Mateo 20
20
Ja tuunpëtëjk mëti'ipë tuuntëpën ma tsatym kyamën
1Jëtu'un ja tsajpjotmëpë kutujkën npëjktakmëty ijxtëm tu'uk ja kukamën, mëti'ipë ojts tsyoonyën tsojkyë tuunpë ixtääpyë ets tyuntëty ma ja tsyätym kamën. 2Ojts tkäjpxy'atë ko tu'k denario yajmëjuya'antë ja tu'kxëëwpë ets tkejxy ja tuunpë jam kyamjotm. 3Tääts ojts tsyo'onkojnëpë mëj petyxyëëw. Ënät t'ijxpaty ja ja'ay jam tyänëtë maayjotm mëti'ipë ka'ap tii tyuunkëtyën 4ets t'ënëmaay: Nëjkx jam näjyëtu'un mtuntë nkamjotmës ets nmëjuytyëty ijxtëm pyaat'atyën. Ënät ojts nyëjkxtë. 5Tääts ja kukam ojts tsyo'onkojnëpë kujkxyëëw ets jatëkok mëj jënäkyxyëëw. 6Tim tsu'ujënëp ënätynyë ko nyëjkxkojnëpë maayjotm ets tpaty ja ja'ayëty mëti'ipë ka'ap tii ja tyuunkëtyën ets tyajtëëy: ¿Tii ko miits yaa mtänëtë xëënaxy ets nitii xykyatuntë? 7Ënät y'ëtsoowtë: Jä'ä ko ka'ap pën ëëts xytyuunkmo'otë. Tääts y'ënëmaayëtë: Nëjkx jam näjyëtu'un mtuntë nkamjotmës.
8Ko tsyu'ujënë, tääts ja kukam t'ënëmaay ja tyuunpë wintsën: Mëkajpxmuk yë tuunpëtëjk ets xymyëjuyëty: yë'ë jëyëjp mëjuyëp mëti'ipë ok të tyëkëtën tuunpë ets ok xymyëjuytyëty mëti'ipë jëyëjp të tyëkëtën tuunpë. 9Tääts myiintë ja mëti'ipë ënäty të tyëkëtën tuunpë jënäkyxyëëw ets nitu'ukjaty kä'pxy ja myeeny t'ëxajëtyë tu'k denario. 10Ok, ko ojts tyuka'ajëtë ja mëti'ipë ënäty jëyëjp të tyuuntëkëtën, jëtu'un myäytyë tyajtë ko wäänëni'ik yajmëjuya'antë; e ko t'ijxtë ko näjyëtu'un yajmëjuytyë tu'k denario. 11Ko t'ëxajëtyääytyë ja myëju'uny, tam mëti'ipë ojts ka'ap ja myëju'uny tukjotkëtä'äkyën, ja kukam yajnikajpxp, 12ets t'ënëmaaytyë: Ya'atë ja'ayëty, ok të tyuuntëkëtë, je'eyë të tyuntë tu'k horë, ets näjyëtu'un të xymyëjuy ijxtëm ëëtsëtyën, etsës tu'kxëëwnaxyës të tuntë ets xëëw'an tëë nmëmëta'aktës.
13Tääts ja kukam nitu'uk t'ëtsooy: Mëku'uk, ka'ap maa nmëtëkoy, jëtu'un të nkäjpxy'ajtëmë ko tu'k denario nmëjuyä'äny ¿këtiijë? 14Ëxajë ja mëju'uny ets mnëjkxëty. Pën ëjts të ntuknipëjktaakë koos jëtu'un nmëjuyä'äny tä mëti'ipë ok të tyëkëtën tuunpë, 15ëjts kë'ëm xypyatp wi'ixës nyajtuunkpaata'any yë nmeenyës, ¿këtiijë? ¿Ëkë yë'ë xytyukka'oy'ijxpës koos oy tii ntunyë?
16Pën tyam ok yajpatëp, jä'ä jëyëjp itantëp; ets mëti'ipë tyam jëyëjp yajpatëp, jä'ä ok itantëp. Nimay ja ja'ay jyayajyaxtsowtë, niwäänë wyinkëta'aktë.
Ko Jesús tnikäjpxy mëtëkëëk ok ja y'o'kën
Mr 10:32-34; Lc 18:31-34
17Tam ënäty ja Jesús tyu'uye'ey mëët ja y'ijxpëjkpëtëjk, jam nyëjkxtë Jerusalén, ko ojts ëpëky tmëkajpxmuky ja y'ijxpëjkpëtëjk ets t'ënëmaay:
18Ejxtëm xy'ixtën, jam nëjkxëmë Jerusalén, ma ja naaxwiinyëtë ja'ay ja y'U'unk yajkë'ëyaka'anyën: ma ijxpëkyjyä'äytyëjkëtyën, teetytyëjkëtyën, yaj'ijxpëjkpëtëjkëtyën mëti'ipë ënä'ämën kutujkën nyija'awëtëpën ets tni'ënä'ämëja'antë ets y'ookëty, 19tkë'ëyaka'antë ma jaaypyaat jaaypyo'kxyën, mëti'ipë nëjkx nyëxi'iky tyukxi'ikyën, twoptën tka'atstën ets tyajkruutspätën, e kom tëkëëk xëëw tääts ja tëkëëk jyuukpyëka'any.
