LUKA 6
6
Ikoto aighu ya Sabato
(Mat. 12.1-8; Mk. 2.23-28)
1Nao iji orekoghe ukighenda ituku ja Sabato, ukaidiria aghadi ya mbuwa ya ngano; wanughi wake wikadema vanga, wikavizira na kuja.#Wuk. 23.25 2Ela Mafarisayo wamu wikaghamba, “Kwaki m'bonyagha maza ririghidwagha kubonywa ituku ja sabato?” 3Jesu ukawitumbulia, “Welee, jingi ndemshomie seji Daudi orebonyereghe iji uo andwamweri na awo werekwanyeghe werezughiloghe?#1 Sam. 21.1-6 4Orenighirieghe andenyi ya nyumba ya Mlungu ukawusa mikate erefunyiroghe kwa Mlungu, ukaija na kuwineka wandu wake. Nayo yadarighidwa kujighwa ni mndungi, ela wakohani weni.”#Wal. 24.9 5Niko ukawizera, “Mwana wa Mdamu nuo Bwana wa Sabato.”
Mundu uko na mkonu ghukelemere
(Mat. 12.9-14; Mk. 3.1-6)
6Nao ituku izima ja Sabato, ukangia andenyi ya sunagogi; ukafundisha. Ahoeni korekoghe na mndumu, mkonu ghwake ghwa kiwomi ghukelemere. 7Na walimu wa Sharia na Mafarisayo werekoghe wikimlangaria ngera uboisa ituku ja Sabato, wipate shekeria emshitakia. 8Ela uo oreghimanyireghe maririkanyo ghawo, nao ukamzera uo mundu mkonu ghwake ghukelemere, “Choo aha imbiri.” Nao ukaghenda na kukaia kimusi aho. 9Jesu ukawizera, “Namkotia welee, ni hachi kubonya nicha ituku ja Sabato angu kubonya kiwiwi? Kukira irangi angu kutotesha?” 10Ukawizighana wose chia rose, ukamzera uja mundu, “Ghorua mkonu ghwako.” Nao ukaghughorua na mkonu ghwake ghukaboa. 11Ela wikachulwa ni machu loli-loli na kuja malagho wikilola wim'bonya wada Jesu.
Jesu kusaghua wadumi ikumi na wawi
(Mat. 10.1-4; Mk. 3.13-19)
12Matuku agho, Jesu ukajoka mghondinyi kulomba, ukalomba Mlungu kio chee. 13Hata iji ndoe yaela ukawiwanga wanughi wake, na aghadi ya awo, ukawisaghua ikumi na wawi na kuwiwanga “Wadumi”. 14Simoni, uo oremmbangieghe Petro, na mruna Andrea, Jakobo na Johane, Filipo na Bartholomayo, 15Mathayo na Tomasi, Jakobo wa Alfayo na Simoni uwangwagha Zelote, 16Juda wa Jakobo, na Juda Iskarioti, nuo ucheewuya mfunyi wake.
Jesu kufundisha na kuboisa
(Mat. 4.23-25)
17Nao iji Jesu wasea kufuma mghondinyi andwamweri nawo, ukakaia kimusi andu kwa wurindi chiaimweri na wanughi wake wengi; na izungu ja wandu wifumie Judea yose, Jerusalemu, na pwani ya Tiro na Sidoni, werechieghe kumsikira na kuboiswa makongo ghawo; 18na awo werekoghe wikijishwa wasi ni pepo ra makakala wikaboiswa. 19Na izungu jose ja wandu jikalola kumuadada, angu ndighi rake rerekoghe rikimfuma na kuwiboisa wose.
Kuboilwa na kuwawa
(Mat. 5.1-12)
20Nao Jesu ukawizighana wanughi wake ukaghamba,
“Mwarasimilwa inyo muko wakiwa,
angu wuzuri ghwa mlungunyi ni ghonyu.
21Mwarasimilwa inyo muko na njala idana,
angu mchaghudishwa.
Mwarasimilwa inyo mlilagha idana,
angu mchaseka.
22Mwarasimilwa inyo kasikira wandu
wazamilwa ni inyo, na kumlegha,
na kumsholia na kujinona irina jenyu,
kwa wundu ghwa Mwana wa Mdamu.#1 Pet. 4.14
23Boilonyi ngelo iyo,
mchumbe chumbe kwa kuboilwa,
angu mwawikilwa mafungu mabaa uko mlungunyi.
Angu huwo niko weke wawa wawo werewibonyereghe walodi.#2 Mal. 36.16; Mab. 7.52
24Ela ni bugha konyu inyo muko na mali,
angu mwameria kupata wuhoreshi ghonyu.
25Ni bugha konyu inyo mghudagha idana,
angu mchasikira njala.
Ni bugha konyu inyo msekagha idana,
angu mchakaia na wasi na kulila.
26Ni bugha konyu iji wandu wamkuma
angu niko koni weke wawa wawo
werebonyereghe kwa walodi wa tee.
