ROMANOS 13
13
Xchꞌuunel smantal te juꞌeletik
1Spisil genteetik ya skꞌan ya xchꞌuunbeyik smantal te juꞌeletik te aꞌbilik yaꞌtel ta balmilale. Porke maꞌyuk juꞌeletik te ma ta skuentauk Diose, y te juꞌeletik te aye jaꞌ yakꞌojlan stukel te Diose. 2Te machꞌatik ma xyakꞌ ta jkuenta te juꞌeletike jaꞌ skontrainejix a te tut yaloj te Diose, sok ya me xꞌaꞌbot kastigo yuꞌun. 3Porke ma xiꞌik te gobierno te machꞌatik lek te tut ya spasike; jaꞌ ya xiꞌik gobierno te machꞌatik ma tsaꞌamuk tut ya spasike. Teme ya akꞌan te makꞌ xiꞌat yuꞌun te juꞌeletike, pasa te tut leke. Jich me lek ya yilat te juꞌeletike. 4Porke jaꞌ ay ta tuuntesel yuꞌun te Diose yuꞌun alekil a. Pero teme ma tsaꞌamuk te tut ya apase, jich ayat ta xiꞌel yuꞌun. Porke ma lomuk nax te ay ta skuenta te juꞌeletik te ya yakꞌ kastigo, yuꞌun jaꞌ ay ta mantaltesel yuꞌun te Diose te ya yaꞌbe kastigo te machꞌatik ma tsaꞌamuk tut ya spasike. 5Jich yuꞌun jaꞌ puersa ya skꞌan jchꞌuunbetik smantal te juꞌeletike. Ma me jaꞌuk nax yuꞌun te ya yakꞌ kastigoe; jaꞌ me xꞌanaꞌ ta awoꞌtanik te jich ya skꞌan pasele.
6Jaꞌ sluwar te ya atojik atojemalike, porke te jꞌuꞌeletike ayik ta aꞌtel yuꞌun Dios y jaꞌ yaꞌtelinejik spasel te yaꞌtele. 7Akꞌaik me ta juju-tul te tut ay ta akuentaik yakꞌele. Te machꞌa ay ta skuenta skꞌanel kontribusione, tojbeyaik te kontribusione. Te machꞌa ay ta skuenta skꞌanel tojemale, tojbeyaik me te tojemale. Te machꞌa ya skꞌan xiꞌele, xiꞌaik me. Te machꞌa ya skꞌan akꞌel ta jkuentae, akꞌaik me ta jkuenta.
Tutꞌil ya skꞌan xꞌanotik
8Ma me ayuk machꞌa kechel abetik yuꞌun. Jaꞌuk nax me abetik te kꞌux ya awaꞌiy abaik ta awoꞌtanik ta juju-tule. Yuꞌun te machꞌa kꞌux ya yaꞌiy ta yoꞌtan te sjoy ta genteile, juꞌix yuꞌun spasel spisil te tut ya yal te mantaliletike.
9Te mantaliletike jich ya yal: “Ma me antsiwejan, ma me milawanan, ma me elkꞌajan, ma me ale kꞌop, ma me akꞌupinbey stutik yuꞌun te yane”, xchi me. Pero jaꞌ ito y tutikuk xan mantaliletik jun nax kꞌoem skꞌoplal ta spisil, jich tutꞌil ya yal: “Kꞌux me xꞌawaꞌiy ta awoꞌtan te ajoy ta genteile, jich tutꞌil te jaꞌat te kꞌux ya awaꞌiy abae”, xchi me. 10Te machꞌa ay slekil yoꞌtane makꞌ spasbeyix te tut ma tsaꞌamuk te sjoy ta genteile. Ta skuenta te slekil koꞌtantike la jchꞌuuntik ta lek spꞌejel te mantaliletike.
11Spisil ito ya skꞌan ya jnaꞌtik te tiempo kuxulotik toe. A me jnaꞌtik te jaꞌ yorailix te ya jkux koꞌtantik yuꞌun te wayele, porke te jkoleltike tijilix ay te ora to. Ma jachikuk te tut nail toe te kꞌalal la jchꞌuuntik te skꞌop Diose. 12Te ajkꞌubale lom kꞌaxemix bael y tijilix ay tal te kꞌajkꞌaltike. Jaꞌ yuꞌun ya skꞌan ya jilestikix te tutik ay ta pasel ta ijkꞌal kꞌinale. Ya skꞌan ya jchap jbajtik yuꞌun te sakil kꞌinale jich tutꞌil jtul soltaro te lek xchapoj sba sok te smajkile sok yaꞌtajibe. 13Lek me skꞌan xꞌanotik te tutꞌil ayotikix ta kꞌajkꞌaltike. Ma me jaꞌukix ya jtamtik te yakubele sok te pas-kꞌin te xchꞌeet naxe. Makꞌ me jpastikix te tut ya skꞌupin te jtiꞌbalultik te kꞌayem aye, jaꞌ te antsiwejele, sok te pletoe, sok te il-oꞌtantawaneje. 14Jaꞌ lek chapa abaik ta skuenta te Kajwaltik Jesucristoe jich tutꞌil jun jmakiltike. Ma me anopikix te tut ma tsaꞌamuk ya skꞌupin te atiꞌbalulike.
Currently Selected:
ROMANOS 13: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
