te etayiruna hosi ekenita hunne ikianati itai. Eram enne itayiruni isi adi oŋot eram hosi. 25Asalanie adi egigilita hutto tajia hosi. Origoŋi adi isi ette imojo jio Hollum, ette ipulonia jiojio, “Owon Hollum hode ihiji hatai!”

Ekotia Mojo hunno Oluahie 'to Eluluŋ Heruhok

26Illarak iko haniyarak hoŋ, eram ana anna ajio ni; Elle ittubaniete itai imojo, ijiara obo ara a hedoloni, buo obo a hettiyanani, buo obo ikiana erre hunne italeyehi Hollum, buo obo ikiana te etuk onno olufa 'to, buo obo ara a hetahutani hirre hunne ikianai te etuhe hunno olufaji. Ijiara luŋa erre 'daŋ arai eluahiti iluluŋ heruhok. 27Alla awak obo ekiana te etuk onno olufa 'to, ijiara ati luŋa isi arai arrihai kuyya hunihoi. Ijiara isi itarutai ekiana itaruta, buo obo hama itahutatta awoyo hirre hunne ikianai isi. 28Buo alla abeŋ tulo elle itahutatta erre hunia, ijiara luŋa hia hulle ikianai 'to te etuhe hunno olufaji oduai lioo. Ijiara ikianai itajia hosi iko jio Hollum. 29Ijiara ekianak Hollum arrihai kuyya hunihoi ikianai, buo hullomuk oŋoti eram enne ikianai isi. 30Buo elle italeyehi Hollum obo eram jio obo atulo teger hoi, ijiara luŋa lia, elle ikiana 'to jio asaa nyia oduahino. 31Iremehina itai 'daŋ ababo ikiana eram Hollum jio, oŋida aati 'daŋ ababo ittiyenuni ette igolon. 32Ijiara lia, ollo owon 'to iko agolon ikianari eram Hollum, ogottiere inyi onno oyyu. 33Nyio, obeŋ Hollum awak emanya asai asai, ati awak inyi oŋida emanya onno oyyu iko te nelik tajia.

Ihuo anna arari inyi iluluŋi 'daŋ huno aati Hollom, 34ijiara aŋoruo oduai 'liŋ 'liŋ to masik imojotti. Nyio, obeŋi aŋatani isi ikianari; ihuo onno ojiarik Efahita Yudei jio, hèlaha isiori jihosi elohittok. 35Alla awon obo ariŋ anna awahi isi imijana, ijiara isi ofuoi ifiyo habiok hosi ihaŋitek hosi. Nyio, oso ariri jio aŋotte ikianari ihiji iluluŋ heruhok. 36Anyio riŋ! Itterio nyia ekiana Hollum jihatai? Kuyya itai nyia hama hulla afanyari inyi? 37Elle igigilo obo jihatai jio ara inyi ahekianani Hollum, kuyya awon inyi iko esiorio Loholio, ijiara inyi luŋa iruhok jio, arai erre hunne egiorok ni hunia jihatai, efahita Lamonye. 38Buo alla abeŋ inyi iruk, hèruhoto buo fe eram honyi.

39Tania, illarak iko haniyarak hoŋ, otuhonia atajia hatai ittittoyere eram Hollum, hètihoto ekiana te etuhe hunno olufaji. 40Ijiara ihanie erre 'daŋ onno oyyu iko te ekoi onno obis.

Currently Selected:

1Korinto 14: EA2003

Highlight

Copy

Compare