Mateo 21

Ko Jesús tyëkë ma ja Jerusalén kajpnën

Mr 11:1-11; Lc 19:28-40; Jn 12:12-19

1Ko ënäty ja Jesús mëët ja y'ijxpëjkpëtëjk jam tmëwinkoonëtë ja Jerusalén kajpn ets jyajtë Betfagé, ma ja Olivos Kopkën. Tääts ja Jesús ja y'ijxpëjkpëtëjk nimäjtsk tkejxy, 2ets t'ënëmaay:

Nëjkxtë xim ma kajpnën. Jam xypyaata'antë kutsumy tu'uk ja krukts to'oxy mëët tu'uk ja y'u'unk. Mmëkäjëtë ets xyajmintëty nimäjtsk. 3Ets ko pën wi'ix y'ëna'anëty, jëtu'un xy'ënëëmëtëty: yë'ë Wintsën yajmëyäjtyp, ko tyajtuunta'ajëty tääts jatëkok tyakankojnëpë.

4Paaty jëtu'un tyuunë jyajtë ets y'atëwëty ja aaw ayuk mëti'ipë ja Tios tyukkajpxnajxën ja kyäjpxynyajxpë, ko y'ënäny:

5Ënëëmëtë yë Jerusalén ja'ayëty:

Tää myajkutujkpë mniminëtë yujypyë naxymyëpë,

kruktskëjxy y'u'unyë,

tu'uk yë jëyujk u'unk

mëti'ipë tsëmy pyatsëëmpyën.

6Tääts ja Jesús ja y'ijxpëjkpëtëjk ojts nyëjkxtë ets tuuntë jëtu'un tä ënäty të yaj'ënä'ämtën. 7Ojts tyajnëjkxtë ja krukts to'ox mëët ja y'u'unk ets wyit tukniyä'ptë ets ja Jesús tukwä'tspejty. 8May ënäty jam ja ja'ay, tam mëti'ipë ja wyit yä'ptëëwtëpën tu'ujoty ets tam mëti'ipë ja kepy'ääy tyuk'oytyuuntëpën ja tu'u ets oy kyëxë'ëkëty. 9Tääts ja ja'ay wintuuy jëxkë'ëy tyëjkëtyë yaxpë jojkpë:

Hosana. Mëj jaanty yë yajkutujkpë David y'u'unk y'ok. Tios kënu'kxëtëp mëti'ipë të kyexyën yë Wintsën. Hosana. Mëj jaanty yë Tios.

10Ko ja Jesús tyëjkëy ma ja Jerusalén kajpnën, jëtu'un ja ja'ay y'ëkmujk y'ëkxu'umnëtë ets may mëti'ipë yajtëëwtëpën:

¿Pën ja'ay tääpë?

11Ets ja ja'ay y'ëtsoowtë:

Käjpxynyajxpë Jesús yë'ë, jam Nazaret tsyoony, Galilea y'itjotm.

Ko ja Jesús twojpëtsëmy ja to'kpëtëjkëty ma ja mëjtsajptëjkën

12Ënät ja Jesús tyëjkëy tsajptëkoty ets twojpëtsëëmtaay ja ja'ay mëti'ipë ënäty jap to'ktëp yajktëpën ets ojts ja ja'ay ja tyo'kpäjn tijjë'ktaayë mëti'ipë ja meeny wyinkukoontëpën, ets ja tyo'kpäjnëty mëti'ipë pak to'ktëpën; 13ets t'ënëmaay:

Jëtu'un kuja'ay myiny: Yë ntëjkës jä'ä yajtijëty Tios mëkajpxtakn e miitsëty jä'ä të xyaj'awinpijnëtë mä'tstakn.

14Ënät myiintë jap tsajptëkoty ja wiintstëjk ets tekymya'atëjk ma ja Jesúsën ets ojts ja Jesús tyajtsokta'ay. 15E ko ja teety wintsëntëjk ets ja yaj'ijxpëjkpëtëjk, mëti'ipë ja ënä'ämën tëyajtën nyija'awëtëpën, ko jëtu'un t'ijxtë ko ja Jesús ja mëj'ajtën tuny ets tmëtoowtë ko ja pi'k ëna'k mëk y'ëna'antë Hosana, Hosana, yajkutujkpë David yë y'U'unk, tääts jyoot'anpëjktë, 16ets t'ënëmaaytyë ja Jesús:

¿Mmëtoopy wi'ix tääpë ja'ay y'ëna'antënë?

