ROMANOS 15
15
Lekukat me sok te ajoy ta genteile
1Te joꞌotik te tulanotik sok te xchꞌuunel koꞌtantike jichukotik me te ya jnaꞌbetik yoꞌolil sbaik te machꞌatik ma tulanuk xchꞌuunel yoꞌtanike. Y ma jaꞌuk ya jletik te joꞌotik nax lek ya kaꞌiy jbajtike. 2Joꞌotik ta jpisiltik jaꞌ ya skꞌan te lek ayotik sok te joytik ta genteile, y aꞌ pasbetik te tut leke skuenta ya xjuꞌ ya xmukꞌub xan ta xchꞌuunel a te Diose. 3Porke jich te Cristoe ma jaꞌuk a sle te tut lek ya xꞌilot ta stukel naxe. Yuꞌun stukel a kꞌot ta skuenta te tut tsꞌibabil ta Sjun te Diose: “Te yutawik te machꞌatik la yutate joꞌon a kꞌot ta jkuenta”, xchi me. 4Spisil te nail albil ta Sjun te Diose la yichꞌ tsꞌibayel yuꞌun jpꞌijuteseltik. Yuꞌun jich me ay spuersa koꞌtantik y sok ya sjunutesbotik koꞌtantik te jich ya jtajtik a te ay tut ya jmalitike. 5Y te Diose, te ya yaꞌbotik spuersa koꞌtantik y sok sbujts koꞌtantike, jaꞌ ya skoltayex te tutꞌil kuxulex te jun awoꞌtanik ta juju-tulexe, jich tutꞌil la yakꞌ ta ilel te Cristo Jesuse, 6yuꞌun ta apisilik jun nax akꞌopik te ya awalik te ben tsaꞌam slekil te Dios te Stat te Kajwaltik Jesucristoe.
Te lekil achꞌ kꞌop la yichꞌ alel ta stojol te machꞌatik ma juriyouke
7Jich yuꞌun, junuk me awoꞌtan abaik ta juju-tul, jich tutꞌil te jun yoꞌtan ta atojolik te Cristoe, yuꞌun jich me ben tsaꞌam slekil skꞌoplal awuꞌunik a te Diose. 8Ya kalbeyex ito: Te Cristoe xtaluk yakꞌ sba ta mantaltesel ta skuenta te juriyoetik yuꞌun jich ya xkꞌot ta pasel te tutik albil ta skuenta te antibo jmeꞌ-jtatike. Yuꞌun jich me ya yakꞌ ta ilel te Diose te jun yoꞌtan te ya yakꞌ kꞌotuk ta pasel te tut ya yale. 9Jich a tal Cristo yuꞌun te machꞌa ma juriyouke ya yalbeyik ben tsaꞌam slekil skꞌoplal te Diose yuꞌun te slekil yoꞌtane. Jich tutꞌil ya yal te
Sjun Diose:
“Jaꞌ yuꞌun te ya kal ta jamal te ben tsaꞌam slekil akꞌoplal ta stojol te nasionetike. Y ya jkꞌayojin kꞌayojetik ta abiil”, xchi me.
10Sok jich tsꞌibabil xan jilel ta Sjun Dios:
“Junuk me awoꞌtanik nasionetik sok te jtejklum yuꞌun Diose”, xchi me.
11Sok jich xan tsꞌibabil jilel:
“Nasionetik y jtejklumetik ta apisilik, albeyaik ben tsaꞌam slekil te Kajwaltike”, xchi me.
12Te jꞌIsaiase jich a stsꞌibay jilel euk:
“Ya me xchiknaj stsꞌumbal te Isai te ya xkꞌot ta gobiernoil yuꞌun te nasionetike. Jich me ya staik spuersa yoꞌtanik yuꞌun”, xchi me.
13Te Diose jaꞌ te ya yakꞌ spuersa koꞌtantike, aꞌ yaꞌbeyex bayal sbujts awoꞌtanik y sok junuk awoꞌtanik te ay xchꞌuunel awoꞌtanik ta stojole. Y ya me yaꞌbeyex xan bayal spuersa awoꞌtanik ta spoder te Chꞌul Espiritue.
Tuꞌun te la stsꞌiba te karta te Pabloe
14Jaꞌex kermanotak, jnaꞌoj ta lek te jaꞌexe beno slekil awoꞌtanik y spisil anaꞌojikix. Y anaꞌojikix te talel bael ya atsits abaike. 15Pero te karta to, ay tulan skꞌoplal ta koꞌtan te la jtsꞌibabeyex tale, yuꞌun ma jkꞌan teme ya xchꞌay ta awoꞌtanike. Jich a jtsꞌibabeyex awaꞌiyik yuꞌun te kichꞌoj kaꞌtel ta skuenta slekil yoꞌtan te Diose. 16Jaꞌ kaꞌtel te ya xtuunon yuꞌun te Jesucristoe yuꞌun slekil a te machꞌatik ma juriyouke. Jich yabatinejon ta yalel skꞌoplal te kolel ya sjapbotik te Diose, yuꞌun jich me ya kikꞌ tal ochel ta stojol Dios te machꞌatik ma juriyouke. Jaꞌ smajtan Dios te ben tsaꞌam ya yil te lekutesbilix yuꞌun te Chꞌul Espiritue.
