KUZOYA 37

Josefu na waruna

1Jakobo ukakaia andenyi ya isanga jerekailoghe ni weke ndee, isanga ja Kanaani. 2Na agha ni malagho gha kinyumba cha Jakobo:

Josefu uendavika miaka ikumi na mfungade, orekoghe ukilisha mfugho andwamweri na waruna, wana wa Bilha na Zilpa, waka wa ndee; Josefu ukakaia ukimghoria ndee ugho wuwiwi ghwawo. 3Israeli oremkundieghe Josefu kuchumba waruna wose, angu orekoghe mwana wa wughosi ghwake, nao ukam'bonyera nguwo ndacha, iko na mikonu milacha. 4Ela iji waruna werewonieghe angu ndee wamkunda kuwichumba awo, wikachuria kuzamilwa ni Josefu, hata ndeweredimieghe kudedanya nao kwa sere anduangi.

5Ituku jimu, Josefu, ukaloda ndodo, hata iji orewighorieghe waruna, wikachuria kuzamilwa ni uo moni kuchumba. 6Ukawizera, “Sikirienyi malagho gha iyo ndodo nereilodieghe. 7Ola derekoghe diwose mbuwenyi dikifunga mario gha ngano, nao ngashinika! Ngawona irio japo jikikaia kimusi, na mario ghenyu ghikajimara mbai-mbai jija irio japo na kujighoghomia.” 8Niko waruna wimkazera, “Wele ni loli oho kuchakaia m'baa na kubonya nguma aighu yedu?” Nawo wikachuria kuzamilwa ni uo moni kwa wundu ghwa ndodo na madedo ghake.

9Nao Josefu ukaloda ndodo imu sena, ukawighoria waruna ukighamba, “Ola nalodere ndodo imu sena, wei iruwa, mori, na nyerinyeri ikumi na imweri, verenighoghomieghe.” 10Ela iji oremghorieghe ndee na waruna malagho gha ndodo iyo, ndee ukam'bukia ukighamba, “Ni ndodo-ki ihi kwailoda? Ikaia loli ini na mayo na wanyinyu dichakuchea oho na kukughoghomia hata andonyi?” Nao waruna wikakaia na iriso ibaa aighu yake, 11ela ndee ukakaia ukighiririkanya agho malagho.#Mab. 7.9

Josefu kuuzwa na kudwalwa Misri

12Ituku jimu waruna Josefu wikafuma na kughenda kulisha chagha cha ndee kaavui na Shekemu. 13Nao Israeli ukamzera Josefu, “Kwamanya wanyinyu waawuyalisha Shekemu; choo nikudume kwawo.” Nao ukatumbulia, “Neko tayari.” 14Ukamzera, “Ghenda kuwizighane wanyinyu kuwone ngera weko banana, na mfugho ngera reko nicha; kuniredie malagho.” Nao ukamduma kufuma vololo ya Hebroni, ukaghenda hata Shekemu.

15Mndumu ukamkua aho ukimara-mara mlambenyi, ukamkotia, “Niki kwawuyalola?” 16Nao ukamtumbulia, “Naawuyalola wanidu, nakulomba kunighorie andu wawuyalisha.” 17Uo mundu ukamzera, “Waenda;” angu nasikira wikighamba, “Dighende Dothani.” Nao Josefu ukafuma aho na kuwinugha waruna, ukawikua Dothani. 18Hata iji weremmbonieghe ukicha uko kakula koni, imbiri usevikie kaavui nawo, wikabonya njama weni na weni wim'bwaghe. 19Wikaghamba, “Ola uja mlodi ndodo wacha. 20Nndokonyi dim'bwaghe, nao dimkumbe kinenyi chimu; nesi dichaghamba, wabwaghwa ni nyamandu ya isakenyi, diwone ngera iro ndodo rake richakaia wada.”

21Ela iji Reubeni wasikira agho, ukamkira Josefu kwa kughamba, “Disakem'bwagha.” 22Nao ukachuria kughora, “Msakedia bagha ingi; mkumbenyi andenyi ya ichi kina aha kireti, ela msem'bonye ilagho jingi.” Reubeni ukaghora agho ukikaia na nia emfunya na kummbunja kwa ndee. 23Josefu wendavika kwa waruna, wikammbwada na kumrua ija nguwo ndacha iko na mikonu milacha oreirwaeghe, 24wikamdwa na kumkumba andenyi ya kina, nacho cherekoghe chisewadie machi ghangi anduangi.

25Hata iji wereserieghe kidombo kuja vindo, wikawona longo lwa Waishmaeli wikisea kufuma Gileadi na ngamila rawo, raduka marumba na manemane wikighenda cha Misri. 26Nao Juda ukawizera waruna, “Dichapata fwaidaki isi dikam'bwagha mwanidu na kuivisa bagha yake? 27Nndokonyi dimuuze kwa awa Waishmaeli, disem'bonye ilagho jingi angu uo ni mwanidu, bagha yedu cheni.” Waruna wikarumiria. 28Nao iji Wamidiani wamu wa biashara waida aho, waruna wikaghenda na kumjosa Josefu kufuma kinenyi, wikamuuza kwa Waishmaeli kwa shekeli mirongo iwi ra feza, na Waishmaeli wikamdwa noko cha Misri.#Mab. 7.9

29Nao iji Reubeni orewurieghe kinenyi na kumsowa Josefu, ukarashua nguwo rake kwa wasi, 30ukawuya kwa waruna ukighamba, “Mwana ndeuko kinenyi! Nibonya wada?”

31Wikabwagha mburi, wikaingira ija nguwo ya Josefu baghenyi, 32wikaidwa ija nguwo ndacha ya mikonu milacha ya Josefu, wikaireda kwa ndee wikighamba, “Ola nguwo hei daishoa, kuizighane kuimanye ngera ni nguwo ya mwana wako angu ngera siyo ingi.”

33Jakobo ukaimanya ukaghamba, “Ihi ni nguwo ya mwanwapo, wameria kubwaghwa ni nyamandu ya isakenyi; kwa loli Josefu wameria kurashulwa vipande vipande.” 34Nao Jakobo ukarashua nguwo rake kwa wasi, ukarwa nguwo ya igunia kiwonunyi kwake, na kumlilia mwana wake kwa matuku mengi. 35Na wana wake wa womi na wa waka wikacha kumhoresha, ela ukalegha kuhoreshwa ukighamba, “Nichamseria mwanwapo warumunyi ngimlilia.” Niko ndee oremlilieghe huwo. 36Iyo ngelo cheni Wamidiani wikamuuza Josefu Misri kwa Potifa, umu wa wabaa wa kazi wa mzuri, nao ni m'baa wa walindiri.

Currently Selected:

KUZOYA 37: TAITA

Highlight

Compare

Copy