Romanos 9
9
Dios icupiugʉs̈ Israejlatway
1Tʉnyʉmp iyacs̈ta'cway ni'c tʉncupʉcp Cristu, mit tʉgawe̱tp. Mit Espíritu Santu tʉs̈actujawip ni'c iyacs̈ta'cway lo que tʉnyʉmpay. 2Tristejo'c tʉtsʉ̱na mit tu'no'cp tʉnjo̱jt, 3ni'c tʉnwamp ma tsʉ̱nga salva̱tic Israelway jayajwat ni'c je'jat nije'yu tʉntʉcmayna̱s̈way. Tʉnwangʉs̈p je'jat mit tʉtsʉ̱napate dispuestu Cristu ma tʉs̈yagac pe'ta̱m pa tʉtogoywa'n, te je'jat icupʉjcap Jesús. 4Je'jat Israejlatway ni'c pichingau Israel ifamiliani'c, mit Dios iwayjatcʉs̈. Dios i-actu-is̈cʉs̈ ni'c je' oymanac, mit iyajcʉs̈au may acuerdujat, imoygʉs̈ ley, i-actuwatcʉs̈ itemplujat mam i-adora̱tca, mit imoygʉs̈ may promesajat. 5Mit je'jat nate̱jtat ámbanuway iwajyat, mit Cristu min je'jat ifamiliani'jcat. Cristu min en ayʉ̱́j mundu as̈am jayau po je' Dios jeme imanda̱tpay nu'pʉjʉn. Na-oyninʉ́mga je' pa nu'pʉjʉn tiempu. Amén.
6Mit nepʉn maganʉm ni'c cacumplia̱táj lo que Dios inʉmway. Mayo'c Israejlatway catsʉ̱ngap oy mit Dios. Mayo'c ayé jayajwat pichingau Israel ifamiliani'c, po caje' Israejlatway iyacs̈ta'cway. 7Mit mayo'c jayajwat pichingau Abraham ifamiliani'c, po caje' nu'pʉjʉn Abraham iwajyat iyacs̈ta'cway, ni'c Dios inajau Abraham: “Tʉn-e'pcʉs̈áj as̈am inwajyat solo jeme pichingapay Isaac ifamiliani'c.” 8Ayʉ̱́j inʉmo'jcʉp ni'c caje' Dios iwajyat nu'pʉjʉn jeme pichingaway Abraham ifamiliani'c. Dios i-e'pcʉs̈p as̈am iwajyat jeme itcaway por ayé promesa iyacway Dios. 9Ni'c ayʉ̱́j ayé promesa Dios iyajcaway Abraham, inajau: “S̈iwit mimpay tʉmi'náj yam, mit into's̈ay Sara ijtʉ̱́j tu'c iway.”
10Mit tʉnʉmgʉs̈áj jatu'c ejemplu. We'ney Rebeca iguitajnau iway me̱chwájat por ayé jayau Isaac, mit je' nate̱jtat ámbanuway. Mit ayé me̱chwájat inʉ'jyat Jacob mit Esaú. 11Mit ayé me̱chwájat cani-itcapate ne iganiwatcap oy ne mal, po Dios icupi̱u jaran tu'c de je'jat, ni'c Dios icupi̱p as̈am je' iguijawi. Dios igacupiugʉs̈p jayajwat por lo que iwatcaway, po je' iya̱s̈p pʉn iwa'námpay. 12Mit jemni'c Dios iguinʉ́jmaj Rebeca: “Esaú jeme ijtʉ'cway iservia̱jtáj Jacob jeme itway últimu.” 13As̈am itsʉ̱na ja'yic Dios ilibruni'c: Jacob más tʉnwan po Esaú tʉngawanu.
14¿Jinap ti nanʉmgáj? ¿Is̈jawiga Dios igawatp oy? Caje' we'n. 15Ni'c Dios inʉjmau Moisés: “Tʉnmo'áj favor pʉn tʉnwa'námpay, mit tʉnayo̱wis̈áj pʉn tʉnwa'námpay.” 16Mit jemni'c caje' te jayajwat iwangap o te icuji'cs̈igap pa iguipʉctsougawa'n ayé favor. Dios i-ayo̱wis̈p pʉn iwa'námpay. 17Ja'yic itsʉ̱na Dios ilibruni'c. Dios inajau rey Faraón: Tʉyac mi̱ pa rey mit cʉs̈ tʉcastiga̱t, ayé pa jayajwat ma jawiga ni'c ʉ̱ tʉmanda̱tp, mit we'n inʉmgáj jʉmba'tu lo que ʉ̱ tʉnwatpay. We'n iguinʉjm Dios. 18Jemni'c Dios i-ayo̱wis̈p pʉn iwa'námpay, mit pʉn iwa'námpay imo'áj laj ma copacmʉgʉcwat.