Kuwikunda wamaiza
(Mat. 5.38-48; 7.12a)
27“Ela namzera inyo munisikiragha, wikundenyi wamaiza wenyu, muwibonyere nicha awa wizamilwagha ni inyo. 28Wirasimienyi awa wimbwasiragha njowe, muwilombie awa wimdediagha inyo kiwiwi. 29Uhu ukukabagha idumbu iji, kumghalusire ja kawi wori; na uhu ukusokagha ikoti jako, kumsighie na ishati jako wori. 30Uo ose ukulombagha kilambo chingi kumneke, na uhu ukusokagha vilambo vako kusevikotie sena. 31Kuwibonyere wandu sa iji koni kukundagha wikubonyere.#Mat. 7.12
32“Na ngera mwawikunda awa weni wimkundagha inyo, mchapata kukaswa kwa indoki, ikakaia na wakaung'a wadawikunda awa weni wiwikundagha? 33Sena mkawibonyera nicha awa weni wim'bonyeragha nicha inyo, mchapata kukaswa kwa indoki, ikakaia hata na wakaung'a wadabonya wokoni? 34Na ngera mwawikopesha awa weni widimagha kumlipa, mchapata kukaswa kwa indoki, angu hata na wakaung'a wadakopesha wikiweseria kuwunjirwa. 35Ela wikundenyi wamaiza wenyu, na kuwibonyera nicha; mkopeshe, ela msesuwirie kuwunjirwa kindo chingi; niko mafungu ghenyu ghichaakaia mabaa, sena mchakaia wana wa Uo-Uko-Aighu-Nandighi; angu uo moni ni mucha hata kwa awo wisewadie chawucha ingi na kwa wachoyo. 36Mkaie na wughoma sa iji Ndeyo onyu uko na wughoma.
Kutanya wazima
(Mat. 7.1-5)
37“Msaketanya, nenyo ndemchaatanywa anduangi, msakelaumu, nenyo ndemchaalaumilwa anduangi; lekenyi wandu makosa, nenyo mchalekelwa; 38nekenyi wandu, nenyo mchanekwa kipimo kicha, chichandirilo na kusughuswa, hata chidike-dike; niko wichaamneka huwo. Angu kipimo mpimagha, nicho cheni mchaapimilwa.”
39Nao ukawighoria mfwano ghumu sena ukighamba, “Welee, mundu uko kitungure wadima kumghenja kitungure mmbao? Ndewichaachunukia kinenyi wose anguwada?#Mat. 15.14 40Mshomi ndemchumbagha mwalimu wake anduangi, ela kula umu ushomeshero nicha, wadakatana na mwalimu wake.#Mat. 10.24-25; Joh. 13.16; 15.20 41Kwaki oho kuchizighanagha kijaghulu chiko andenyi ya iriso ja mwanyinyu, ela ndekuchiwonagha kijaghulu chiko andenyi ya iriso jako kumoni? 42Angu-lee, kuchamzera wada mwanyinyu, ‘Mwanidu, leka nikufunye ichi kijaghulu chiko irisonyi kwako,’ na oho kumoni kusechiwonagha kilingo chiko irisonyi kwako? Muji-kuwi oho, funya kilingo chiko irisonyi kwako kande, niko kuchaawona nicha kufunya kijaghulu chiko andenyi ya iriso ja mwanyinyu.
Mudi na matunda gharo
(Mat. 7.16-20; 12.33-35)
43“Angu ndekuwadie mudi mucha ghuvagha matunda ghizamie, hata na mudi ghuzamie, kuva matunda mecha anduangi; 44angu kula mudi ghuchamanyika kwa matunda gharo. Tini nderiwalwagha minjonyi, hata zabibu kwa mndandangoma anduangi.#Mat. 12.33 45Mundu mucha kwa agho mecha gha ngolonyi kwake, wadafunya agho ghiko mecha, na mundu mmbiwi kwa ugho wuwiwi ghuko ngolonyi kwake, wadafunya agho ghiko mawiwi. Angu momu ghwadadeda agho ghichue ngolonyi.”#Mat. 12.34
Waaghi nyumba wawi
(Mat. 7.24-27)
46“Kwaki muniwangagha Bwana, Bwana, msebonyagha agho nimghoriagha? 47Uo ose uchagha kwapo na kusikira malagho ghapo na kughibonya, nichammbonyera seji ufwane. 48Wafwanana na mundu uaghagha nyumba yake, nao ukakota ndenyi, na kuagha msingi ghwake aighu ya igho; kukacha kusalama kwa machi, na moda ghukaikaba ija nyumba, nayo ndeerenyavurikieghe anduangi, angu ereaghiloghe aighu ya igho. 49Ela uo usikiragha malagho ghapo, nao ndebonyagha anduangi, wafwanana na mundu oreaghieghe nyumba yake andoenyi, kuseko na msingi ghungi; na ghuja moda ghukasalama na kuikaba ija nyumba, ikaghwa andonyi; na kunoneka kwaro, kukakaia kubaa.”
Currently Selected:
LUKA 6: TAITA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1997
All rights reserved.