Mateo 22
22
Ja nyi''ijxpät ma ja ja'ay kyäytyën y'uuktën ko pën pyiky
Lc 14:15-24
1Tääts ja Jesús ojts tmëtyaktsoony jatëkok ja ijxpäjtën ets y'ënëmaayëtë:
2Jëtu'un ja tsajpjotmëpë kutujkën ijxtëm ja yajkutujkpë xyëëwtunyën ko ja myaank tyajpëka'any. 3Ets ja tyuunpë tkejxy ets ja ja'ay twowtëty, e ja ja'ayëty ka'ap myinantë. 4Tääts ja wiinkpë ja tyuunpë ojts tkexy ja'aywyoopë ets t'ënëmaay: Nëjkx ënëëmëtë ja ja'ayëty ko ja kääky apaatë y'owxijnë. Tëës ni'ënä'ämë ets ja tsajpkaa y'ookëty: tsajpkaa ayääkë ets ni'kxëtypë. Apaatë y'ijtaaynyë, wä'än min tkaytyë. 5E ja ja'ayëty mëti'ipë ojts jyayajwowtën ka'ap ja myiintë kääpyë. Tuu'k, ni'ikyë ojts nyijkxy kyamjotm, tu'uk ajuupyë ato'kpë ojts nyijkxy, 6ets ja wiinkëtypë ni'ikyë ojts tmatstë ja yajkutujkpë ja tyuunpëtëjk ets tyaj'o'ktë. 7Ënät ja yajkutujkpë ojts yajxon jyoot'anpëky ets tkejxy ja tsyiptuunpëtëjk ets tyaj'o'kta'atëty ja yajja'ay'o'kpëty ets tnaxkuno'okëtyë ja nyaax kyajpn. 8Tä t'ënëmaay ja tyuunpëtëjk: Tap y'owxijnë ja ka'ayën ukën, tääpë ja'ayëty mëti'ipë të jyayajwowtën ka'ap nyitëkëtë myintëty. 9Nëjkx mjëtitë në'ëjoty tu'ujoty ets xywowtëty tu'kë'ëyë ja'ay mëti'ipë mpatëpën wä'än min tkaytyë t'uuktë. 10Tääts ja tuunpëtëjk tsyo'ontë ets ojts twoowmujkta'atë mëti'ipëjaty pyatën, wä'än t'oyjyä'äy tka'oyjyä'äyëty. Jëtu'unts ja tëjk y'ujtsy mëët ja ja'ay woypyë witsypë.
11Ko ja yajkutujkpë tyëjkëy ets tkajpxpo'kxa'any ja mayjyä'äy mëti'ipë ënäty të yajwowtën, ënät t'ijxy tu'uk ja ye'etyëjk mëti'ipë ka'ap xyoxyëtyën mëët ja wit mëti'ipë ja'ay pyëjktaktëpën ko pën pyëjkpë nikay. 12Tää t'ënëmaay: Mëku'uk ¿Wi'ixën të mtëjkënë yaa, kajts ja mwit xymyëët'aty mëti'ipë ja'ay pyëjktaktëpën ko pën pyëjkpë nikay? E ja ye'etyëjk amonyë y'ity. 13Ënät ja yajkutujkpë t'ënëmaay ja tyuunpë: Kë'ëtsumtë tekytsymtë ets xypyëjkta'aktëty jap tëja'p akootstuuy, ma ja'ay jyë'ëtëty ya'axtëtyën ets nyätyëtskääpëtëtyën. 14Jä'ä ko nimay ja ja'ay jyayajyaxtsowtë, wäänë wyinkëtä'äky mëti'ipë win'ixëtyën.
