Romanos 10
10
1Hermanujat, tʉnwamp mit nu'pʉjʉn tʉnjo̱jt ma nisalva̱tcʉjʉ Israelway jayajwat, mit tʉnyo'tí̱jcap Dios ma salva̱tcʉs̈. 2Tʉnjawip ni'c je'jat iche'ngap mʉgʉc Dios po ca-oyap igui-is̈cápca Dios iyacs̈ta'cway. 3Ni'c igajawigap nat Dios iguiyacs̈icninʉmgʉs̈ jayajwat. Je'jat iwatcap as̈am iguiwanga pa itsʉ̱ngawa'n oy mit Dios, mit igamoygap laj Dios iguiyacs̈icninʉmgáj. 4Je'jat iwangau iguicumplia̱tcawa'n ayé ampay ley, po Cristu min iguicumplia̱t pa nas̈actu-e'pcáj tu'c nam to̱u, pa ma tsʉ̱nga yacs̈icninʉ́mijcat nu'pʉjʉn icupʉjcapay je'.
5Moisés nas̈actu-ís̈cau ayé yacs̈ic to̱u iyacpay ley, ni'c inʉm ilibruni'c: “Ayé jayau jeme icumplia̱támpay nu'pʉjʉn inʉmpay ley tsʉ̱náj oy mit ijtʉ̱́j vida cacʉs̈ámpay.” 6Po Dios nas̈moygau tu'c nam to̱u, mit nas̈yacs̈icninʉmgap ni'c nacupʉjcap Jesucristu. Jemni'c naganʉm: ¿Pʉn cu'táj tsajpni'c pa igui-acmi'nwa'n Cristu pa na̱s̈ni'c? 7Mit naganʉ́mey: ¿Pʉn managáj na̱s̈cʉtʉm mam itsʉ̱nga á̱nimajat pa igui-ajcu'twa'n Cristu? 8Po más oy nanʉ́mgaja Dios ipalabra ni'c ayé tsʉ̱nap najo̱tni'jcat. Ʉjtsat tʉnyʉmdacyo'ygajap Dios ipalabra pa jayajwat ma cupʉjca Jesucristu. 9Te nanʉmgap ni'c el Señor Jesús nas̈manda̱tcap, mit te nacupʉjcap mit nu'pʉjʉn najo̱jtat ni'c Dios i-acjutucta̱c Jesús mam itsʉ̱nga á̱nimajat, natsʉ̱ngáj salva̱tic. 10Ni'c nacupʉcp mit nu'pʉjʉn najo̱jt pa Dios nas̈yacs̈icninʉmáj, mit nanʉmp ni'c Jesús nas̈manda̱tp pa natsʉ̱nawa'n salva̱tic. 11Ni'c inʉm Dios ilibruni'c: “Nu'pʉjʉn icupʉjcapay je' cawinchu̱gáj.” 12Dios niwe'nu igui-e'pcʉs̈ judíujat mit jeme caje'jatway judíujat, ni'c el Señor Jesucristu nas̈manda̱tcap nanu'pʉjʉjnat mit nas̈majyigáj mayo'c te nayo'tcajap je'. 13Nu'pʉjʉn inʉ'jutcapay el Señor iyacs̈ta'cway, tsʉ̱ngáj salva̱tic. 14Po jayajwat ca-oyap iguinʉ'jútca el Señor te iganicupʉjcap je', mit ca-oyap iguicupʉ́jca je' te iganimaraugajap ipalabra, mit ca-oyap iguimaraugaja te nepʉn iganinʉmdacyo'jyap ipalabra. 15Mit te ca-itp pʉn i-ajyu'tcámpay, ¿nat iguinʉmdacyo'ygawa'n? Ni'c ja'yic itsʉ̱na Dios ilibruni'c: “¡Oyo'gu iminga jeme inʉmdacyo'ygapay paz mit jeme inʉmdacyo'ygapay oyway noticia!” 16Po caje' nu'pʉjʉn iwatcajap cuenta ayé oyway noticia. Ni'c Isaías inʉm: “Señor, ¿pʉn icupʉc lo que tʉnyʉmdacyo'ygaway?” 17Mit jemni'c itp ti nas̈maraugawa'n lo que inʉmpay Dios, pa we'n nacupʉjcáj Jesucristu. 18Po tʉn-ucyo'tp: ¿Nepʉn iganimarap ayé oyway noticia? Jo̱, imaraugau, ni'c ja'yic itsʉ̱na Dios ilibruni'c:
Inʉmdacyo'ygau jʉmgapa'tu,
mit nu'pʉjʉn jayajwat en ayʉ̱́j mundu imaraugau ayé oyway noticia.
19Po tʉn-ucyo'tpey: ¿Is̈jawiga Israelway jayajwat iga-entendia̱tcawu lo que Dios inʉmway? ni'c primeru Moisés ija'y lo que Dios inʉmway:
Tʉ-ac-awa'nigʉs̈áj ni'c tʉnwatcʉs̈áj oy pe'ta̱may jayajwat,
mit tʉ-ac-awa'nigʉs̈áj ni'c tʉnwatcʉs̈áj oy ayé jayajwat jeme iga-is̈capcapay neti.
20Mit capʉ̱tu Isaías iguinʉjm lo que Dios inʉmway:
Tʉs̈pa̱tcau jeme tʉs̈cache'ngaway,
mit tʉnque's̈ta̱jcʉs̈au jeme tʉs̈ca-atsʉ̱ngaway.
21Po Dios inʉmgʉs̈au Israelway jayajwat: “Najs̈ʉjw tʉnya̱s̈cʉs̈ jayajwat ma tʉs̈maraugac, po tʉs̈cajayaumaygap mit copacmʉgʉcwatcap.”
Currently Selected:
Romanos 10: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
