Tito 2
2
Tu'c oyway ama̱s̈an
1Po mi̱ ajque's̈ as̈am iguinʉm ayé oyway ama̱s̈an. 2Ajque's̈cʉs̈a na'waywájat ma pensa̱tca oy, ma yo'yga yacs̈ic, magatʉ'tswatcayu neti, ma cupʉjca oy, ma niwangʉjʉ, ma majmoyga cuandu iguitunas̈ca. 3We'ney ajchwaywájat ma niporta̱tcʉjʉ as̈am i-adora̱tcapay Dios, maga-ajca's̈ʉ'jca nejʉmay we̱t, magamu̱jcʉjʉ, ma yajca oyway ejemplu. 4Ma tsawiga yauto's̈ajyat ma wanga ina'jwat mit ma wanga-ey iwajyat. 5Magatʉ'tswatcayu neti, ma yo'yga limpiu, ma cuida̱tca itʉjcat, ma watca oy, ma jayaumayga ina'jwat, pa we'n nepʉn igatucojtsáj Dios ipalabra.
6Tsawigʉ́s̈ey ya̱wayna'jat magawatcada̱jca ma̱jlat. 7Actujawigʉs̈ ni'c mi̱ inwatp oy nu'pʉjʉn pa ma pʉjca tu'c oyway ejemplu. Actujawigʉs̈ ni'c inajque's̈p oyway ama̱s̈an, mit ma jawiga ni'c migatʉ'tscotspu, 8pi cots oy pa pigatsʉ̱na culpa̱tic, pa we'n tu'c mutsuguin inacwinchu̱gáj mit ca-oyáj is̈malninʉmgap.
9Tsawigʉs̈ ayé mozojat ma jayaumayga ijaycat pa ma iguigusta̱tcac nu'pʉjʉn lo que iwatcapay, mit magacochpo'nga, 10maganu'mgaja neti ijaycat, ma actujawiga ni'c ijayaumaygap oy nu'pʉjʉn. Ma watca nu'pʉjʉn ayʉ̱́j cosajat, pa we'n tsʉ̱náj oyninʉmic i-ama̱s̈an ayé Dios nas̈salva̱tcapay.
11Dios nas̈actujawigap ni'c nas̈wangap mit iyac favor pa nu'pʉjʉn jayajwat ma tsʉ̱nga salva̱tic. 12Mit jinap Dios nas̈actujawigap ni'c nacuyáguiga nu'pʉjʉn mal igawampay je'. Nacuyáguiga-ey jeme iwangapay mal itpay en ayʉ̱́j mundu, mit nagawatcadá̱jca ma̱jlat. Nawátca lo que iyacs̈ta'cway, na-adorá̱tca Dios jinapay tiempu. 13Na-atsʉ̱́nga jeme nas̈acji'jcajámpay najo̱jtat, ni'c que's̈ta'gáj oymanac Jesucristu jeme nas̈salva̱tcapay, mit na-e'pcáj ayé Dios jeme mʉjninʉmicway. 14Je' iyac ivida pa nas̈chi'tcajáj nu'pʉjʉn mal na-aguepcapay, mit nas̈limpia̱tcawey pa nas̈je'jatcáj Dios, pa we'n nawangáj nas̈watcawa'n cosa oyway. 15Nʉmgʉs̈a we'n cupʉcpajyat, tsawigʉs̈ mit che'cta̱jcʉs̈ jeme iwatcapay mal. Inwatáj we'n as̈am tu'c jayau manda̱tpay. Camniyajcʉ is̈-e'pcáj menus.
Currently Selected:
Tito 2: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
