LUKA 7
7
Jesu kum'boisa mdumiki wa m'baa umu Mroma
(Mat. 8.5-13)
1Hata iji Jesu wawighoria wandu malagho ghake ghose, ukaghenda Kafarnaumu. 2Nao m'baa umu wa masikari gha Kiroma orekoghe na mzumba wake umkunde, nao orekoghe mkongo kaavui na kufwa. 3Uo m'baa uendasikira wuvoro ghwa Jesu, ukawiduma waghosi wamu wa Wayahudi wimlombe Jesu uche um'boise mzumba wake. 4Nawo wiendamchea Jesu, wikamlomba nandighi wikighamba, “Uo wafwana kum'bonyere seji walomba; 5angu waikunde mbari yedu, sena orediaghieghe sunagogi.”
6Nao Jesu ukaghendanya nawo. Hata iji werevikieghe kaavui na nyumba yake, uja m'baa wa Kiroma ukaduma waghenyi wake kwa Jesu ukighamba, “Bwana, kusakekusumbua, angu ini sifwane kuchelwa ni oho, kungie nyumbenyi kwapo. 7Niko hata ini seredimieghe kucha kwako anduangi. Ela oho ghora ilagho jeni tu, na mzumba wapo uchaboa. 8Angu hata ini ne mundu niwikilo aisi ya nguma, nanekelo masikari aisi yapo, nani ngamzera uhu, ‘Ghenda,’ wadaghenda, na uhu ngamzera, ‘Choo,’ wadacha; na mzumba wapo nadamzera, ‘Bonya iji,’ nao wadabonya.” 9Nao iji Jesu wasikira agho ukashinika, ukawighalukia wandu awo weremnughieghe ukawizera, “Namghoria loli, jingi siwonie irumirio jing'ane huwu anduangi, hata kwa Israeli.” 10Niko awo weredumiloghe iji werewurieghe nyumbenyi wikamkua uja mzumba wameria kuboa.
Jesu kumrukisha mdawana wa muka mkiwa
11Nyuma kutini, Jesu ukaghenda muzi ghwa Naini; wanughi wake chiaimweri na izungu ibaa ja wandu wikaghendanya nao. 12Nao iji orevikieghe kaavui na mbenge ya muzi, wikakwana na izungu ibaa ja wandu wamduka mundu ufue, nao ni mwana wa ititi wa muka ufulo ni mumi wake. 13Bwana uendawona uja muka, ukangilwa ni wughoma m'baa, ukamzera, “Leka lila.” 14Ukacha ukaiwada jeneza, na awo wandu wereidukieghe wikadunga maghu. Jesu ukaghamba, “Mdawana, nakuzera wuka!” 15Nao uo orekoghe ufue, ukawuka ukazoya kudeda. Na Jesu ukamneka mae. 16Wikangilwa ni wowa wose wikamkasa Mlungu wikighamba, “Mlodi m'baa wawuka aghadi kodu!” sena “Mlungu wawivikia wandu wake.” 17Nao sare yake ikaera isanga jose ja Judea na mbai-mbai yaro.
Wadumwa wifumie kwa Johane M'baputizi
(Mat. 11.2-19)
18Nao wanughi wa Johane wiendawona maza rose Jesu oreribonyereghe, 19Johane ukawiwanga wawi wa wanughi wake ukawiduma kwa Bwana wimkotie, “Welee, ni oho kumoni kuchagha angu dimmbesere mzima? 20Awo wandu wiendamchea Jesu wikamzera, Johane wadiduma dikukotie, ‘Ni oho kumoni kuchagha angu dimmbesere mzima?’”
21Nao saa ija eni Jesu ukaboisa wandu wengi werekoghe na makongo na saka, ukawinga pepo nyingi rizamie, na wengi werekoghe vitungure ukawidimisha kuwona. 22Jesu ukawitumbulia, “Ghendenyi mumghorie Johane malagho agho mwaghiwona na kughisikira; vitungure wapata kuwona kwawo, watighini waghenda, wandu wiko na sima waeleshwa, na awa wifue madu wasikira, na awo wifue warukishwa, na wakiwa wachililwa Ilagho Jiboie.#Isa. 35.5-6; 61.1 23Warasimilwa uo mundu usekuwagha kwapo.”
