Romanos 8
8
Espíritu Santu tsʉ̱nap najo̱tni'jcat
1Mit jinap cjatsʉ̱ngap condena̱tic jeme imutʉgʉygaway Cristu Jesús. Je'jat igawatcap mal iyo'tpay ijo̱jtat po iwatcap lo que iwampay Espíritu Santu. 2Ni'c ayé Espíritu Santu jeme nas̈manda̱tcapay imoygʉs̈p vida jeme imutʉgʉygaway Cristu Jesús, mit je' nas̈libra̱tcap de ayé ma̱jlat nas̈domina̱tpay mit nas̈actogoypay. 3Ʉjtsat ca-oyap nas̈jayaumáygaja Dios iley mit jemni'c ayé ley ca-oyap nas̈salva̱tcap. Po Dios ijtʉp poder pa nas̈salva̱tcáj. Je' i-ajyu't iway en ayʉ̱́j mundu, mit je' jat jayau as̈am ʉjtsat. Je' min pa iguitso'cwa'n nama̱jlat, mit wename oyau iguivencia̱t ayé ma̱jlat iyo'tpay najo̱jtat. 4Je' iwat we'n pa ʉjtsat ma oya nas̈cumpliá̱tca lo que imanda̱tpay ley, ni'c nagajawatcap mal iyo'tpay najo̱jtat po nawatcap lo que iwampay Espíritu Santu.
5Ni'c jeme iwangapay ayé mal iyo'tpay ijo̱jtat, ipensa̱tí̱jcap aye mal. Mit jeme iwangapay lo que iwampay Espíritu Santu, ipensa̱tí̱jcap pa iguiwatcawa'n lo que iwampay Espíritu Santu. 6Ni'c jeme ipensa̱tí̱cpay ayé mal iyo'tpay ijo̱jt, togoyáj. Po jeme ipensa̱tí̱cpay pa iguiwatwa'n lo que Espíritu Santu iwampay, ayé jayau ijtʉ̱́j vida cacʉs̈ámpay mit ijtʉ̱́j paz ijo̱tni'c. 7Ni'c jeme ipensa̱tí̱cpay ayé mal iyo'tpay ijo̱jt, ayé Dios imutsuguin ni'c igajayaumajyap Dios iley, ne ca-oyap iguijayaumay. 8Mit jeme iwatcapay mal iyo'tpay ijo̱jtat, ca-oyap iguiwatca lo que dios iwampay.
9Po mijchat ingawatcap ayé mal i'tpay injo̱jtat po inwatcap lo que iwampay Espíritu Santu, ni'c Dios i-Espíritu tsʉ̱nap injo̱tni'jcat. Mit te tu'c jayau igamuyo'yp Cristu ijo̱tni'c, ayé caje' Cristu ijayau. 10Iyacs̈ta'cway Cristu tsʉ̱nap najo̱tni'jcat. Nacuerpu itp ti i-o'cwa'n ni'c nawatcau mal, po Espíritu Santu nas̈moygáj nam vida ni'c Dios nas̈yacs̈icninʉmgau. 11Dios i-acjutucta̱c Cristu Jesús mam itsʉ̱nga á̱nimajat, mit Dios i-ajyu't Espíritu Santu pa itsʉ̱nawa'n najo̱tni'jcat. Mit ʉjtsat itp ti na-o'jcawa'n po Dios nas̈acjutucta̱jcáj as̈am igui-acjutucta̱jc Cristu Jesús, mit nas̈moygáj nam vida ni'c Dios i-Espíritu tsʉ̱nap najo̱tni'jcat.
12Hermanujat, jemni'c nagajatsʉ̱ngap domina̱tic pa nas̈watcawa'n ayé mal iyo'tpay najo̱jtat. 13Ni'c te nawatcap ayé mal iyo'tpay najo̱jtat, natogoygáj. Po como nas̈majyigap Espíritu Santu, naniju'ptángʉjʉ mit ayé mal iyo'tpay najo̱jtat mit na-aguepcáj vida jeme cacʉs̈ámpay.