Tääts ja Jesús y'ëtsooy:

Nmëtoopyës ¿e këtiinëm xykyajpxtë ja noky ma kuja'ay myinyën ko jëtu'un jyata'any kyëpäta'anyë? Ma y'ënä'änyën: mëët ja pi'k ëna'k ja y'iyëty, ja mëxu'unkëty mëti'ipë tsi'tstëpën, tëë xymyo'oy ja mëk'ajtën ets y'ëwtëty ya'axtëty.

17Ënät y'ëxmajtsëtë ets ojts ja Jesús nyijkxy jam Betania. Jamts ja tsuu tyajnajxy.

Ko ja Jesús tkajpxpoky ja higo kepy

Mr 11:12-14, 20-26

18Jopyëp, jam ënäty kajpntum nyëjkxtë, tääts ja Jesús ja yuu pyätë. 19Ënät ojts t'ijxpaaty tu'uk ja higo kepy jam tu'upë'am ets tmëwinkoony. Nitu'uk ja tyëëm kyaka'ty, ujts aay je'eyë jam. Ënät t'ënëmaay ja higo kepy:

Nijëna'a mkanäkytyëëm'atëty.

E ja higo kepy ënätyë ja tyitsy. 20Ko ja Jesús ja y'ijxpëjkpëtëjk jëtu'un t'ijxtë, tääts mëk tja'awëtyë ets tyajtëëwtë:

¿Wi'ix ko tääpë higo kepy ënätyë të tyi'itsy?

21Tääts ja Jesús y'ëtsoowëtë:

Tëy miits n'ënëëmëtë, pën mmëpëjktëp ets ka'ap yë mjot mwinma'any xyajtëkatstë, ka'ap yi'iyë xytyuntëty tääpë xy'ixtën koos yë higo kepy nyajtë'ëtsy. Yë'ëpaat ya'atë kopk jyëkyejpy xy'ënëëmëtëty: jëwa'ak yaa, nëjkx jap mejyjoty ets jatëp jëtu'un. 22Pën mmëpëjktëp, myajmo'otëp tu'kë'ëyë tii m'amëtoowtëp ko Tios xymyëkajpxtëty.

Jesús kyutujkën

Mr 11:27-33; Lc 20:1-8

23Tääts ko ja Jesús tyëjkëy ma ja tsajptëjkën. Tam ënäty yaj'ixpëky ko nyimiinëtë ja teety wintsëntëjkëty mëët ja mëjja'aytyëjkëty, mëti'ipë jutiis ja'ayëtyën ets yajtëëwëtë:

¿Tiikutujkën mëët ya'atë xytyuny? ¿Pën yë kutujkën mmooyëp?

24-25Tääts ja Jesús y'ëtsoowëtë:

Yë'ë näjyëtu'un nyajtëwäämpyës ma miitsëtyën. ¿Pën ojts yë Juan kyexyë ets yajnëëpätëty, Tios ëkë naaxwiinyëtë ja'ayë? Pën xy'ëtsoowinpijtëpës, ënät ntuk'ëwaanëtëty pën xymyoopyës yë kutujkën koos jëtu'un winë ntuny. 26Ka'ap tjëkyepy n'ëna'anmëty ko ja'ay ojts kyexyë, jä'ä ko tsojk ja'ay wi'ix xytyu'unmëty, y'aaknija'awëtëp yë ja'ay ko Juan Tios kyäjpxynyajxpë ijty. 27Paaty ja Jesús t'ënëmaaytyë:

Ka'apës nijawëtë.

Ënät ja Jesús y'ëtsoowëtë:

Nen ka'ap yam ntuk'ëwaanëtëty pën yë kutujkën xymyoopyës.

Ja nyi''ijxpät ja nimäjtskpë ja u'unk ëna'k

28Tääts ja Jesús yajtëëwëtë:

¿Wi'ix miits ya'atë xyjyä'äkyukëtë? Tu'uk ja ja'ay, nimäjtsk ja myaank. Tu'uk ojts t'ënëëmë: U'unk, nëjkx jam mtuny kamjotm, ma tsatym kyamën. 29Tääts ja y'u'unk y'ëtsoowë: Ka'apës nnëjkxa'any, ok ojts wyinmaaytyëkatsy ets ojts nyijkxy tuunpë. 30Tääts wiinkpë ja myaank näjyëtu'un t'ënëmaay. E jä'ä tëyë ojts y'ëtsoyë: Oy, tyamës nëjkxëty, ets ka'ap ojts nyijkxy. 31¿Pën ojts tpatuny mëti'ipë ja tyeety ojts tyuk'ëne'emyën?

Ets y'ëtsoowtë:

Ja mëjëwyiimpë.

