ROMANOS 14
14
Ma me awalbe ma tsaꞌamuk skꞌoplal te awermanoe
1Junuk me awoꞌtan abaik sok te machꞌa xchopet xchꞌuunel yoꞌtane. Ma me xꞌalijkes kꞌop sok te tutꞌil ay te yoꞌtane. 2Jich tutꞌil ay machꞌatik xchꞌuunej te spisil tut lek ta weꞌele, pero ay yan machꞌa xchopet xchꞌuunel yoꞌtane te jaꞌ nax ya sweꞌ te boke. 3Lek ay. Te machꞌa ya sweꞌ ta spisile ma me wakꞌ spꞌaj te machꞌa ma sweꞌtalan ta spisile. Sok te machꞌa ma sweꞌ ta spisile, ma me wakꞌ yalbe ma tsaꞌamuk skꞌoplal te machꞌa ya sweꞌ spisile, yuꞌun te Diose yikꞌojix. 4¿Machꞌa ya akuy aba a te ya awalbe skꞌoplal te yaj-aꞌtel te yane? Te yajwale stukel ay ta skuenta ta yalel me lek o ma lek skꞌoplal yuꞌun. Pero lek ya xkꞌot. Porke te Kajwaltike ay spoder yuꞌun te lek ya xkꞌote.
5Ay xan yan: Ay machꞌatik ya stsaik te jun kꞌaale, y ay machꞌatik xchꞌuunejik te pajal nax spisil te kꞌaaletike. Ta juju-tul ya skꞌan ya snaꞌ te tut ya xchꞌuune. 6Te machꞌa ya skanantay te jun kꞌaale yuꞌun ya yakꞌ ta jkuenta a te Kajwaltike. Jaꞌ yuꞌun ya skanantay. Te machꞌa makꞌ skanantaye, yuꞌun jich ya yakꞌ ta jkuenta a te Kajwaltike. Y machꞌa ya sweꞌ ta spisile, yuꞌun ya yakꞌ ta jkuenta a te Kajwaltike. Ya sweꞌ y ya yalbe kola yal Dios yuꞌun. Yan te machꞌa ma sweꞌ ta spisile, yuꞌun ya yakꞌ ta jkuenta a te Kajwaltike te ma sweꞌe, sok ya yalbe kola yal Dios yuꞌun. 7Ni ma joꞌukotik ta jkuentatik te tutꞌil kuxulotike sok ma jkuentatikuk te ya xchamotike. 8Teme kuxulotik ta balmilale, ta skuenta te Kajwaltik te kuxulotike. Teme ya xchamotike, ta skuenta Kajwaltik ya xchamotik. Jich yuꞌun teme kuxulotike o teme ya xchamotike, yuꞌunotik te Kajwaltike. 9Jaꞌ yuꞌun ito cham te Cristoe y chaꞌkux tal. Jaꞌ ajwalil yuꞌun te machꞌatik chamenike y sok te machꞌatik kuxajtike.
10Pero te jaꞌate, ¿Tuꞌun te ya awichꞌ jkuenta te awermanoe? ¿Tuꞌun te ya apꞌaje? Porke jpisiltik ya xkꞌootik ta sit Dios yuꞌun jaꞌ ya yichꞌotik jkuenta. 11Yuꞌun jich tsꞌibabil jilel ta Sjun te Diose:
“Ya yal te Kajwaltik: ‘Joꞌon te kuxulone, ya me xtal skejan sbaik ta jtojol spisil te genteetike, y spisilik ya me yalik wokol ta stojol te Diose’, xchi me”, xchi.
12Jich yuꞌun ta juju-tulotik ya me kakꞌtik jkuenta ta stojol Dios.
Ma me ayales ta mulil te awermanoe
13Jaꞌ yuꞌun, makꞌ me kal kaꞌbiyan jbatik ta juju-tulotik. Jaꞌ lek, jaꞌ ya aleik te tut makꞌ xchebaj yoꞌtan yuꞌun a te awermano te makꞌ xyalesot ta mulile o te ma lekuk ya xbajt sok te xchꞌuunel yoꞌtane. 14Te joꞌone jnaꞌojbe sluwar te maꞌyuk tut ya xjuꞌ te ya xꞌixtaꞌ a jkꞌoplaltik ta skuenta Dios. Te tutꞌil jchꞌuunej te Kajwaltik Jesuse, seguro ayon te jich aye. Yan teme ay machꞌa ya snop te ay tut te ma tsaꞌamuk ta pasele, yuꞌun nanix ma tsaꞌamuk teme jich ya spase.
15Pero teme ta skaj te aweꞌel te ya yakꞌ yajtal yoꞌtan te awermanoe, yuꞌun maꞌyuk slekil awoꞌtan te tutꞌ ayate. Ma me ta skajuk te aweꞌele te chꞌayel ya xbajt te yane, te jaꞌ a cham Cristo yuꞌune. 16Ma me awakꞌik te tut ma lekuk ya yalbeyex te tut lek ya apasike. 17Porke te tut ay ta ajwalinel te Diose ma ta skuentauk weꞌel o uchꞌajel. Jaꞌ nax teme toj ya xkuxuyinotike sok teme jun koꞌtantike y sok te bujtsꞌan kꞌinal ta skuenta nax te Chꞌul Espiritue. 18Te machꞌa jich ya yakꞌ sba ta abatinel yuꞌun te Cristoe, jaꞌ lek ya xꞌilot yuꞌun te Diose y sok te genteetike.
19Jich yuꞌun, a me jlejtik spisil te tut bujtsꞌan ya kaꞌitik yuꞌune, jich talel bael ya jkoltay bajtik ta xchꞌuunel xan te Diose. 20Ma me xꞌajimbey yaꞌtel Dios ta skaj te weꞌele. Ma yuꞌunuk ma lekuk ta weꞌel spisil ta jkaj te weꞌele. Jaꞌ ma lekuk teme ay tut ya jweꞌtik te ya xꞌixlanbot yoꞌtan yuꞌun te yane. 21Jaꞌ lek makꞌ ya jweꞌtik tiꞌbal sok ni makꞌ kuchꞌtik bino, ni maꞌyuk tut ya jpastik chꞌinuk, teme yuꞌun jaꞌ ta skaj te ya syalesot ta mulil te awermanoe. 22Te tut achꞌuuneje jaꞌ me xꞌapas jaꞌat mismo ta stojol Dios. Ben tsaꞌam slekil te machꞌa jich ya spas te ma muliluk kꞌoem ta yoꞌtane. 23Pero te machꞌa ma to kꞌoemuk ta yoꞌtan teme lek o ma lek ya sweꞌ chꞌinuke, teme la sweꞌe, jich me a staix smul a. Porke ya sweꞌ te tutꞌil xchꞌuunej te ma lekuk ta weꞌele. Y spisil te tutik la spas te ma jichuk xchꞌuunej yoꞌtane, jich la staix smul abi.
Currently Selected:
ROMANOS 14: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