14Tenas̈wejnu'pcajap Dios i-Espíritu, najawigap ni'c ʉjtsat Dios nas̈wajyat. 15Ʉjtsat napʉctsougau Espíritu Santu, po je' nas̈camanda̱tcap as̈am tu'c mozo. Jinap nagajapʉ̱tcap as̈am ámbanu napʉ̱́tcaj mit ayé ley. Je' nas̈actujawigap ni'c ʉjtsat Dios nas̈wajyat, mit jemni'c nas̈nʉ́mgaja Dios: “Majyigac Padre.” 16Ayé nije'yu Espíritu Santu tsʉ̱nap najo̱tni'jcat, mit nas̈actujawigap ni'c ʉjtsat Dios nas̈wajyat. 17Mit te ʉjtsat Dios nas̈wajyat, we'ney napʉctsougáj nu'pʉjʉn iprometia̱tway Dios. Mit napʉctsougáj jeme Cristu ipʉctsowámpay te natunas̈cap mit je', mit we'n natsʉ̱ngáj mit je' tsajpni'c mam i-oymanagui.
18Tʉpensa̱tp ni'c caje' neti lo que natunas̈capay en ayʉ̱́j mundu, ni'c natsʉ̱ngáj más oy mit Dios tsajpni'c, mit je' nas̈actu-e'pcáj nat i-oymanagui. 19Mit nu'pʉjʉn cosa iwatway Dios en ayʉ̱́j mundu i-atsʉ̱ngap hasta Dios iwajyat itsʉ̱ngawa'n oymanac mit Dios. 20Ni'c nu'pʉjʉn cosa waticway capichinu oy. Mit ayé caje' je'yu niwajtʉu, po Dios iwat we'n pa ma atsʉ̱nga hasta ipichinwa'n oy nu'pʉjʉn. 21Ni'c jinap nu'pʉjʉn cosa iwatway Dios nʉmic pa itogoygawa'n, po Dios inamwatáj nu'pʉjʉn mit cajatogoygáj. Jatáj we'n en ayé s̈ʉjw cuandu Dios iwajyat itsʉ̱ngawa'n mit Dios mam je' itsʉ̱na mʉjninʉmic. 22Najawigap ni'c nu'pʉjʉn cosa iwatway Dios catsʉ̱ngap oy hasta jinap. Itunas̈cap as̈am iguitunas̈ tu'c to's̈ay ta̱go'jcʉpay. 23Mit ʉjtsat natunas̈capey. Dios nas̈moygau Espíritu Santu pa najawiga ni'c más natsʉ̱ngáj oy tsajpni'c. Jinap natunas̈cap ni'c na-atsʉ̱ngap pa Dios nas̈wayjatcáj tsajpni'c, mit wejpu'n nas̈moygáj nam cuerpujat mit nagajatunas̈cáj. 24Dios nas̈salva̱tcau mit jinap na-atsʉ̱ngap jeme jatámpay. Po te na-aguepcanup lo que na-atsʉ̱ngapay, nagaja-atsʉ̱ngap neti. Ni'c lo que tu'c jayau i-aguepnupay, igaja-atsʉ̱nap neti. 25Po te na-atsʉ̱ngap lo que naganipʉctsougapay, na-atsʉ̱ngap mit may calma.
26We'ney ayé Espíritu Santu nas̈majyigap cuandu nas̈ca-aguépca maj. Ni'c nagajawigap ti nayo'tcajáj Dios. Napensa̱to'jcap pa nas̈yo'tcajawa'n, po ayé Espíritu Santu nas̈majyigap pa na-ora̱tcawa'n, ni'c je' iyo'jtap Dios pa ʉjtsat. 27Dios ijawip nat ipensa̱t cada jayau ijo̱tni'c, mit ijawipey ti ipensa̱tpay ayé Espíritu, ni'c ayé Espíritu iyo'jtap pa Dios ijayajwat, mit iyo'tp lo que Dios iwampay.
