KUZOYA 38

Juda na Tamari

1Kimu icho Juda orewisighieghe waruna, ukasea na kukaia kwa Muadulami umu orewangwaghwa Hira. 2Nao Juda ukammbona mwai wa Mkanaani umu uwangwagha Shua, ukamlowua na kukaia nao. 3Uo mwai ukapata kifu, ukava mwana wa womi, ukammbanga Eri. 4Ukapata kifu sena, ukava mwana umu wa womi ukammbanga Onani. 5Ukapata mwana wa womi sena, ukammbanga Shela. Juda orekoghe andu kuwangwagha Kezibu mwana uo ukivalwa.

6Juda ukamlowora Eri mwana wake wa imbiri muka, na irina jake orewangwaghwa Tamari. 7Ela Eri mwana wa imbiri wa Juda, orekoghe na mabonyo ghizamie imbiri ya BWANA, kwa huwu BWANA ukam'bwagha. 8Juda ukamzera Onani, “Kaianya na mka mwanyinyu Eri, kumpatire mwanyinyu kivalwa.” 9Ela Onani angu oremanyireghe kivalwa ndechichaawangwa kwa irina jake, ngelo orekanyeghe na mka mruna, ukaridiria mbeu rake andonyi, eri usechemneka mruna kivalwa. 10Ilagho ijo orejibonyereghe jikamzamia BWANA, nao moni BWANA ukam'bwagha. 11Niko Juda ukamzera Tamari mka mwanwake, “Wuya kukaie kwa ndeyo sa muka mkiwa, kuwesere mwanwapo Shela uzoghuo.” Oreghorieghe huwo angu oreobueghe kewada nao moni uchafwa sa waruna. Nao Tamari ukaghenda ukakaia kwa ndee.

12Nao nyuma ya matuku ghamu, muka wa Juda, uja mfwa Shua, ukafwa. Hata nyuma ya ifwa kusia, na Juda kuhoreshwa ngolo, ukasea cha Timna kudumbua ng'ondi rake mafuri; nao orekwanyeghe na mghenyi wake Hira Muadulami. 13Tamari ukaghorelwa wei mghosi wake usea cha Timna kudumbua ng'ondi rake mafuri, 14ukaiinja ija nguwo ya kimuka mkiwa, ukarwa wuzima na kukufinikira kitambaa, ukasea kidombo mbengenyi engia Enaimu muzi ghuko chienyi eghenda cha Timna. Orewonieghe worinyi Shela wazoghua, ela nderemnekeloghe umlowuo.

15Hata iji Juda wammbona, ukaghesha ni malaya, angu oreghufinikireghe wushu ghwake. 16Ukamghendia mbai na mbai ya chia ukamzera, “Nirumirie ningie kwako;” angu nderemmanyireghe wei ni mka mwanwake anduangi. Nao ukaghamba, “Kuninekaki ima kungie kwapo?” 17Ukamtumbulia, “Nikuredia ndaghina kufuma chaghenyi.” Nao ukamzera, “Kunineka wufunga ghoweseria hata kuidume?” 18Ukamzera, “Ni wufungaki kukunde nikuneke?” Nao ukaghamba, “Ni pete ya muhuri ghwako, na kamba yaro, chiaimweri na ugho mzata ghuko mkonunyi kwako.” Niko aho ukamneka, nao ukangia kwake, nao ukapata kifu. 19Niko aho Tamari ukawuya mzinyi ukighighalua marwao ghake, ukarwa ija nguwo ya kimuka mkiwa.

20Nao iji Juda wamduma mghenyi wake Hira Muadulami, kuighenja ija ndaghina, upate kuvireda vija vilambo veresighiloghe sa wufunga, Hira ukalemwa ni kummbona uo muka. 21Ukawikotia womi wamu wa Enaimu, “Oko hao uja malaya orekoghe aha chienyi?” Nawo wikamtumbulia, “Malaya ungi nderekoghe aha anduangi.” 22Nao Hira ukawuya kwa Juda ukamzera, “Siwonie uo muka, hata womi wa isangenyi waanizera angu ndekuwadie malaya ungi aho anduangi.” 23Juda ukaghamba, “Ndekaie na ivo vilambo sa vake disechesekwa. Nechi kwawona namghenjera ihi ndaghina, ela kwaamsowa.”

24Nao nyuma ya meri idadu Juda ukaghorelwa, “Ola mka mwanwako Tamari wabonyere wumalaya, nao oko na kifu.” Juda ukaghamba, “Mfunyenyi ukoro.” 25Nao iji Tamari orekoghe ukifunywa, ukaduma momu kwa mghosi wake Juda ukighamba, “Mundu wa vilambo ivi nuo unikumbie kifu. Nakulomba kuvitambuo vilambo ivi ngera ni vani: pete ya muhuri na kamba yaro, na mzata?” 26Nao Juda ukavimanya vija vilambo ukaghamba, “Muka uhu oko na hachi kunichumba ini, ni angu niseremnekieghe mwanwapo Shela umlowuo sa iji neremlaghirieghe.” Nao nderemmanyireghe sena anduangi.

27Nao iji ngelo ya kukufungua kwake erevikieghe, korekoghe na masa kifunyi kwake. 28Nao ukikumba lufu, mwana umu ukafunya mkonu ghwake, na uja mvarishi ukamfunga uzi wa ngundu kikotonyi kwake ukighamba, “Uhu wazoya ukafuma.” 29Ela iji orewunjireghe mkonu ghwake noko ndenyi, mruna ukafuma. Nao uja mvarishi ukaghamba, “Wele oho kuaida kwa ndighi?” Nao wikammbanga irina jake Perezi. 30Konyuma mruna ukafuma uko na uja uzi wa ngundu kikotonyi kwake, wikammbanga irina jake Zera.

Currently Selected:

KUZOYA 38: TAITA

Highlight

Copy

Compare