Romanos 7
7
Itumuquips̈p cʉ'pa't
1Hermanujat, tʉmucotscʉs̈p mijchat inicapcapay ley. Injawigap ni'c tu'c jayau itp ti iguijayaumaywa'n ley mientras tsʉ̱napnaj. 2Por ejemplu: Tu'c to's̈ay cʉ'pa'ticway igui-obliga̱tp ayé ley ma tsʉ̱na mit ina'u mientras cani-o'cp. Po i-o'cwa'n ina'u, ayé to's̈ay cajatsʉ̱náj obliga̱tic mit ayé ley pa itsʉ̱nawa'n mit ina'u. 3Jemni'c te ayé to's̈ay ipʉcp jatu'c jayau mit te tsʉ̱napnaj ina'u, inʉmgajáj ni'c chajyo'yp. Po te o'cp ina'u, cajatsʉ̱nap obliga̱tic mit ayé ley, mit oyap iguipʉc jatu'c jayau mit iganʉmgajáj ni'c chajyo'yp.
4Tʉnhermanujat, we'ney mijchat mitsʉ̱ngap as̈am o'guic mit ayé ley ija'yway Moisés ni'c inmutʉgʉygau Cristu jeme o'cway mit jeme jutucta̱cway mam itsʉ̱nga á̱nimajat, mit jinap inaguepcap nam vida mit je', mit we'n inwatcáj oy pa Dios ma tsʉ̱na oyninʉmic. 5Ni'c ámbanu cuandu nayo'ygaj as̈am iguiyo'jt najo̱jtat, nawangau mal cosajat, mit ayé ley nas̈actujawigau ni'c mal nawatcapay, po majawe'naj nawangau mal cosajat, mit ayé mal nas̈actogoygájate. 6Mit jinap nas̈cajadomina̱tcap ayé ley ni'c na-ampay vida tsʉ̱nap as̈am o'guic, mit jinap natsʉ̱ngap libre pa nas̈servia̱tcajawa'n Dios ni'c Espíritu Santu nas̈moygap nam vida, mit nas̈cajamanda̱tcap ayé ampay ley ja'yicway.
Ayé ma̱jlat jeme tsʉ̱napay najo̱tni'c
7¿Ti nanʉmgáj? ¿Is̈jawiga ayé ley nas̈actuwatcap mal? Caje' we'n. Ʉ̱ tʉngajawipate ni'c tʉnwatp mal maganʉm ayé ley ni'c tʉnwatp mal. Ʉ̱ tʉngajawipate te tʉnwa'náj jayje' maganʉm ayé ley: “Camwa'n jayje'.” 8Po ayé ley tʉs̈actujawiu ni'c tʉnwat mal, mit cʉs̈ tʉnwan nu'pʉjʉn mal. Ni'c mam iga-it ley, nagajawip te nawatp mal. 9Mit ʉ̱ ámbanu tʉnga-is̈capu ley, mit wejpu'n tʉnyʉm ni'c oy tʉtsʉ̱́naj. Po cuandu tʉs̈jawij lo que imanda̱tpay ayé ley, más tʉnwan mal cosajat, mit cʉs̈ tʉnimojyʉu cuenta ni'c tʉyo'yp mal mit tʉtogoyájate. 10Dios iyac ayé ley pa natsʉ̱ngawa'n oy, po tʉnimojyʉu cuenta ni'c ayé nije'yu ley tʉs̈actogoyájate. 11Ni'c tʉnche'n ayé ley pa tʉpichinwa'n oy mit Dios, po ayé ley tʉs̈actujawiu ni'c tʉnwat más mal, mit jas̈ʉ̱n tʉtogojy.
12Mit limpiu ayé ley iyacway Dios. Mit ayé mandatu iyacway Dios, ayé limpiu, yacs̈ic mit oy. 13¿Is̈jawiga ayé ley jeme oyway tʉs̈actogoyáj? Caje' we'n. Po cuandu tʉs̈wajt mal, tʉpichin yacs̈icto̱uni'c pa tʉtogoywa'n ni'c tʉngajayaumayu ayé ley. Dios iyac ayé ley pa na-is̈cápca ayé ma̱jlat, mit najawigáj ni'c ma̱lo'c ayé ma̱jlat.
14Najawigap ni'c Dios iyac ayé ley, po ʉ̱ tʉjayau, mit tʉtsʉ̱nap to'ctʉgʉyic mit ayé ma̱jlat. 15Ni'c ʉ̱ tʉnga-entendia̱tp lo que tʉnwatpay. Tʉnwamp tʉs̈watwa'n cosa oyway po tʉngawatp. Mit tʉngawamp tʉs̈watwa'n cosa ma̱lway po ayé tʉnwatp. 16Mit te tʉnwatp ayé mal tʉngawampay, tʉnimojyʉp cuenta ni'c oy ayé ley. 17Mit caje' ʉ̱jyu tʉnwatp ayé mal tʉngawampay, po tʉs̈actuwatp mal ayé ma̱jlat jeme tsʉ̱napay tʉnjo̱tni'c. 18Tʉnjawip ni'c ʉ̱ ca-oyap tʉs̈wat oy ni'c itp puru mal tʉnjo̱tni'c. Ni'c tʉnwamp tʉs̈watwa'n oy po ca-oyap tʉs̈wat. 19Tʉngawatp ayé oy tʉnwampay, po tʉnwatp ayé mal tʉngawampay. 20Mit te tʉnwatp lo que tʉngawampay, caje' ʉ̱jyu tʉnwatp ayé mal, po tʉs̈actuwatp mal ayé ma̱jlat jeme tsʉ̱napay tʉnjo̱tni'c.
21Mit we'n tʉs̈jatí̱c: Cuandu tʉnwamp tʉs̈watwa'n oy, ca-oyap tʉs̈wat ni'c tʉs̈atucp ayé mal jeme tsʉ̱napay tʉnjo̱tni'c. 22Tʉnwano'jcap Dios iley mit nu'pʉʉn tʉnjo̱jt. 23Po tʉn-e'p ni'c itp jatu'c ley ma̱lway mit ayé tʉs̈atucp, mit iwamp tʉs̈domina̱táj pa tʉgajayaumájya Dios iley. Ayé ley ma̱lway inʉmo'jcʉp ayé ma̱jlat jeme tsʉ̱napay tʉnjo̱tni'c, mit iwamp tʉs̈domina̱táj.
24¡Pro̱wij de ʉ̱! Tʉs̈domina̱tp ayé ma̱jlat jeme tsʉ̱napay tʉnjo̱tni'c mit tʉs̈actogoyáj. ¿Pʉn oyáj tʉs̈libra̱tp? 25Tʉnyʉjmap Dios ni'ctiyu̱s̈ ni'c el Señor Jesucristu tʉs̈libra̱t. Jemni'c tʉnservia̱jtap Dios mit nu'pʉjʉn tʉnjo̱jt mit je' tʉs̈manda̱tp, po ayé ma̱jlat iwampnaj tʉs̈domina̱táj.
Currently Selected:
Romanos 7: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