Ko ja Jesús tnimëtyä'äky ja kukëpäjtën
Mr 12:13-17; Lc 20:20-26
15Ënät ja fariseë ja'ayëty ojts tkäjpxy'atë wi'ix ja Jesús jeexyë kyajpxtëkoyën ets tni'ëënëja'antë. 16Paaty ojts tkäxtë ja y'ijxpëjkpëtëjk mëët ja Herodes jyä'äy ets ja Jesús t'ënëmaaytyë:
Wintsën, nija'awëtyëp ëëtsëty ko mijts mëtëy winë xykyäjpxy ets ko mijts mëtëy ja ja'ay xytyuk'ijxpëky ja Tios ja nyë'ë tyu'u oy pën tëkatsy mnikäjpxy mnimëtyä'äkyë, jä'ä ko ka'ap yë'ëkyëjxmëty winë oy xytyuny ets ja ja'ay m'oyjyawëtëty. 17Tuk'ëwa'anëtyëk ëëts: ¿Paat'ajtëp koos ja yajkutujkpë César nmëkëpätëty ëkë ka'apë?
18Jesús ojts t'ixy ko je'eyë wyinma'any'ixtë, paaty t'ënëmaay:
Oyjyä'äy mnätyijëtë, ¿tii ko miits xyajkajpxtëkoya'antës? 19Tuk'ijxtëkës ja meeny mëti'ipë myajtuuntëp ko myaktë mkëpätë.
Tääts ojts tu'uk ja meeny tyajmintë mëti'ipë tyijtëpën denario meeny 20ets ja Jesús yajtëëwëtë:
¿Pën ya'atë wyiin jyëjp nikojtu'uty ets pën ya'atë xyëëw këxja'ay?
21Tääts y'ëtsoowtë:
Ja yajkutujkpë.
Ënät ja Jesús y'ëtsoowëtë:
Mo'otë yë yajkutujkpë mëti'ipë jyä'ä'ajtypyën ets mo'otë Tios mëti'ipë paat'ajtëpën.
22Ko jëtu'un tmëtoowtë, mëjmëtoy ojts tjawëtë, ënät tpuwa'ktutë ets ojts nyëjkxtë.
Ko ja ja'ay tyajtëwtë pën juukpyëkantëp ja o'kpë
23Näy jä'ä xëëw ja Jesús nyimiinëtë ja satuceos ja'ayëty, mëti'ipë ënantëpën ko ja o'kpë ka'ap jyuukpyëktë ets tyajtëëwtë ja Jesús:
24Wintsën, ja Moisés ja y'ënä'ämën jëtu'un y'ënä'äny: ko tu'uk yë ja'ay y'ookëty ets ka'ap pën y'u'unk, yë myëkä'äx yë'ë nëjkx tpuwa'akë ja to'oxytyëjk mëti'ipë ënäty nyi'o'ktutypyën ets jëtu'un'äämpy ja y'äjty tmëët'atëty ja y'u'unk y'ëna'k. 25E yë'ëts yam ntukmëmëtya'akantëp ko yaa ma ëëtsëtyën tää ijty tëëyëp ja'ay tsyëënëtë, niwëxtujk ijtyëty aak tu'kä'äxëty. Ja kä'äxkopk ojts pyiky ets y'o'ky. Nitu'uk ja y'u'unk kyaka'ty, paaty ja tyo'oxytyëjk ojts jä'ä ja y'uty tukmëwë'ëmy. 26Ja y'uty ojts ja ku'ookytyo'oxy tpëky ets ojts y'ooky, näjyëtu'un jyäjty ja mëtëkëëkpë ets aakjëtu'un niwëxtujk jyajtaaytyë. 27Ko ni'ëmukë y'o'ktaatyëy ja ye'etyëjkëty, tääts ja to'oxytyëjk ojts näjyëtu'un y'o'knë. 28E ko ja o'kpë nëjkx jyuukpyëktë, ¿pën nëjkx to'oxytyëjk'aty ya'atë ja to'oxytyëjk? niwëxtujkëty tëë ënäty tpëjk'apëtsëëmta'atë.
