LUKA 5
5
Jesu kuwiwanga wanughi wa imbiri
(Mat. 4.18-22; Mk. 1.16-20)
1Nao iji orekoghe kimusi mbai mbai ya ndiwa ya Genesareti, wandu wengi wikacha na kumtindiria wikikunda kujisikira ilagho ja Mlungu.#Mat. 13.1-2; Mk. 3.9-10; 4.1 2Ukawona mashua iwi mbai na mbai ya ndiwa, ela wawadi samaki ndewerekoghe andenyi anduangi, angu werefumieghe wikakaia wikirioghosha nyavu rawo. 3Jesu ukajingia ishua jimu, najo ni ja Simoni, ukalomba ujisoghore kakula katini na ndoenyi, ukasea kidombo ishuonyi, ukiwifundisha wandu. 4Hata iji wameria madedo ghake ukamzera Simoni, “Soghora ishua andu kumilie, murisere nyavu renyu mpate samaki.”
5Simoni ukamzera, “Mwalimu, dabonyere kazi chee, hata ndedipatire kindo chingi; ela kwa ilagho jako, nicharisera nyavu.”#Joh. 21.3 6Wiendabonya huwo, wikapata samaki nyingi nandighi, hata nyavu rawo rikakunda kurashuka;#Joh. 21.6 7wikawikunyiria wangara wawo wiko ishua izima wiche wiwitesie. Nawo wikacha wikarichura mashua rose iwi hata rikakunda kuvululia. 8Ela iji Simoni Petro orewonieghe agho, ukamdungia Jesu ngokoro ukighamba, “Kaia kula nani, angu ne mundu wa kaung'a ee Bwana.” 9Angu uo andwamweri na wambao werekwanyeghe, wereshinikieghe nandighi kwa wundu ghwa ugho wungi ghwa samaki wereriwadieghe. 10Na huwo koni Jakobo na Johane wana wa Zebedayo wereshinikieghe. Jesu ukamzera Simoni, “Kusakeobua, angu kufuma idana kuchakaia mmbwadi wandu.” 11Hata iji wameria kureda mashua rawo pwani, wikasigha vilambo vose wikamnugha.
Jesu kum'boisa mundu uko na sima
(Mat. 8.1-4; Mk. 1.40-45)
12Nao iji Jesu orekoghe muzi ghumu, ukacha mundu uchue sima; hata iji wammbona Jesu ukaghwa kiwushu wushu imbiri kwake ukamvoya ukimzera, “Bwana, ngera kwakunda kwadima kunielesha.” 13Jesu ukaghughorua mkonu ghwake ukamuadada ukighamba, “Nakunda, eleshwa.” Nao shwa wori ija sima ikamsigha. 14Ukamlaghira ukighamba, “Kusakemghoria mndungi, ela ghenda kukuwonyere kumoni kwa mkohani, sena kufunye kizongona kwa wundu ghwa kueleshwa kwako, sa iji koni Musa orelaghirieghe, kwa wundu ghwa wushuhuda kwa wandu.”#Wal. 14.1-32
15Ela wuvoro ghwa Jesu ghukachurikia kuera isanga jose; na izungu ibaa ja wandu jikamkwanyikia kumsikiria na kuboiswa makongo ghawo. 16Nao ukaghenda andu kusewadie wandu, ukalomba Mlungu.
Jesu kum'boisa mkelemeri wa kupooza
(Mat. 9.1-8; Mk. 2.1-12)
17Ituku jimu, Jesu orekoghe ukifundisha. Ahoeni korekoghe na Mafarisayo na walimu wa Sharia wiko kidombo, wafuma kula muzi ghwa Galilaya, Judea na Jerusalemu; na ndighi ra Bwana reboisa rerekoghe aeni kwake. 18Nao ahoeni wandu wikamredia mundu uko na wukongo ghwa kupooza walala wulinyi, nawo wikikunda kumreda na kummbika imbiri ya Jesu, 19wikasowa chia kwa wundu ghwa wandu kukaia wengi. Nao wikajoka aighu nyumbenyi, wikainja vigae, na kumsera mkongo aighu wulinyi aghadi ya ijo izungu, imbiri ya Jesu. 20Hata iji Jesu wajiwona irumirio jawo ukamzera, “Ee mundu, kwalekwa kaung'a rako.”