Ʉjtsat más navencia̱tcáj
28Najawigap ni'c nu'pʉjʉn nas̈jatcapay, Dios nas̈acpichingap oy ni'c je' nawangap. Ni'c Dios nas̈ya̱s̈cau pa nawatca lo que je' iwampay. 29Ni'c Dios nas̈-is̈capcau desde ámbanu, mit wejpu'n inʉm ni'c najatcáj as̈am iway Jesucristu, pa we'n Jesucristu tanáj más mʉjninʉmic mam igui-e'pcawa'n nu'pʉjʉn hermanujat. 30Dios inʉm ámbanu ni'c najatcáj as̈am Jesucristu, mit cʉs̈ nas̈ya̱s̈cau pa naserviá̱tcaja je', mit nas̈yacs̈icninʉmgau. Mit cʉs̈wa'n nas̈moygáj laj natsʉ̱ngawa'n mit je' tsajpni'c mam i-oymanagui.
31Najawigap ni'c Dios iwatp nu'pʉjʉn pa ʉjtsat, mit jinap ¿ti nanʉmgáj? Te Dios tsʉ̱nap mit ʉjtsat, nepʉn nagapʉ̱tcáj. 32Dios iga-ayo̱wis̈u iway po i-entrega̱t ma o'c pa ʉjtsat nanu'pʉjʉjnat. Dios iyac Jesucristu as̈am tu'c regalu pájtsat, mit jinap nas̈moygáj nu'pʉjʉn cosajat pa ʉjtsat. 33Dios nas̈cupiugau, mit jinap nepʉn ca-oyap nas̈acusa̱tcap ni'c Dios nas̈yacs̈icninʉmgau. 34Nepʉn ca-oyap nas̈culpa̱tcap ni'c Cristu ayé jeme o'cway pa nama̱jlat, mit je' jutucta̱c, mit tsʉ̱nap mʉjninʉmic Dios i-oyimaycʉ'ni'c, mit jinap je' iyo'jtap Dios pa ʉjtsat. 35Natsʉ̱ngap seguru ni'c nepʉn nas̈cachi'tcáj Cristu icʉ'jugum ni'c je' siempre nas̈wangap. Te natunas̈cap, te na-aguepcap pruebajat, te nas̈po'ctangap, te natsʉ̱ngap sin cay, te naga-aguepcap jamuc, te natsʉ̱ngap en peligru, te nas̈ago'jcap. Maja ijatwa'naj we'n, po siempre natsʉ̱ngap mit Cristu mit je' nas̈wangap. 36As̈am itsʉ̱na ja'yic Dios ilibruni'c:
Siempre tʉtsʉ̱ngap en peligru pa tʉ-o'jcawa'n ni'c tʉwangap mi̱.
Tʉs̈-e'pcap as̈am borregujat jeme i-ago'jcámpay.
37Po maja ijatwa'naj nu'pʉjʉn ayʉ̱́j cosajat, más navencia̱tcáj ni'c Cristu nas̈wangap. 38Jemni'c tʉtsʉ̱nap seguru ni'c nepʉn nas̈cachi'tcáj Dios icʉ'jugum ni'c je' siempre nas̈wangap. Te na-o'jcap o te natsʉ̱ngap, Dios siempre nas̈actangap. Nejʉmay ángel nas̈cachi'tcáj Dios icʉ'jugum, ne jeme más manda̱tcapay. Jeme nas̈jatcapay jinap mit jeme nas̈mingajámpay, ayé nagapʉ̱tcáj. 39Jeme tsʉ̱ngapay tsajpni'c ne jeme tsʉ̱ngapay en ayʉ̱́j mundu, nejʉmay cosa iwatway Dios ca-oyap nas̈chi'tcap Dios icʉ'jugum ni'c je' nas̈wangap, ni'c namutʉgʉygau Cristu Jesús el Señor.
Currently Selected:
Romanos 8: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
