Rom 1

1Yɛn Paulo, lïm de Yecu Kërtho, raan cï cɔɔl, an, bï aa tuc, raan cï tɔ̈ɔ̈u pei në këde wëlpiɛth ke Nhialic.

2Wëlpiɛth cï kɔn tɔ lueel ë tïtke në kacïgɔ̈ɔ̈r yiic ka ɣeriic. 3Wëlpiɛthkë ee ka ke Wënde, raan cï dhiëëth ë dhiën ë Debid kuɛɛrë në këde guöp, 4ku cï tïc në riɛl dït nɔn ee yen Wën ë Nhialic, në këde Wëi ke ɣɛɛrëpiɔ̈u, në jön cï en rɔt jɔt ë kɔc cï thou yiic, yen Yecu Kërtho Bɛ̈nydïïtda, 5raan cï wo tɔ yök dhuëëŋdepiɔ̈u, ku yökku tuöc cï wo tooc, në luɔi bï kɔc wël aa piŋ ku gamkï keek ë juöör yiic kedhie, në baŋ de rinke. 6Ku week aya, wek nu ë keyiic, wek kɔc cï cɔɔl, bäk aa kɔc ke Yecu Kërtho.

7Wek kɔc nu Roma wedhie, kɔc nhiɛɛr Nhialic, ku cï we cɔɔl, bäk aa kɔc ɣerpiɔ̈ɔ̈th. Ë dhuëëŋdepiɔ̈u tɔ̈u ë weyiic kekë mät, ë ke bɔ̈ tëde Nhialic Wääda kekë Bɛ̈nydït Yecu Kërtho.

Lɔ̈ŋ de Athiɛɛi

8Cöök tueŋ ka, yɛn lec Nhialicdï në Yecu Kërtho ë biäkdun week wedhie, luɔi cï gämdun lueel ë piny nɔm ëbɛ̈n. 9Nhialic, Raan aa luööi në wëikï në wëlpiɛth ke Wënde, yen aye cäätɔdï, në luɛl aa yɛn cool ë luel këdun acïn pëk ë lɔ̈ŋdïyic, 10yɛn ee cool ë lɔ̈ŋ, nɔn bï en dɛ të bän week kɛ̈ny ë keny piɛth ëkööl bï rɔt yök në këde piɔ̈n ë Nhialic, aguɔ bɛ̈n tëde week. 11We cä tak adï tiëŋ week, aguɔ we miɔɔc ë kë de wëi, kë bï we tɔ kääc aril. 12Yen aye kë bï wo muk piɔ̈ɔ̈th wokë week ëtök, në gäm cï wo gam wodhie, gämdun week ayï gämdï.

13 # Luɔi 19:21. Ku yɛn de piɔ̈u luɔi ŋiɛc en week, wek mïthëkɔckuɔ, nɔn cän e lueel ë yapiɔ̈u raanjuëc në bɛ̈n bän bɛ̈n tëde week, ku yɛn cï pëën aɣet cï ënɔɔnë, yɛn kɔɔr kë bï luɔk ë weyiic ayadäŋ, acït man cän e yök ë juöör kɔ̈k yiic. 14Ayï Girikii ayï juöör cëŋ ë ciɛɛŋden, ayï kɔc pelnïïm, ayï kɔc kuc wël, këden anu ë yayeth. 15Yen tëde ka, yɛn cïï duëër jai, yɛn duëër wëlpiɛth guiëër week aya, wek kɔc nu Roma.

Riɛl de Wëlpiɛth

16 # Mak 8:38. Yɛn cie yäär në baŋ de wëlpiɛth ke Kërtho, kek aye riɛldïït ë Nhialic riɛl ë raan kony wëi ëbɛ̈n raan cï gam, gɔl ë Judai, mɛt Girikii thïn aya. 17#Ɣab 2:4. Piathëpiɔ̈u bɔ̈ tëde Nhialic acï nyuɔɔth ë wëlke yiic në gäm bï kɔc gam, acït man cï e gɔ̈ɔ̈r an, “Raan piɛthpiɔ̈u abï aa pïïr në gäm.”#1:17: raan piɛthpiɔ̈u abï aa pïïr në gäm; nɔn raan piɛthpiɔ̈u kekë Nhialic abï pïïr në gäm.