21Nao walimu wa Sharia na Mafarisayo wikazoya kukukotia weni, “Nani uhu udedagha malagho gha masholio? Mlungu uekeri nuo udimagha kuleka kaung'a!” 22Nao iji Jesu waghimanya maririkanyo ghawo, ukawikotia, “Kwaki mririkanyagha huwo ngolonyi konyu? 23Welee, iji jiangue kughora ni jiao, ni ja kughora, ‘Kaung'a rako ralekwa’ angu ni kughora, ‘Wuka kwende?’ 24Ela nakunda mmanye angu Mwana wa Mdamu oko nandighi andoenyi releka kaung'a.” Niko ukamzera uja mkongo wa kupooza, “Wuka kughuduke wuli ghwako kughale.” 25Nao shwa wori ukawuka imbiri ya wose, ukaghuduka ugho wuli oreghulalieghe, ukaghala ukimkasa Mlungu. 26Na wose wikashinika wikamkasa Mlungu wikiobua na kughamba, “Idime, dawona maza ra mashiniko.”
Jesu kummbanga Lawi
(Mat. 9.9-13; Mk. 2.13-17)
27Nyuma ya agho, Jesu ukafuma ukammbona mmbwadi wushuru umu uwangwagha Lawi, wasea kidombo ofisinyi kwake. Jesu ukamzera, “Ninughe.” 28Nao ukasigha vose ukawuka ukamnugha. 29Lawi ukam'bonyera karamu mbaa nyumbenyi kwake, na wawadi wushuru wengi wikacha na kusea kidombo mezenyi andwamweri nawo. 30Mafarisayo na walimu wa Sharia wikawizughunukia wanughi wake wikighamba, “Kwaki mjagha chiaimweri na wawadi wushuru na wakaung'a?”#Lk. 15.1-2 31Nao Jesu ukawitumbulia, “Awa wiko banana ndewikunde mghanga ungi, ela ni awo wiko wakongo. 32Ini serechieghe kuwiwanga wandu wa hachi anduangi, ela awo wiko wakaung'a wipate kuhea.”
Ikoto aighu ya kufunga tumu
(Mat. 9.14-17; Mk. 2.18-22)
33Nao wandu wamu wikamzera, “Wanughi wa Johane na wa Mafarisayo wadafunga na kulomba kalazi koni, ela wanughi wako wadaja na kunywa.” 34Jesu ukawizera, “Mwadima kuwibonya waghenyi wawangwa harusinyi wifunge tumu ngelo bwana arusi uko aeni? 35Ela matuku ghichacha, ngelo bwana arusi uchaainjwa kwawo, matuku agho niko wichaafunga tumu.” 36Na wokoni Jesu ukawineka mfwano ughu, “Ndekuwadie mndungi udumbuagha kiraka cha nguwo mbishi na kuchikumba nguwo ya kala; angu ukabonya huwo, ichakaia wameria kuirashua ija mbishi, na sena chija kiraka chichalemana na jija irasi. 37Hata ndekuwadie mndungi udungiriagha divei mbishi viribenyi va kala, angu ukabonya huwo, ija divei mbishi ichavirashua, divei ichadika, na viriba vichanoneka. 38Ela divei mbishi ni suti idungirilo viribenyi viwishi. 39Hata ndekuwadie mndungi nyuma ya kunywa divei ya kala uwuyaakunda kunywa divei mbishi anduangi; angu uchaghamba, ‘Divei ya kala yaboie.’”
Currently Selected:
LUKA 5: TAITA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1997
All rights reserved.