29Tääts ja Jesús y'ëtsooy:
Mkajpxtëkooytyëp miitsëty, jä'ä ko xykyanijawëtë ja Tios ja y'aaw y'ayuk ets ni xykyanijawëtë ja myëk'ajtën. 30Ko ja o'kpë jyuukpyëktëty, ni pën nëjkx kya'ëkpëjk kya'ëk'uknë, jëtu'un nëjkx y'ijnëtë ijxtëm ja anklëstëjkëtyën. 31E mëëtpë ja o'kpëtëjkëty ko jyuukpyëka'antë. ¿Këtii xykyajpxtënëm ma Tios kë'ëm y'ënä'änyën: 32Ëjts xyTios'ajt ja Abraham, Isaac ets ja Jacob? Tios ka'ap yë'ëjëty niTios'aty o'kpë, yë'ë nyiTios'ajtyp mëti'ipë juuky'ajtëpën.
33Ko ja ja'ay jëtu'un tmëtoowtë, mëjmëtoy ojts tjawëtë ko ja Jesús jëtu'un yaj'ijxpëjkëtë.
Ënä'ämën wäänë mëjpë
Mr 12:28-34
34Tääts ja fariseë ja'ayëty ye'eymyujktë ko tnija'awëtyë ko ja Jesús ënäty tëë amonyë tyajwë'ëmy ja saduceos, 35ets nitu'uk ja fariseë ja'ayëty mëti'ipë oy nyija'awëp ja Moisés ja y'ënä'ämën, ojts tjawinma'any ixa'any ja Jesús ets tyajtëëy:
36Wintsën, ¿mëti'ipë jëtää ja Tios ja y'ënä'ämën ni'ik kopkpëky?
37Ets ja Jesús y'ëtsooy:
Tsok ja Wintsën mëët tu'kë'ëyë ja mjot mja'awën, mjot mwinma'any ets mma'ayën mtajën. 38Ya'atë ënä'ämën yë'ë jëtu'un wäänëni'ik kopkpëky. 39E ja mëmäjtskpë yë'ë mëti'ipë ënaanpën: Tsok ja mmëku'uk ijxtëm kë'ëm mnätsyokyën. 40Ma ya'atë ënä'ämënën mäjtskpë jää ni'ëmukë tsyo'onta'ay ja ënä'ämën ets mëti'ipë ojts tkajpxtën ja käjpxynyajxpëtëjkëty.
Pën ja Kristë y'u'unk y'ok
Mr 12:35-37; Lc 20:41-44
41Tam ënäty ja fariseë ja'ayëty tu'ukmukyë yajpaatë, 42ko ja Jesús yajtëëwëtë:
¿Wi'ix miits xymyëmay xymyëtajtë ja Kristë. ¿Pën jëtää yë Kristë u'unk'ajt ok'atëp?
Tääts y'ëtsoowtë:
David yë y'u'unk y'ok.
43Ënät ja Jesús y'ënëmaayëtë:
Pën jëtu'un, ¿wi'ix ko ja David yajkajpxpëtsëmyë ja Tios ma tmëkäjpxyën ja Kristë, Wintsën. Ma y'ënä'änyën ja David:
44Jëtu'un ja Wintsën t'ënëmaay ja nWintsënës:
U'nyë maas n'a'oytsyowën,
koonëmës yë mmëtsip nmëmëta'akëty.
45¿Wi'ixtsën ja David yë'ë t'u'unk'aty t'ok'aty ja Kristë, pën yë'ë kë'ëm myëkäjpxyp Wintsën?
46Ni tuk'aaw pën tkajajty t'ëtsoowinpitëty ja Jesús, je'eyë jëtu'un t'ëxmajtstë ka'ap ojts pën nëkoo tii t'ëkyajtëëwnë.
Currently Selected:
Mateo 22: QUETZMIXE
Highlight
Copy
Compare
Share
Want to have your highlights saved across all your devices? Sign up or sign in
Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process