Ma Jesús t'ëtsoowinpityën ja Santiago ets ja Juan ja tyaak
20Ënät ja Zebedeo y'u'unk myiintë mëët ja tyaak ma ja Jesús ets ja u'unktaak nyäkyoxtënaaytyakë Jesús wyintuuy, t'amëtoy tu'uk ja mëyajtën. 21Tääts ja Jesús tyajtëëy:
¿Tii mtsojkpy?
Ets ja to'oxytyëjk y'ëtsooy:
Ëjts yë'ëjës ntsojkpy etsës ja nmaank nimäjtsk jam y'u'unyëtëty mpë'am ma mkutujktaknën, tu'uk m'a'oytsyow ets tu'uk m'anajnytsyow.
22Tääts ja Jesús y'ëtsooy:
Miitsëty ka'ap xynyijawëtë tii m'amëtoowtëpën. ¿Mëmëta'aktëp ja ëyo'on mëti'ipës nkupëkäämpyënë?
Tääts y'ëtsoowtë:
Nmëmëta'aktëpës yë'ë.
23Tääts ja Jesús y'ëtsoowëtë:
Wä'än jëtää xymyëmëta'aktëty ja ëyo'on ijxtëmës n'ëyowa'anyën, je'eyëp ko ja ënyääytyakn mëti'ipë jamën maas yë nkutujktaknën, ka'ap y'ëjtsëty xypyääty miits nmo'otëty. Jä'ä yajmo'otëp mëti'ipë ja nTeetyës të tuknipëjktaakën.
24Ko jëtu'un tmëtoowtë ja Jesús ja y'ijxpëjkpëtëjk ja nimajkpë, tääts tukjoot'anpëjktë ja nimäjtskpë ja myëku'ukëty tu'kkä'äxpë. 25Tääts ja Jesús twoowmujky ja y'ijxpëjkpëtëjk ets t'ënëmaay:
Ejxtëm xynyijawëtën, ma ja'ayëtyën mëti'ipë ka'ap yë Tios tnijawëtën, yë yajkutujkpëtëjkëty amëj akëjxm y'ënä'ämtë ma ja ja'ayëtyën mëti'ipë pa'tjuuky'ajtëtëp ets ja mëti'ipë kutujkënmëët näjya'awëtëpën, jëtu'un y'ëne'emy ijxtëm ja tyimjot tyimwinma'anyën. 26E ma miitsëtyën ka'ap tjëkyepy näjyëtu'un m'ëtë'ëtstëty. Mëti'ipë mëj'äämpy naxaanpën ni'ikyë mëpaat myëku'uk tmëtuny 27ets mëti'ipë jëyëjp'ataanpën, ni'ikyë mëpaat nyäpyëjktä'äkyë tä tu'uk mëtuunpën. 28Jëtu'un ijxtëm ëjtsën, ka'apës yë'ëjëty të niminy etsës yë ja'ay xymyëtunëty, yë'ëjës të niminy etsës ja ja'ay nmëtunëty etsës nkëpätëty ja naaxwiinyëtë ja'ay ja nyëë pyoky.
Ko Jesús tyaj'ijxë'ëky nimäjtsk ja ja'ay wiintspë
29Ko tsyo'onëtë Jericó, nimay ja Jesús ja'ay pyatso'onë. 30Jamts ënäty nimäjtsk ja ja'ay wiintspë y'u'unyëtë tu'u ëkë'ëm. Ko tmëtoowtë ko ja Jesús jam nyäxy, tääts tyëjkëtyë yaxpë jojkpë:
Wintsën, yajkutujkpë David y'u'unk, pa'ëyoowtëkës.
31Tääts ja ja'ay ojts y'ojëtë ets y'ëmontëty ets wäänëni'ik tyëjkëtyë yaxpë jojkpë:
Wintsën, yajkutujkpë David y'u'unk, pa'ëyoowtëkës.
32Ënät ja Jesús wya'k'o'oyëy ets ojts tmëkäjpxy ja ja'ay mëti'ipë wiintsëtyën ets tyajtëëy:
¿Tii mtsojktëp ets ntukmëtuntëty?
33Tääts y'ëtsoowtë:
Wintsën, yë'ëjës ntsojktëp etsës xyaj'ijxë'ëktëty.
34Tääts ja Jesús pya'ëyoowëtë ets ojts ja wyiin tyo'onxëtë. Ënätyë ja ja'ay ja wiintsëtypë ojts y'ijxpëktë ets ja Jesús tpatso'ontë.
Currently Selected:
Mateo 20: QUETZMIXE
Highlight
Copy
Compare
Share
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