24Nao iji wanughi wa Johane wameria kughenda, Jesu ukazoya kuwighoria wandu malagho gha Johane, “Welee, niki moreghendieghe kuchilola kireti? Ni lunyasi lunyavurishwagha ni mbeo? 25Angu morefumieghe kwendawona kii? Ni mundu urwae nguwo righokie? Awa wirwae nguwo righokie na kuja manori weko ngomenyi kwa wazuri. 26Ela niki mfumie kwenda chizighana? Ni mlodi? Ee namzera, ni kuchumba mlodi. 27Uhu Johane nuo moni waghorwa ni Maandiko,
‘Ola namduma mdumi wapo imbiri kwako,
uhu uchaakuboisira chia yako.’”#Mlk. 3.1
28Namghoria loli, “Kwa awa wose werevaloghe ni waka, ndekuwadie mndungi uko m'baa kumchumba Johane, ela sena uo uko mtini kwa Wuzuri ghwa Mlungu, oko m'baa kumchumba uo.”
29Nao wandu wose chiaimweri na wawadi wushuru iji wasikira agho, wikairumiria hachi ya Mlungu angu werebaputiziroghe kwa wubaputizo ghwa Johane.#Mat. 21.32; Lk. 3.12 30Ela Mafarisayo na walimu wa Sharia wereleghieghe ugho mpango ghwa Mlungu, kwa wundu ghwawo, wikalegha kubaputizwa ni Johane.
31Jesu ukachuria kughora, “Niwifwananisha naki wandu wa kivalwa ichi? Nawo wafwanane naki? 32Wafwanana na wana wiseagha kidombo sokonyi wikiwangana na kuzerana, ‘Deremkabieghe misherembe mkalegha kuvina, derebonyereghe ifwa, mkalegha kulila.’ 33Angu Johane orechieghe usejagha usenywagha anduangi, nenyo mwaghamba, ‘Oko na pepo.’ 34Mwana wa Mdamu wachee ukija, ukinywa, nenyo mwaghamba, ‘Zighanenyi mundu wa lwafuo, mmbongeri, na mghenyi wa wawadi wushuru na wakaung'a.’ 35Elaima iyo hikima ya Mlungu yawonyerwa kukaia ya loli, ni awo wose wiirumiriagha.”
Jesu nyumbenyi kwa Mfarisayo Simoni
36Mfarisayo umu oremlombieghe Jesu uche uje vindo kwake. Na Jesu ukacha nyumbenyi kwake ukasea kidombo mezenyi. 37Nao muka umu mkaung'a wa muzi ghuja iji wamanya angu Jesu wacha vindonyi nyumbenyi kwa uo Mfarisayo, ukareda chupa ichue marumba;#Mat. 26.7; Mk. 14.3; Joh. 12.3 38ukakaia kimusi na nyuma kaavui na maghu gha Jesu ukilila, na mbori rake rikamtonyera maghunyi, nao ukaghiaghia kwa iridia jake; ukasusugha maghu ghake na kughishinga agho marumba. 39Uja Mfarisayo oremkaribishireghe uendawona huwo, ukaghamba ngolonyi kwake, “Ngera loli mundu uhu odeeka mlodi, kumangu wamanya uhu nani, na ni muka ufwane wada uhu ummbwadagha angu uo ni mkaung'a.” 40Nao Jesu ukaghamba, “Simoni, neko na ilagho jekughoria.” Nao ukatumbulia, “Ghora Mwalimu.” 41Jesu ukaghamba, “Mundu umu orekoghe na wasile wake wawi, wa imbiri oremlawiagha dinari maghana masanu, na wa kawi mirongo misanu. 42Nao iji walemwa ni kumlipa, ukawileka wose wawi. Idana ni uao uchaamkunda kuchumba?” 43Nao ukatumbulia, “Naghesha ngera ni uja oremlekieghe nyingi.” Nao ukamzera, “Kwatanya hachi.”
44Nao ukimghalukia muka ukamzera Simoni, “Kwammbona muka uhu? Kufuma nangia nyumbenyi kwako ndekuninekie machi gheoghosha maghu ghapo, ela uo wanioghosha maghu ghapo kwa mbori rake, na kughiaghia kwa iridia jake. 45Ndekunisusughie, ela uo kufuma nangia aha ndesighie kunisusugha maghu ghapo anduangi. 46Ndekunishingie chongo chapo mavuda, ela uo ndesighie kughishinga maghu ghapo mavuda anduangi. 47Kwa huwu nakuzera, walekwa kaung'a rake nyingi, angu wawonyera lukundo lubaa; ela uhu ulekelwagha katini, wadakunda katini wokoni.”
48Nao ukamzera muka, “Kaung'a rako ralekwa.” 49Niko awo werekwanyeghe kidombo mezenyi wikazoya kughora ngolonyi kwawo, “Nani uhu ulekagha kaung'a?”
50Nao ukamzera muka, “Irumirio jako jakukira, kwende na sere.”
Currently Selected:
LUKA 7: TAITA
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1997
All rights reserved.