Romanos 4
4
Abraham iyacp ejemplu
1Ʉjtsat tʉjudíujat tʉpichingau Abraham ifamiliani'c, mit je' meru tʉnte̱jtat ámbanuway. ¿Is̈jawiga nat ipichijn oy Abraham mit Dios? 2Te Dios iyacs̈icninʉm Abraham ni'c iwat oy, Abraham oyapate inimʉjninʉjmʉ. Po Dios igapʉctsowu Abraham ni'c iwat oy. 3¿Ti inʉm Dios ilibruni'c? Inʉm ni'c Abraham icupʉc Dios, jemni'c Dios iguipʉctso̱u as̈am tu'c jayau yacs̈icway. 4Te tu'c jayau yos̈watp, igamoygap itumi̱n as̈am regalu. Imoygap ni'c ipʉ́jquijat. 5Po Dios nas̈capʉ́jquijat neti. Ca-oyap nas̈watca neti pa Dios nas̈pʉctsougáj. Po nas̈pʉctsougap te nacupʉjcap je', ni'c Dios oyáj iguipʉctsougʉs̈ maljayajwat te iguicupʉjcap. 6Mit we'ney iguinʉjm David ni'c tsʉ̱nap oy ayé jayau jeme Dios iyacs̈icninʉmpay, ni'c je'yu ca-oyapate iguiwat neti pa inisalva̱jtʉwa'n. 7Inʉm David:
Tsʉ̱ngap oy jeme perdoná̱tijcatway ima̱jlat,
tsʉ̱nap oy tu'c jayau te Dios iguiperdona̱jtap aye mal iwatway.
8Tsʉ̱náj oy tu'c jayau te Dios iguigajawajtap cuenta ayé mal iwatway.
9¿Is̈jawiga tsʉ̱ngáj oy solo jeme tsʉ̱ngapay marca̱tic as̈am judíujat iguiwatca o tsʉ̱ngámpey oy jeme catsʉ̱ngapay marca̱tic? Tʉnyʉm we'n ni'c Abraham icupʉc Dios, jemni'c Dios iguipʉctso̱u as̈am tu'c jayau yacs̈icway. 10¿Mu̱tij iguipʉctso̱u as̈am jayau yacs̈icway? Dios ipʉctso̱u Abraham as̈am yacs̈icway antes inimarcá̱jtʉj. 11Mit cʉs̈ je' nimarca̱jtʉ́. Ayé tu'c seña pa najawiga ni'c Abraham yacs̈icninʉmic antes inimarcá̱jtʉj ni'c icupʉc Dios. Jat we'n pa iguiwayjatcʉs̈wa'n nu'pʉjʉn cupʉcpajyat camarcá̱tijcatway, jemni'c Dios iguipʉctsougʉs̈ as̈am yacs̈ijcatway ni'c iguicupʉjcap. 12Abraham iwayjatcʉs̈pey jeme tsʉ̱ngapay marca̱tic as̈am judíujat iguiwatca, po caje' jeme tsʉ̱ngapay marca̱tic icuerpuni'gu. Je' iwayjatcʉs̈p nu'pʉjʉn jeme cupʉjcapay as̈am je' icupʉjc antes inimarcá̱jtʉj.
Dios icumplia̱tp ipromesa
13Dios iprometia̱jtau Abraham mit ifamiliajat ni'c ipʉctsougáj nu'pʉjʉn mundu pa je'jat. Mit Dios iyajcʉs̈au ayé promesa, po caje' ni'c Abraham ijayaumay ayé ley. Je' iyajcau ayé promesa ni'c Abraham iguicupʉc, mit jemni'c Dios iguipʉctso̱u as̈am tu'c jayau yacs̈icway. 14Ni'c te ipʉctsougáj nu'pʉjʉn solo jeme ijayaumaygapay ley, jalmanu lo que nacupʉjcapay, mit cajavalia̱tp lo que iprometia̱tway Dios. 15Ni'c mam i-it ley, ayé ley nas̈castiga̱tcap. Po mam iga-it ley, ca-itp pʉn nas̈culpa̱tcámpay.
16Jemni'c Dios iguiyajc ayé promesa pa jeme cupʉjcapay, pa nas̈moygáj favor we'nujyu, mit pa ayé promesa ma tan seguru pa nu'pʉjʉn Abraham ifamiliajat. Mit caje' solo pa jeme ijayaumaygapay ley, po we'ney pa jeme cupʉjcapay as̈am Abraham icupʉjc. Mit Abraham tan as̈am nate̱jtat nanu'pʉjʉjnat. 17Dios inajau Abraham yename: “Tʉyacp mi̱ pa pi wayjatcʉs̈ nu'pʉjʉn jayajwat.” We'n itsʉ̱na ja'yic Dios ilibruni'c. Jemni'c Abraham ayé nate̱jtat. Je' icupʉc Dios, mit Dios iguiyac pa ʉjtsat nas̈wayjatcáj. Je' icupʉc ni'c Dios oyap iguimoygʉs̈ vida o'guijcatway, mit i-acchu̱chiu ayé cosajat jeme ca-itpayate.
18Abraham igajawipate nat ijatwa'n lo que Dios inʉmway, po majawe'naj je' icupʉc Dios, mit i-atsʉ̱nau pa iguiwayjatcʉs̈wa'n mayo'c jayajwat. As̈am iguinʉjmau Dios: “Mayo'c i-itwa'n inwajyat.” 19Mit Abraham ijtʉu casi cien añu, mit ijawiu ni'c icuerpu as̈am o'guicway, po je' cadesmaya̱tu icupʉc. Mit ijawiu ni'c ito's̈ay Sara nas̈way itiempu pa i-ijtʉwa'n iway, po majawe'naj siguia̱t iguicupʉc Dios. 20Je' caduda̱tu po siguia̱t iguicupʉc ayé promesa iyacway Dios. Je' cupʉc más mʉgʉc mit i-oyninʉm Dios. 21Je' tsʉ̱nau seguru ni'c Dios oyap iguiwat lo que inʉmway. 22Jemni'c Dios iguipʉctso̱u as̈am tu'c jayau yacs̈icway ni'c cupʉc.
23Ja'yic itsʉ̱na Dios ilibruni'c ni'c Dios ipʉctso̱u Abraham as̈am jayau yacs̈icway. Po ayé canʉmic solo pa Abraham, ayé nʉmic pa ʉjtsatey. 24Ni'c Dios nas̈pʉctsougámpey as̈am yacs̈ijcatway ni'c nacupʉjcap ayé Dios jeme i-acjutucta̱cway el Señor Jesús mam itsʉ̱nga á̱nimajat. 25Dios i-entrega̱t Jesús pa nas̈tso̱jcajáj nama̱jlat, mit Dios i-acjutucta̱c, pa we'n nas̈yacs̈icninʉmgáj te nacupʉjcap je'.
Currently Selected:
Romanos 4: PSNT
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento en Popoluca de Sayula © Sociedad Bíblica de México, [1969].