19Jinap ʉ̱ is̈-ucyo'tcáj: “Te we'n iguiwat Dios, ¿tini'c iguiculpa̱tcʉs̈ jayajwat? ¿Pʉn oyap igui-atuc lo que Dios iwatpay?” 20Po ʉjtsat nagaje'jat neti. ¿Is̈jawiga namuninʉmgʉjʉ̱́j Dios? ¿Is̈jawiga tu'c s̈uy inʉjmáj s̈uywatpayna': “Tini'c ʉ̱ is̈wat we'n?” 21Tu'c s̈uywatpay oyap iguiwat tu'c s̈uy as̈am je' iguijawi. Je' iwatáj tu'c s̈uy pa tu'c cosa oyway, mit nije'yu na̱s̈mot ituwatáj jatu'c s̈uy pa tu'c cosa ma̱lway.
22Dios iwamp najawiga nat iguicastiga̱tcʉs̈wa'n maljayajwat, mit nat ayé imaj. Po Dios imajmoygʉs̈p ayé maljayajwat mit may calma, mit je'jat merecia̱tpate Dios iguicastiga̱tcáj ni'c je'jat nʉmic pa itogoygawa'n. 23Mit Dios iwampey najawiga ni'c je' nas̈-ayo̱wis̈o'jcap, pa we'n na-oyninʉmgáj je'. Mit je' inʉm desde ámbanu ni'c natsʉ̱ngáj mit je' tsajpni'c mam i-oymanagui. 24Mit ʉjtsat Dios nas̈ya̱s̈cau, ni'c Dios iya̱s̈cʉs̈p judíujat mit we'ney jeme caje'jatway judíujat. 25As̈am itsʉ̱na ja'yic Oseas ilibruni'c, inʉm Dios:
Tʉnya̱s̈cʉs̈áj tʉnjayajwat jeme caje'jatwayate tʉnjayajwat.
Mit ayé jeme tʉngawampayate, tʉnwangʉs̈áj.
26Primeru Dios inʉmgʉs̈au: “Mijchat caje' tʉ̱jayajwat”,
po jinap inʉmgʉs̈áj ni'c i-e'pcʉs̈áj as̈am iwajyat,
mit je' ayé Dios jeme tsʉ̱napay pa siempre.
27Mit we'ney Isaías inʉmgʉs̈au Israejlatway: “Maja i-itwa'naj may Israelway jayajwat as̈am po'y lama̱t-auni'cway, po camayu inisalva̱tcʉjʉwa'n. 28Ni'c el Señor ijuzga̱tcʉs̈áj nu'pʉjʉn jayajwat en ayʉ̱́j mundu, mit cajegáj iguijuzga̱tcʉs̈wa'n, mit ijuzga̱tcʉs̈áj yacs̈ic.” 29Mit as̈am ámbanu iguinʉjm Isaías:
Dios imanda̱tp nu'pʉjʉn mit je' nas̈ca-actogoybʉ'ngawu.
Igajajt we'n, nas̈jatcájate as̈am ayé maljayajwat jeme tsʉ̱ngaway nʉ'jcopajcat Sodoma mit Gomorra cuandu itógoygaj.
Nat nas̈yacs̈icninʉmgap Dios
30¿Jinap ti nanʉmgáj? Ayé jeme caje'jatway judíujat igache'ngawu yacs̈ic to̱u, po je'jat ipa̱tcau yacs̈ic to̱u, ni'c icupʉjcau Dios, mit Dios iyacs̈icninʉmgʉs̈. 31Po Israejlatway iche'ngau yacs̈ic to̱u iyacpay ley, po ca-oyawu iguicumpliá̱tca ayé ley. 32¿Tini'c ca-oyawu iguipa̱tca yacs̈ic to̱u? Ni'c je'jat igache'ngawu as̈am jeme icupʉjcapay Cristu, po iche'ngau as̈am jeme pensa̱tpay pa puru ley iguicumplia̱twa'n. Je'jat as̈am jeme cunepigapay en tu'c tsa', mit ayé tsa' inʉmo'jcʉp Cristu, ni'c je'jat igacupʉjcap je'. 33As̈am itsʉ̱na ja'yic Dios ilibruni'c:
Márauga, tʉnyacp nʉ'jcopac Sion tu'c tsa' nas̈ajcunepiyámpay mit nas̈ajca'wámpay,
po jeme icupʉgámpay je', cawinchu̱gáj.
Currently Selected:
Romanos 9: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