17Te tutꞌil jchꞌuunej te Cristo Jesuse, ben jun koꞌtan yuꞌun te ayon ta abatinel yuꞌun te Diose. 18Porke ma jaꞌuk ya jtabe ta alel yaꞌtel yan; jaꞌ nax ya kal te tut spasojbon Cristo ta jtojole, skuenta jich ya xchꞌuunik Dios te machꞌatik ma juriyouke. Aꞌtej Cristo ta skuenta te kꞌop la kal, sok ta skuenta te tut la jpase, 19sok ta spoder te seña milagroetik, y sok ta spoder te Espíritu yuꞌun te Diose. Jich ta bayuk nax ta spamal te balmilale la kalix te lek achꞌ kꞌop yuꞌun kolel ta skuenta te Cristoe, kꞌalal ta Jerusalen y ta bayuk nax asta ta Estado yuꞌun Iliria. 20Jaꞌ nax baem ta koꞌtan yalel skꞌoplal kolel te ba ma to ayuk albil skꞌoplal te Cristoe, yuꞌun ma jkꞌan ya jach kaꞌtel te ba ayix yaꞌtel te yane. 21Komo jaꞌ ya jnaꞌ te tut ya yal te Sjun Diose:
“Jaꞌ me ya yilik te machꞌatik maꞌba albot yaꞌiyik skꞌoplale. Jaꞌ me ya yaꞌibeyik sluwaril te machꞌatik maꞌyuk yaꞌiyejbeyik skꞌoplale”, xchi me.
Te jPabloe snopoj te ya xbajt ta Romae
22Jaꞌ sluwaril te maꞌ juꞌ kuꞌun te tal kilex manchuk me bayal buelta te kꞌan talukone. 23Pero te ora to juꞌix kuꞌun te kaꞌtel liꞌ ba estadoetik to. Yuꞌun bayalix jaꞌbil te koꞌtanuk ya jkꞌan xtal kuluꞌtayexe. 24Teme boon ta Españae, ya kil teme ya xjuꞌ kuꞌun te ya xkꞌa kilexe. Teme juꞌ kuꞌun kꞌa kilexe, koꞌtanuk te ya akoltayikon chꞌinuk yuꞌun te sigue ya xbenon baele. 25Pero te ora to ya xboon ta Jerusalen yuꞌun ya xba kꞌabe jilel te skoltayel te hermanoetik te teꞌeyik ae.
26Porke te machꞌatik ayik ta Macedoniae y sok te ayik ta Acayae la snopik te gusto a stsob stakꞌinik te ya stikonbeyik te hermanoetik te ayik ta Jerusalen te ay swokolike. 27La snopik te gusto te jich lek a spasike. Yuꞌun la snaꞌik te ay sbetik kꞌoem yuꞌun te hermanoetik juriyoetike te la spukik te bendision yuꞌun Dios ta skuenta te machꞌatik ma juriyouke. Yan te ora to jaꞌ ya skꞌan ya yichꞌ koltayel te hermanoetik juriyoetik ta skuenta te tutik ay yuꞌun te machꞌatik ma juriyouke. 28Jich yuꞌun, te kꞌalal teme laj koꞌtan ta yakꞌel jilel entregal te majtanil takꞌine, jich me ya xlokꞌonix bael a te ya xboon ta Españae sok ya me xkꞌa kilex te jaꞌexe. 29Y ya jnaꞌ te kꞌalal ya xkꞌoon te ba ayexe ya me yaꞌbeyex bayal bendision te Cristoe ta skuenta te lek achꞌ kꞌope.
30Kermanotak, ya kalbeyex ta skuenta te Kajwaltik Jesucristoe y sok te slekil yoꞌtan te Espíritu te ya yaꞌbotike, awokolikuk kꞌoponbikon Dios ta jtojol.
31Kꞌanbeyaik Dios te ma ba ya yakꞌon ta skꞌabik te machꞌatik ma xchꞌuunejuk Dios te ayik ta Judeae, sok lekuk ya xkꞌo kaꞌbe entregal te skoltayel te ya kichꞌbe bael te hermanoetik ta Jerusalene. 32Skuenta yuꞌun, teme jich ya skꞌan te Diose, jun me koꞌtan ya xkꞌo kilex, teme ya xkꞌoj jkux koꞌtan a te ya xkꞌa kilexe. 33Te Dios te ay bujtsꞌan kꞌinal ta skuentae, a me sjoyinex ta apisilik te jaꞌexe. Jichuk.
Currently Selected:
ROMANOS 15: AMANNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Tzeltal de Amatenango © Sociedad Bíblica de México, 2006.