Ets ja Jesús y'ënëmaayëtë:

Tëy miits n'ënëëmëtë, pën mtëjkëtëp ma ja tsajpjotmëpë kutujkën, jëwyiin nëjkx tyëkëtë ja yajkukëpäjtpëtëjkëty ets ku'into'oxytyëjkëty, oknëm miitsëty. 32Jä'ä ko të ja Juan Yajnëëpäjtpë mjaniminëtë ets mjayaj'ijxpëkëtë wi'ix ja Tios tsokyën mjuuky'atëty, ets kä'äpyëm të xymyëpëktë mëti'ipë yë yajkukëpäjtpëtëjkëty ets into'oxytyëjkëty ojts tmëpëktën. E miitsëty oy tu'kë'ëyë ya'atë të xyjya'ixtë, kä'äpyëm të xymyëpëktë.

Ja nyi''ijxpät ja tuunpëtëjk ka'apë oy tyuntën

33Mëtoow'itë ya'atë wiinkpë ijxpäjtën: Tu'uk ja ja'ay ojts tpëjktä'äky ja tsyätym kam ets tnakeemy tnapëjky, ënät t'oytyuuny tu'uk ja tsyätym mä'tstakn ets ojts tkojy tu'uk ja potsy janty këjxm ma yajkëwent'atëtyën ja kam. Tääts ja tuunpëtëjk yajtukë'ëtëjkëtyë ënu'kxy ja kam ets ojts nyijkxy ëpëky it ja wintsën. 34Ko tpaty ja nyixëëw nyipo'o ma ja tsatym yajtukyën, ënät ja tyuunpë ojts jënaakën tkexy ma ja naax kamën ets t'amëtowa'antë ja tsatym mëti'ipë ja kukam paat'ajtëpën. 35E ja tuunpëtëjkëty ojts tmatstë ja ja'ay mëti'ipë ënäty ja kukam të tkexyën; tu'uk ojts twoptë, ojts tu'uk tyaj'ooktë ets tu'uk tkuka'tstë. 36Tääts ja kukam ja tyuunpë wäänë nimay tkejxy. Näyjyëtu'un ojts jyajtkojnëpë.

37Ok ojts ja y'u'unk tkexy, jä'ä ko ojts myäy tyäjy: Wyintsë'ëkëtëp ënät yë n'u'unkës. 38Ko ja tuunpëtëjk t'ixjtë ja kukam ja myaank myiny, tääts nye'ëna'anëtë: Yë'ë ya'atë ja'ay kam myëwë'ëmäämpy. Oy ntimyaj'o'kmëty ets nmëwë'ëmëty yë tsatsymkyam. 39Ënät tmajtstë ets tyajpëtsëëmtë jam kamjotm ets tyaj'o'ktë.

40Ko jya'tëty ja kukam, ¿wi'ix jëtää yajtuntëty ja tuunpëtëjkëty?

41Tääts y'ëtsoowtë:

Yaj'o'kta'ajëp tääpë ëxëëkja'aytyëjkëty ets ja wiinkpë tuunpëtëjk nëjkx tmo'oy ënu'kxy ja kam mëti'ipë yaktëpën ja pëjktä'äky ënätyë mëti'ipë ja wintsën patëpën.

42Ënät ja Jesús y'ëtsoowëtë:

¿Ka'anëm xykyajpxtë ja Tios ja y'aaw y'ayuk mëti'ipë ënaanpën?:

Ja tsaa mëti'ipë ja pojtspëtëjk ojts t'ixka'atstën,

jä'ä tyam të nyäxy potsy myëtënääpyë.

Ja Wintsën jëtu'un të tuny,

ets ëëtsajtëm mëj'ixy n'ijxmëty.

43Paaty miits n'ënëëmëtë: Myajpëjkëjantëp ja tsajpjotmëtë kutujkën ets yë'ë yajmo'oja'antë ja kajpn mëti'ipë ja pëjktä'äky oy yajpëtë'ëkëpën. 44E mëëtpë ja tsaa, pën jam ka'ap ma yë'ëjën, tukwop tuka'atsë jyata'any; ets pën ya'atë tsaa tukka'apäjtëp, way way jyata'any.

45Ko ja teety wintsëntëjk ets ja fariseë ja'ayëty jëtu'un tmëtoowtë, ko ja Jesús jëtu'un myëtyä'äky, ënät tja'akyujkëtyë ko yë'ë yajnimëtyaktëp. 46Ënät ja Jesús tjamatsantë. Ka'ap ojts tmatstë jä'ä ko yë'ë ja mayjyä'äy tsyë'këtëp, mëti'ipë myëpëjktëpën ko ja Jesús Tios käjpxynyajxpë jä'ä.

Currently Selected:

Mateo 21: QUETZMIXE

Highlight

Copy

Compare