Reec de Raan

18Ku agönhdïït ë Nhialic agönh bɔ̈ nhial acï nyuɔɔth ë baŋ de reec reecë kɔc Nhialic gam ku baŋ de luɔi rɛɛc ee kɔc looi, kɔc ë yic waan ciëën në rac de kekpiɔ̈ɔ̈th. 19Kë duëërë kɔc ŋic në këde Nhialic acï jɔ lɔ gɔk tëde keek, acïï Nhialic nyuöth keek. 20Ka ke Nhialic ɣɔn ciɛk ë piny, ka cïï duëërë tïŋ, ka cït riɛldɛn thɛɛr, ku luɔi ee yen Nhialic, kakë aye ke ŋic ëgɔk, aye ke ŋic në ka cï cuëëc. Ku acïn kë bï kek röt kɔ̈c, 21#Epe 4:17,18. ku të ciɛk kek Nhialic ŋic, ka cïkï ee riëëu ë riëëu ee Nhialic riëëu, ku cïkï ee leec, acïk aa kɔc ee ɣɔ̈ric tak ë kepiɔ̈ɔ̈th, ago piɔ̈ndɛn piɔl ago cuɔl ëcut. 22Aake ye röt tɔ ye kɔc pelnïïm, ku acïk aa kɔc piɔlpiɔ̈ɔ̈th, 23#Nyöŋ 4:16-18. ku aake ye dhuëëŋ de Nhialic cïï duëër dhiap puk tɔkï cït kë cï cuëëc cït guöp raan bï dhiap, ayï diɛt, ayï läi de cök kaŋuan, ayï ka mol piny.

24Yen aa kunë Nhialic keek luɔi col në döm cï ŋɔ̈ɔ̈ŋ de kërac ke dɔm, abïk dhuëëŋ de kegup riɔ̈ɔ̈k ë röt kapäc. 25Kɔc cï yic de Nhialic puk tɔkï ye lueth, ku yek kë cï cuëëc riëëu ku yek luööi, awär Aciëŋ ë cak käŋ, Raan cath ke athiɛɛi aɣet athɛɛr. Amiin.

26Yen aa koonë Nhialic keek abïk kacol ëcut aa kɔɔr ë kepiɔ̈ɔ̈th, acakaa diëërken gup ayek ciɛɛŋ de tik puk, ciɛɛŋ ë ciɛkë piny, ku jɔkï ciɛɛŋ ë piny cak kɔɔr. 27Ku röör ayadäŋ, ayek luɔi de tik pɔ̈l, luɔi de ciɛɛŋ ë ciɛkë piny, ago ŋɔ̈ɔ̈ŋ de röör ke dɔm arëët, ago röör kë cïï piɛth aa luöi röör, agokï käŋ aa yök ë kegup ka bï röŋ në awäny cïk wööc.

28Reec cï kek ŋïny de Nhialic rɛɛc muk ë kepiɔ̈ɔ̈th, yen aa koonë Nhialic keek, abïk nïïm rac ëtaiwei, bïk käŋ aa looi ka cïï röŋ ë luɔi duëër raan ke looi. 29Ayek piɔ̈ɔ̈th thiäŋ në racdepiɔ̈u, dhööm, kɔ̈ɔ̈r ë kërac, wui de kalei, luɔi de anyääk, ayek thiäŋ në tiɛɛl, näk, ater, ruëëny, cuɔlëpiɔ̈u, ayek mantuum, 30ayek kɔc ë kɔc cäk thook, kɔc man Nhialic, kɔc tät gup, röördït piɔ̈ɔ̈th, kɔc ee röt leec, kɔc ee cäp rac cak, kɔc ee ka ke kɔc ë dhiëth keek rɛɛc piŋ, 31kɔc cïn nïïm, kɔc cïn piɔ̈ɔ̈th, kɔc ee käŋ riic, kɔc cïn kokdepiɔ̈u. 32Kɔckë, të ciɛk kek löŋ ë lueel Nhialic ŋic an, kɔc ë ka cït ee kake looi aröŋkï ë thuɔɔu, ke ke ŋoot ë ke ye kakë looi, ku yek piɔ̈ɔ̈th rɔ̈m ayadäŋ në kɔc ë ke looi.

Currently Selected:

Rom 1: dip-JPB

Highlight

Copy