Filemón 1
1
Pablo ija'jyap Filemón
1Ʉ̱ Pablo. Tʉtsʉ̱nap presu ni'c tʉncupʉcp Jesucristu. Ʉ̱ mit hermanu Timoteo tʉsaluda̱tcap mi̱ Filemón. Mi̱ tʉwangap mit is̈muyos̈watcap pa Cristu. 2Mit tʉnsaluda̱tcapey hermana Apia mit Archipo, mit je' lucha̱tp pa Cristu mit ʉjtsat. Tʉnsaluda̱tcap ayé cupʉcpajyat jeme ni-apʉcmujcʉjʉpay intʉcm. 3Dios Nate̱jat mit el Señor Jesucristu pi is̈moygac favor mit paz.
Nat icupʉc Filemón
4Tʉnyʉjmap Dios ni'ctiyu̱s̈ cada tʉ-ora̱jtawa'n mi̱, 5ni'c tʉnmarap ni'c inwamp el Señor Jesús mit incupʉcp je', mit inwangʉs̈pey nu'pʉjʉn Dios ijayajwat. 6Tʉn-ora̱jtap Dios pa ma pichin oy lo que inwatpay ni'c inactujawigʉs̈p jayajwat lo que incupʉcpay pa je'jat ma cupʉjca-ey. Mit we'n inactu-is̈capcʉs̈áj cosa oyway na-aguepcapay ni'c nacupʉjcap Cristu Jesús. 7Hermanu, ji'go'cp tʉnjo̱jtat mit tʉtsʉ̱ngap contentu ni'c inmuniwangʉs̈ʉp jayajwat, mit mi̱ in-anima̱tcʉs̈p Dios ijayajwat.
Pablo iyo'jtap favor Filemón
8Mit Cristu tʉs̈moy derechu pa tʉmanda̱twa'n mi̱ pi wat lo que tʉnʉjmámpay, 9po como tʉwamp mi̱, tʉgamucotsp as̈am tu'c manda̱tpay po tʉyo'jtap favor. Mi̱ in-e'p ni'c ʉ̱ Pablo tʉna'wayanu mit jinap tʉtsʉ̱nap presu ni'c tʉncupʉcp Jesucristu. 10Tʉyo'jtap pa Onésimo. Je' tʉn-e'p as̈am tʉnwáy ni'c tʉnactugupʉc Cristu yam cuytujugum.
11Mit Onésimo in-ampay mozo mit is̈pichijnau mal, po jinap is̈servia̱jtáj oy, mit ʉ̱ we'ney tʉs̈servia̱jtap oy. 12Mit jinap tʉ-ajyu'jtájatu Onésimo, mit impʉctsowáj je' oymanac ni'c ʉ̱ tʉnwano'cp je. 13Ʉ̱ tʉnwampate ma tan mit ʉ̱ ma tʉs̈servia̱jtac yam ilugar de mi̱ mientras tʉtsʉ̱nap presu por ayé oyway noticia. 14Po tʉngawanu tʉs̈watwa'n neti ni'c tʉga-ucyo'tu mi̱, pa we'n ayé oy inwatpay ingawatáj obliga̱tic, po inwatáj ingustuni'c. 15Je' is̈cupo'c pa tu'c tiempujyu po jinap tanáj mit mi̱ pa siempre. Tʉs̈jawi jemni'c ijajt we'n. 16Ingajapʉctsowáj as̈am tu'c mozo ni'c je' jatáj más que tu'c mozo. Je' jinap impʉctsowáj as̈am tu'c hermanu jeme nawangapay. Ʉ̱ tʉnwano'cp mit mi̱ inwa'náj más, ni'c je' inmupro̱wije̱way mit je' tu'c hermanu icupʉcpay el Señor.
17Te mi̱ inyʉmp ni'c ʉjtsat tu'gu nayos̈watcap pa Cristu, tʉnwampey pi pʉctsou je' as̈am ʉ̱ is̈pʉctso̱p. 18Mit te je' is̈wajtau mal o te is̈tajnau pʉjqui, yajcac tʉncuentani'c. 19Ʉ̱ Pablo tʉja'jyap mit tʉnfirma, ayé cuenta ʉ̱ tʉntso'gáj. Mit ʉ̱ oyapate tʉnʉjma ni'c mi̱ is̈pʉjqui más ni'c ʉ̱ tʉ-actugupʉc Cristu. 20Mi̱ hermanu, wajtac favor is̈pʉctsowa'n Onésimo pa ma ji'c tʉnjo̱jt. Tʉyo'jtap ayʉ̱́j favor ni'c nacupʉjcap el Señor.
21Tʉja'jyap ni'c tʉnjawip ni'c mi̱ is̈jayaumayáj, mit tʉnjawip ni'c inwatáj más, caje'yu tʉyo'jtapay. 22Mit tʉyo'jtapey pi is̈-oyajcac tu'c lugar pa ʉ̱, ni'c tʉnatsʉ̱nap tʉnʉs̈wa'n mam mijchat, po orá̱tca mʉgʉc pa Dios ma tʉs̈libra̱tac.
Ultimu saludu
23Is̈saluda̱tp Epafras jeme tsʉ̱napay presu mit ʉ̱ ni'c tʉncupʉjcap Cristu Jesús. 24Is̈saluda̱tcapey Marcos, Aristarco, Demas mit Lucas jeme tʉs̈muyos̈watcapay pa Cristu.
25El Señor Jesucristu pi is̈moygac favor minu'pʉjʉjnat. Amén.
Currently Selected:
Filemón 1: PSNT
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
