Tito 3
3
Nat iyo'ygawa'n cupʉcpajyat
1Tsawigʉs̈ ma jayaumayga iguimanda̱tcáj gobernadojrat mit autoridajat, ma cuji'cs̈iga iguiwatcawa'n nu'pʉjʉn cosa oyway. 2Magatucotsca nepʉn, magatsuguinwatca, ma jayawanga, ma respeta̱tca nu'pʉjʉn jayajwat.
3Mit ʉjtsat ámbanu natontojo'jcatate, nagajayaumaygawu, natsʉ̱ngapate togoyic, nawatcawey lo que iyo'tway najo̱jtat mit lo que nas̈jo̱tju'pcaway, nawatí̱jcau mal, na-angau jeme ijtʉpay, mit jayajwat nas̈-angawey mit nani-angʉjʉu nanu'pʉjʉjnat. 4Po ayé Dios jeme nas̈salva̱tcaway nas̈actujawigau ni'c je' oyo'c, mit je' iwangʉs̈p nu'pʉjʉn jayajwat. 5Je' nas̈salva̱tcau ni'c nas̈-ayo̱wis̈cau, caje' ni'c nawatcau oy pa Dios nas̈pʉctsougáj. Je' nas̈limpia̱tcau pa nanamjátca, mit Espíritu Santu nas̈watcau as̈am namjayajwat. 6Mit Dios nas̈moygau Espíritu Santu mit may favor ni'c nacupʉjcap Jesucristu jeme nas̈salva̱tcapay, 7mit je' nas̈yacs̈icninʉmgap ni'c nas̈wano'jcau, pa we'n napʉctsougáj ayé vida cacʉs̈ámpay jeme na-atsʉ̱ngapay.
8Iyacs̈ta'cway ayé tʉnyʉmway. Mit tʉnwamp pi ajque's̈ ayʉ̱́j cosajat, pa we'n jeme icupʉjcapay Dios ma cuji'cs̈iga iguiwatcawa'n oy. Oy nawátca we'n, ni'c ayé pichimp oy pa nu'pʉjʉn jayajwat. 9Camwatcʉs̈ cuenta jeme tʉ'tscotscapay, jeme inʉ'jutcapay ampay jayajwat, jeme i-acchu̱chigapay tsuguin mit jeme ituni-ago'jcʉjʉpay ley. Mit ayé jalmanu mit caservia̱tp pa neti.
10Te tu'c jayau iwatp división mit cupʉcpajyat, che'cta'c mechpac mit te cajayaumayp, ingajamunipʉjcʉp. 11Injawip ni'c tu'c jayau wename'way yo'yp togoyic mit iwatp mal, mit tsʉ̱nap condena̱tic ni'c we'n iguiwat.
Pablo itsawip Tito
12Cuandu tʉ-ajyu'jtawa'n Artemas o Tíquico, cuji'cs̈i inmi'nwa'n nʉ'jcopac Nicópolis mam tʉtsʉ̱nawa'n, ni'c tʉmpensa̱tp jem tʉs̈nas̈wa'n payic. 13Majyigʉs̈ Zenas abogajna' mit we'ney Apolos, mit nʉs̈ yacta̱jcʉs̈ oymanac, mit moygʉs̈ ma iguigatogoygac neti. 14Mit we'ney ma pʉctanga ayé cupʉcpajyat mam intsʉ̱nga pa iguiwatcawa'n cosa oyway, pa ma majyiga jeme nesita̱tijcatway, ma pichin oy lo que iwatcapay.
Ultimu saludu
15Nu'pʉjʉn tsʉ̱ngapay mit ʉ̱ is̈saluda̱tcap. Saluda̱tcʉs̈ ayé cupʉcpajyat jeme nas̈wangapay. Dios pi is̈moygac favor minu'pʉjʉjnat. Amén.
Currently Selected:
Tito 3: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
