Rom 2

Jäny de Nhialic

1 # Math 7:1; Luk 6:37. Yen ënɔɔnë, yïn ŋadï, yïn raan jäny raan däŋ, yïn cïn të bï yïn rɔt kɔ̈c, jäny jiëëny yïn raan däŋ, yen a jiëëny yïn rɔt, yïn raan jäny raan däŋ, yïn ee käŋ looi kamankë gup. 2Ku aŋicku jäny ee Nhialic kɔc jɔ̈ɔ̈ny, kɔc ë ka cït ee kakë looi, nɔn ee yen jäny yic. 3Ku yïn ŋadï, yïn raan ee kɔc jɔ̈ɔ̈ny, kɔc ë ka cït ee kakë looi, ku ye kamankë looi gup, ye lueel ë yïpiɔ̈u, an, bä poth ë jäny bï Nhialic yï jɔ̈ɔ̈ny? 4Ku cï dhuëëŋ de yepiɔ̈u guɔ biɔɔn dhuëëŋ gök, ayï dït ë liɛɛr ë yenpiɔ̈u, ku guöm guum en kajuëc, ku kuc dhuëëŋ de Nhialic piɔ̈u nɔn thel en yïn tëde puŋ bï yïn yïpiɔ̈u puk? 5Ku yïn, në riɛl ril yïn piɔ̈u, ku në luɔi reec yïn puŋ de yïn piɔ̈u, yïn ë rɔt kuɛ̈t agönhdïït ɣet ë kööl ë agɔ̈th, akööl ë nyuöth bï löŋ piɛth cï Nhialic guiir rɔt nyuɔɔth. 6#Diɛt 62:12; Kɛ̈ŋ 24:12. Ago raan ëbɛ̈n gäm këde, kë bï röŋ ke luɔidɛn cï looi. 7Kɔc kɔɔr dhuëëŋ ku riëëu ku luɔi cïï kek bï dhiap, kɔc ë këpiɛth looi në liɛɛr ë kepiɔ̈ɔ̈th, kek abï gäm pïïr thɛɛr. 8Ku kɔc ë wël tɛɛr, kɔc reec yic gam, ku gamkï kërac, kek abï diu de Nhialic piɔ̈u yök kekë agɔ̈th. 9Ku yökkï këtuc bï keek dhal ku acɔ̈t bï kek nïïm acɔ̈t, raan ëbɛ̈n raan ë kërac looi, gɔl ë Judai, mɛt Girikii thïn aya. 10Ku dhuëëŋ ku riëëu ku mät, kek abï tɔ̈u në raan ë këpiɛth looi, gɔl ë Judai, mɛ̈t Girikii thïn aya. 11#Nyöŋ 10:17. Kuëny ee kɔc kuany yiic aliu tëde Nhialic.

12Kɔc kedhie kɔc ë kërac looi ku liu löŋ tëde keek, kek abï määr ke cïn löŋ, ku kɔc kedhie kɔc ë kërac looi, ku nu löŋ tëde keek, kek abï jɔ̈ɔ̈ny në löŋ. 13Ku acie kɔc piŋ löŋ tei, kek ee kɔc piɛthpiɔ̈ɔ̈th tëde Nhialic, ee kɔc ë löŋ looi, kek abï tɔ ye kɔc piɛthpiɔ̈ɔ̈th. 14Ku Juöör, kɔc cïn löŋ cath ke keek, të cï kek ka nu ë löŋic looi, në ciɛɛŋ ë ciɛkë keek, keek gup, ciɛk an, cïn löŋ ŋickï, ke löŋ anu ë kepiɔ̈ɔ̈th. 15Anyoothkï luɔi de löŋ nɔn cï e gɔ̈ɔ̈r ë kepiɔ̈ɔ̈th, ku ŋïny de kepiɔ̈ɔ̈th ee rɔ̈m kekë löŋ aya, agokï löŋ guiir ë kepiɔ̈ɔ̈th kapäc, go raan rɔt gaany, ku nɔn de en të bï en rɔt kony, go rɔt kony. 16Kööl bï Nhialic ka cïï kɔc moony jɔ̈ɔ̈ny në Yecu Kërtho, në këde wëlkiën piɛth.

Judai ku Löŋ

17Tïŋ, yïn cɔl Judai, ku rɛ̈ɛ̈rë ë löŋic, ku lec rɔt në Nhialic, 18ku yïn ŋic kë nu ë yepiɔ̈u, ku mitëpiɔ̈u wekë kapiɛth aläldïïtë, ku cï wëët në këde löŋ, 19ku yïn ë rɔt ŋɔ̈ɔ̈th nɔn ee yïn raan ee cɔɔr thel, ku ye many ee kɔc nu tëcol riaau, 20ku nɔn ee yïn raan ee kɔc piɔlpiɔ̈ɔ̈th wɛ̈ɛ̈t, raan ë mɛnhiinakäŋ wɛ̈ɛ̈t, luɔi yïn täu de ŋïnydekäŋ kekë yic ë löŋic, 21na yïn ënɔɔnë, yïn ë raan däŋ wɛ̈ɛ̈t, cïï rɔt ë wɛ̈ɛ̈t ayadäŋ? Yïn ee kɔc yɔ̈ɔ̈k an, “Duökï ë kual”, ku yïn guöp, ye kual? 22Yïn raan ee kɔc yɔ̈ɔ̈k an, “Duökï ë lɔ në diëër lei”, ye lɔ we diëër lei yïn? Yïn raan ë yiëth maan, ye luëk ke Nhialic tɔ nhiany yïn? 23Yïn raan ë rɔt leec në löŋ, ye Nhialic tɔ bui, yïn, në wäc ee yïn löŋ wööcic? 24#Yith 52:5 (LXX). Rin ke Nhialic aye ke läät ë Juööriic në baŋdun, acït man cï e gɔ̈ɔ̈r.

25Cuɛ̈l ee këpiɛth ë yic, të döt yïn löŋ apiɛth, ku të ee yïn raan ë löŋ wööcic, ke cuɛ̈ldu acï tɔ ye ciën cuɛ̈l. 26Ku raan kënë cueel, të cï en löŋ tiiŋic, ke ciën cuɛ̈lde cïï bï tɔ ye cuɛ̈l? 27Ku raan kënë cueel, në caŋ ë dhiëëthë ye, të cï en löŋ aa tiiŋic, cïï yï bï jɔ̈ɔ̈ny, yïn raan ë löŋ wööcic, acakaa yïn ëye raan cath we jam cï gɔ̈ɔ̈r ayï cuɛ̈l? 28Raan acie Judai nɔm, tën ee yen Judai ë biäk biic tei, ayï cuɛ̈l, acie kë ye tïc ë biäk ë raan guöp tei. 29#Nyöŋ 30:6. Raan ee ya Judai nɔm, tën ee yen Judai ë ye yäc thïn, ku cuɛ̈l ee këde raan piɔ̈u, ee këde wëi, acie këde jam tei. Lɛcde acïï bɔ̈ tëde kɔc, abɔ̈ tëde Nhialic.

Currently Selected:

Rom 2: dip-JPB

Highlight

Copy